Мыгъэ илъэс 25-рэ хъугъэ Мыекъопэ къэралыгъо технологическэ университетым (а лъэхъаным МКъТИ зэрэщытыгъэр) апэрэ чIэтIупщыгъо зиIагъэр.

Сэнэхьат лъэныкъохэу «Экономикэмрэ туризмэм игъэIорышIэнрэ ыкIи хьакIэщ хъызмэтымрэ», джащ фэдэу «ЧIыгугъэпсыныр» зыфиIохэрэм къычIатIупщыгъагъэхэр джыри зэ МКъТУ-м щызэрэугъоигъэх. Урысыем ичIыпIэ зэфэшъхьафхэм къарыкIыгъэ нэбгырэ 30 фэдиз ахэр мэхъух, икIэрыкIэу студентыгъор зэхашIэжьыгъ. «Сэ сыкъошIэжьа?» зыфэпIощт упчIэхэр зэратыжьыщтыгъэх, университетыр гушIогъо макъэмэм зэлъиштэгъагъ.

Мыщ фэдэ зэIукIэмэ япшъэрылъхэр — ныбджэгъуныгъэ зэпхыныгъэхэр гъэпытэгъэнхэр, творческэу зэхэгъэгущыIэгъэнхэр, нахь зэрэгъэшIэжьыгъэнхэр, университетым имэхьанэ къэIэтыгъэныр, джащ фэдэу общественнэ ыкIи гъэсэныгъэ щыIакIэм чIатIупщыгъэхэр къыхэгъэлэжьэгъэнхэр ары.

МКъТУ-м къычIэкIыгъэхэм я Ассоциацие хэтэу Галина Измайловам Iофтхьабзэм хэлажьэхэрэм экскурсие афызэхищагъ, университетым хэхъоныгъэу ышIыгъэхэр аригъэлъэгъугъ. Студенческэ илъэсхэр зыгу къэкIыжьыгъэхэр университетым илъэс 31-м къыкIоцI хэхъоныгъэу ышIыгъэхэр къизыIотыкIырэ видеороликым еплъыгъэх. Апэрэ ректорэу ТхьакIущынэ Аслъан ыкIи джырэкIэ ректорэу Къуижъ Саидэ рэзэныгъэ гущыIэ фабэхэр апагъохыгъэх. Непэрэ ректорым ишIуагъэкIэ университетым гъэхъагъэхэр зэришIыхэрэр, ыпэкIэ зэрэлъыкIуатэрэр бэмэ къыхагъэщыгъ. ХьакIэмэ фэбагъэ хэлъэу агу къэкIыжьыгъэх езыгъэджагъэхэ кIэлэегъаджэхэр, студенческэ щыIакIэм щыщ пычыгъо гъэшIэгъонхэр къаIотэжьыгъэх

— Университетым къычIитIупщыгъэмэ язэIукIэхэр мыщ щырагъэкIокIыныр хабзэ дахэ хъугъэ. Ащ ишIуагъэкIэ ныбджэгъуныгъэ зэфыщтыкIэхэр, зэпхыныгъэхэр мэпытэх. МКъТУ-м къычIэкIыгъэхэм я Ассоциацие ащкIэ площадкэ дэгъу хъугъэ. Мыхэр ары тэ тибаиныгъэ, университетым инепэ ыкIи инеущыр, — къыхигъэщыгъ Галина Измайловам.