Мыекъопэ къэралыгъо технологическэ университетым шIэныгъэ тхьамафэу щыкIорэр зэрэушъагъэр умыгъэшIэгъон плъэкIырэп: программэм хэтых лIэуж пчъагъэхэм ашIыгъэ ушэтынхэр, гукъэкIыкIэхэр къетых ыкIи проектыкIэхэр щырагъажьэх.

Анахьэу анаIэ зытырадзэрэр — научнэ темэхэу непэрэ мафэмкIэ мэхьанэшхо зиIэхэр, инновационнэ шIыкIэхэр ыкIи шIэныгъэлэжьхэм, студентхэм ыкIи профессионалхэм язэхэгущыIэжь.

Физиологием ыкIи патологием якафедрэ секциеу «Непэрэ медицинм игумэкIыгъохэр ыкIи ипшъэрылъхэр» зыфиIорэр зэхищагъ, ащ къырагъэблэгъэгъэ экспертхэр хэлэжьагъэх. Секциер зэрищагъ кафедрэм ипащэу, профессорэу, медицинэ шIэныгъэхэмкIэ докторэу Виктория Мясниковам. Хьисап моделированиер эпилептическэ припадкэхэм ыкIи коронавируснэ инфекцием зэрэщагъэфедэрэр, остеологием иупчIэхэр, гемостатическэ зытетэу пектинхэм яIэр ыкIи иинновациехэр зэхахьэм щызэхафыгъэх.

Морфологием икафедрэ секциеу «Медицинэм иупчIэ шъхьаIэхэр» зыфиIорэр щыкIуагъ, ащ темэу къыщаIэтыгъэхэр цIыфхэм япсауныгъэ, 3D-атласхэмкIэ студентхэр егъэджэгъэнхэм, ыкIи нэмыкIхэм афэгъэхьыгъагъэх. Кафедрэм иIофышIэмэ студентмэ къафаIотагъ анатомием иуцун зыфэдагъэр, ушэтынхэр а лъэныкъомкIэ къагъэлъэгъуагъэх. Мы секцием хэлажьэхэрэр зэхэгущыIэжьыным щычаныгъэх, лъэшэу ашIогъэшIэгъоныгъ.

Экономикэм ыкIи юриспруденцием яинформационнэ системэхэм яфакультет секционнэ зэхэсыгъоу «Цифрэ трансформациер: киберпространствэр, цифрэ тIуазэхэр ыкIи киберщынэгъончъэныр» зыфиIорэр ригъэкIокIыгъ. Искусственнэ интеллектыр щыIэныгъэм зэрэхэлажьэрэр, мэхьанэу иIэр, информационнэ щынэгъончъэнымкIэ ишIуагъэу къакIорэр, тапэкIэ цифрэ тIуазэхэм ягъэфедэнкIэ гугъапIэу щыIэхэр ыкIи нэмыкI Iофыгъохэр мыщ щызэхафыгъэх. Мы Iофтхьабзэм докладхэр къыщызышIыгъэхэр: Дэргушао Асият, Цундышк Вячеслав, Ирина Брикова, Раиса Бутко, Виталий Довгаль, Наталья Козлова, Мэрэтыкъо Сусан, МэщфэшIу Сусан, Светлана Обмачевская, Анна Паскова, Сапые Азамат, Иныхъу Джанетт.

Технологическэ факультетым шIэныгъэм ия 42-рэ Тхьамафэм къыдыхэлъытагъэу секциеу «Урысыем ипромышленность псынкIэ хэхъоныгъэ егъэшIыгъэнымкIэ шIыкIэ-амалэу непэ щыIэхэр» зыфиIорэр зэхищагъ, ар зэрищагъ доцентэу КIэдэкIое Нафсэт. Ащ хэлэжьагъэхэр модэм тегущыIагъэх, джащ фэдэу промышленность псынкIэм Урысыем чIыпIэу щиубытырэм, шIыкIэ-амалэу къыфагъотыхэрэм. Дизайнерэу Къуекъо Саидэ урысые модельермэ ятворчествэ къатегущыIагъ, ООО «Дом быта» зыфиIорэм ипащэу Ольга Красновар Урысыем икъыблэ лъэныкъо дэн Iофым епхыгъэ бизнесым зэрэщыдэлажьэхэрэм игугъу къышIыгъ.

Шхыныгъохэм ягъэхьазырын ыкIи гъомлапхъэмэ ятехнологиехэм якафедрэ секциеу «Мэкъу-мэщ продукцием икъыдэгъэкIыжьынкIэ инновационнэ технологиехэу агъэфедэхэрэр ыкIи хэушъхьафыкIыгъэ гъомлапхъэхэр» зыфиIорэр щыкIуагъ, ар зэращагъ кафедрэм ипащэу Хьаткъо Зурет ыкIи Мэрэтыкъо Фатимэ. Хьалыгъу ыкIи кондитерскэ шхыныгъохэм хагъахъоу афашIыхэрэр, хьаджыгъэу агъэфедэрэр, глютен зыхэмылъ продуктхэр, инновационнэ технологиехэу арахьылIэхэрэр ыкIи нэмыкIхэм атегущыIагъэх. Секцием изэхэсыгъо магистрантхэр, студентхэр, кафедрэм идоцентхэр ыкIи хьакIэхэр хэлэжьагъэх. Мы Iофтхьабзэм ишIуагъэкIэ конференцием хэлажьэхэрэр научнэ гъэхъагъэу ашIыгъэхэм ащагъэгъозагъэх, научнэ-практическэ опытэу яIэмкIэ адэгощагъэх.

