Мыекъопэ къэралыгъо технологическэ университетым зэIукIэ щыкIуагъ, экологием ифакультет истудентхэр УФ-м и Къэралыгъо Думэ идепутатмэ аIукIагъэх, ар экологием ыкIи тыкъэзыуцухьэрэ дунаир къэухъумэгъэным афэгъэхьыгъагъ.

Iофтхьабзэм хэлэжьагъэх Къэралыгъо Думэм экологием, чIыопсым ыкIи тыкъэзыуцухьэрэ дунаим икъэухъумэнкIэ и Комитет итхьаматэ игуадзэу Евгений Марковыр, Урысые Федерацием и Къэралыгъо Думэ идепутатэу Пэнэшъу Къаплъанэ, Адыгэ Республикэм и Къэралыгъо Совет-Хасэ гъэсэныгъэмкIэ, шIэныгъэмкIэ, ныбжьыкIэ IофхэмкIэ, спортымкIэ ыкIи къэбар жъугъэм иамалхэмкIэ икомитет итхьаматэу Шэуджэн Темботэ, МКъТУ-м иректорэу Къуижъ Саидэ, егъэджэн IофшIэнымкIэ проректорэу Людмила Задорожнаяр, IофшIэнымкIэ ыкIи инновационнэ хэхъоныгъэмкIэ проректорэу Татьяна Овсянниковар, экологическэ факультетым идеканэу Галина Коноваловар, шIэныгъэлэжьхэр ыкIи факультетым икIэлэегъаджэхэр, студент-экологхэр, инновационнэ проектхэм яавторхэр.

Темэ шъхьаIэу яIагъэр экологиер ыкIи тыкъэзыуцухьэрэ дунаир къэухъумэгъэныр ары. ЗэIукIэм хэлэжьагъэмэ къаIотагъ непэрэ уахътэм экологием ылъэныкъокIэ къыэхъурэ гумэкIыгъомэ зэрябэныхэрэр, шъолъырым ыкIи хэгъэгум зэрэпсаоу а лъэныкъомкIэ щызэшIуахырэ Iофыгъохэр.

Акселераторэу МКъТУ «ИнноВекторым» къыдилъытэрэ проектхэу экологием ифакультет истудентмэ зэхагъэуцуагъэхэр ары анахьэу хьакIэмэ ашIогъэшIэгъоныгъэхэр. Ахэр ТОП-1000 зыфиIорэ стартапхэу Урысыем иIэхэм ащыщ хъугъэх. Лъэтегъэуцоу ахэмкIэ зэхащагъэхэр депутатхэм дэгъукIэ зэдаштагъ.

ЗэIукIэм зэфэхьысыжьэу фэхъугъэр зэдэлэжьэныгъэу университетымрэ депутатхэмрэ экологием ылъэынкъокIэ зэдашIыщтыр ары. Ащ фэшъхьафэу, студентхэр экологием епхыгъэ программэхэм ахагъэлэжьэнхэу рахъухьагъ. Студентхэм ухьазырыныгъэ дэгъу зэряIэр джащ фэдэу депутатхэм къыхагъэщыгъ.