Федеральнэ шъолъырэу «Сириусым» шIэныгъэлэжь ныбжьыкIэхэм яя III-рэ Дунэе саммитым иIофшIэн щыригъэжьагъ, зэрэщыкIорэр лъэныкъоу «Синергия Deep Health ыкIи Deep Food Tech екIолIакI». Iофтхьабзэм шIэныгъэлэжь ныбжьыкэ нэбгыри 100-ехъу хэлажьэ, ахэр Урысыем, Республикэу Беларусь, Республикэу Узбекистан ыкIи Кыргызскэ Республикэм ащыщых.

Саммитым ипшъэрылъыр — шIэныгъэлэжь ныбжьыкIэхэм ядунэе научнэ консорциумым гъомлэпхъэ щынэгъончъэным ыкIи псауныгъэ къэухъумэным алъэныкъокIэ хэхъоныгъэхэр ашIынхэр ары. Ар Къыблэ Урысыем щыIэ научнэ-гъэсэныгъэ проектхэм ягупчэу дунэе мхьанэ зиIэм щагъэцакIэ.

Саммитым изэхэщакIохэр: Пшызэ къэралыгъо технологическэ университетыр, Пшызэ научнэ фондыр, Къыблэ Урысыем шъолъыр научнэ-гъэсэныгъэ гупчэу дунэе мэхьанэ зиIэр, ащ Ростов хэкур, Краснодар краир ыкIи Волгоградскэ хэкур зэлъеубытых.

Мыекъопэ къэралыгъо технологическэ университетым илIыкIо куп ипащагъэр шхыныгъохэм ягъэхьазырын ыкIи гъомлапхъэхэм ятехнологиехэм якафедрэ ипащэу, техническэ шIэныгъэхэмкIэ докторэу, доцентэу Хьаткъо Зурет.

Iофтхьабзэм къыдыхэлъытагъэу къекIолIагъэхэм шIуфэс псалъэкIэ закъыфагъэзагъ: Пшызэ къэралыгъо технологическэ университетым иректор ипшъэрылъхэр зыгъэцакIэу Игорь Лагеревыр; ФИЦ «Субтропическэ научнэ гупчэу наукэмкIэ Урысыем иакадемие иIэм» ипащэу, РАН-м иакадемикэу, мэкъу-мэщ шIэныгъэхэмкIэ докторэу Алексей Рындиныр; Пшызэ научнэ фондым ипащэу, техническэ шIэныгъэхэмкIэ кандидатэу, доцентэу Виктор Анисимовыр; АНО «Управляющая компания межрегионального научно-образовательного центра Юга» зыфиIорэм игъэIорышIапIэ итхьаматэу Константин Тимоляновыр; научнэ, инновационнэ ыкIи цифровизациемкIэ Шъачэ къэралыгъо университетым ипроректорэу, техническэ шIэныгъэхэмкIэ кандидатэу, доцентэу Александр Ревнивыхыр. 

Пленарнэ зэхэсыгъом шIэныгъэлэжьхэу агробиотехнологием, гъомлэпхъэ системэм, гъомлэпхъэ щынэгъончъэным ыкIи псауныгъэ къэухъумэным алъэныкъокIэ лажьэхэрэр къыщыгущыIагъэх. Саммитым испикерэу щытыгъэ Хъоткъо Зурет докладэу къышIыгъэм итемэ: «Мэкъу-мэщ продукциеу къыдагъэкIыжьырэр ыкIи щагъэлъырэм технологиехэу мэхьанэшхо зиIэхэр зэрэрашIэфхэрэр, ахэм экспортнэ амалэу яIэр» , ащ ыуж кIэлэеджакIохэр игъусэхэу шIэныгъэ ушэтынэу ашIыгъэхэр къыIотагъэх.

Ащ фэшъхьафэу, МКъТУ-м икIыгъэхэу доклад къэзышIыгъэхэр:

— аспирантэу Екатерина Колодинар, темэр: «Модифицированнэ технологиехэу печеньем икъыдэгъэкIын епхыгъэхэр, глютеныр макIэу зыхэлъхэр ыкIи сорбционнэ мэхьанэ зиIэхэр свойствами» (научнэ пащэр — Хьаткъо Зурет);   

— магистрантэу Елизавета Кобченко, темэр: ХъызмэтшIапIэр проектирование шIыгъэныр «Инновационнэ сублимированнэ пхъэшъхьэ-мышъхьэхэр» (научнэ пащэр — Хьаткъо Зурет);   

— студентэу Павел Рычковыр, темэр: Бизнес-проектым изэхэгъэуцон «Функциональнэ мармеладэу мэркIо пхъэшъхьэ-мышъхьэм хэшIыкIыгъэр» (научнэ пащэр — Блэгъожъ Асет).

Наукэм, технологиехэм ыкIи инновациехэм хэхъоныгъэ ягъэшIыгъэным афэгъэзэгъэ резолюциеу аштагъэр саммитым зэфэхьысыжь фэхъугъ, ар лъэныкъоу «Синергия Deep Health ыкIи Deep Food Tech екIолIакIэхэм» афэгъэхьыгъ.