Экономикэм ыкIи гъэIорышIэным яфакультет шIэныгъэм ия 42-рэ Тхьамафэм  зэфэхьысыжьхэр къыфишIыгъэх ыкIи ащ къыдыхэлъытагъэу секциехэм язэхэсыгъохэр ригъэкIокIыгъэх.  Финансхэм ыкIи кредитхэм якафедрэ секциитIумэ язэхэсыгъо щыкIуагъ — «Тенденции развития АПК в условиях современных вызовов: экономические и гуманитарные аспекты» зыфиIорэр. Ащ ипащэр факультетым идеканэу Ешыгоо Светлан ыкIи «Экономикэр, финансхэр, инновациехэр: теорием ыкIи практикэм япхыгъэ упчIэхэр» зыфиIорэр, ипащэр доцентэу Хьамырзэ Саид. Дунаим иэкономикэ зэхъокIыныгъэу фэхъугъэхэр, Урысыер экономикэм ылъэныкъокIэ зэутэкIыгъэ гумэкIыгъор, финансхэм языпкъитыныгъэ, кризисым пэшIуекIорэ Iофтхьабзэхэр ыкIи нэмыкIыбэхэм а зэхэсыгъохэм ягугъу ащашIыгъ.

Маркетингым, сервисым ыкIи туризмэм якафедрэ щыкIогъэ секционнэ зэхэсыгъохэм темэу «Социальнэ-экономическэ хэхъоныгъэу шъолъырым ышIыхэрэр: ахэм гумэкIыгъоу къахэкIыхэрэр ыкIи зэрэзэшIуахыхэрэр» зыфиIорэр къащаIэтыгъ.

Менеджментым ыкIи шъолъыр экономикэм якафедрэ секциеу «Социальнэ-экономическэ хэхъоныгъэ шъолъырым егъэшIыгъэнымкIэ гумэкIыгъоу щыIэхэр ыкIи гугъапIэхэр» зыфиIорэр щызэхащагъ, ар зэращагъ доцентхэу Инна Савицкам ыкIи Наталья Маськовам. Конституционнэ гъэпсыным, къэралыгъо ыкIи муниципальнэ гъэIорышIэным якафедрэ исекциехэм къэралыгъо ыкIи чIыпIэ зыгъэIорышIэжьыным афэгъэхьыгъэ упчIэхэр къыщаIэтыгъэх, джащ фэдэу социальнэ-экономическэ хэхъоныгъэ шъолъырым иIэнымкIэ щыт гумэкIыгъохэм атегущыIагъэх, ипащагъэр доцентэу Надежда Продиблох.

Философием, социологием ыкIи педагогикэм якафедрэ непэрэ щыIэныгъэм философием ыкIи социологием алъэныкъокIэ щыIэ упчIэхэр щызэхафыгъэх, япэщагъэр: профессорэу Сихъу Аминэт. Дунэе зэфыщытыкIэхэм, обществэм ыпашъхьэ къиуцохэрэ социальнэ-философскэ гумэкIыгъохэр, унагъохэм язытет афэгъэхьыгъэ Iофыгъохэр мыщ щызэхафыгъэх.

Профессорэу, философие шIэныгъэхэмкIэ докторэу Азащыкъ Геннадий экономикэм ыкIи гъэIорышIэным ифакультет щеджэхрэм апае семинар ригъэкIокIыгъ, ащ темэу иIагъэр: «Урысыер къызэрэзэтеуцорэр: тарихъ екIолIакIэу ащ иIэхэр». Семинарым къыдыхэлъытагъэу ныбжьыкIэхэр патриотическэу пIугъэнхэм, непэрэ геополитическэ щыIакIэм къыздихьырэ гумэкIыгъохэм ахэплъагъэх. Мыекъуапэ къызэрагъэгъунагъэм илъэсгъогухэу къакIухьэгъагъэхэр агу къагъэкIыжьыгъэх, ахэр ныбжьыкIэхэр пIугъэнхэмкIэ зы щысэшIу зэрэхъухэрэр къыхагъэщыгъ.

Фармацевтическэ факультетым, медицинэ шIэныгъэхэмкIэ кандидатэу, фармацием икафедрэ идоцентэу Артур Арутюновыр зипащэгъэ секцие щыкIуагъ, темэр: «Фармацием епхыгъэ упчIэ шъхьаIэхэр». КIэлэегъаджэхэу кафедрэм щылажьэхэрэм фармакотерапием ыкIи фармацевтическэ джэнджэшыгъэу нахьыжъхэм арагъэгъотырэм, программнэ обеспечением ибэдзэр ыкIи мерчандайзингэу уцыщэ тучанхэм яIэм ыкIи нэмыкIхэм афэгъэхьыгъэхэм атегущыIагъэх. 

Неущ университетым шIэныгъэм ия 42-рэ Тхьамафэ къыдилъытэрэ зэхэсыгъохэм яужырэ мафэу щытыщт. Ащ изэфэхьысыжь нахь гъэшIэгъонхэм ягугъу къышъуфэтшIыжьыщт, тикъэбархэм шъуалъыплъ!