Мыекъопэ къэралыгъо технологическэ университетым шIэныгъэлэжьхэм ясовет изэхэсыгъо щыкIуагъ, ащ тхьаматагъор щызэрихьагъ ректорэу Къуижъ Саидэ. ШIэныгъэлэжьхэм ясовет иIофшIэн хэлэжьагъ МКъТУ-м ипрезидентэу ТхьакIущынэ Аслъан.

Хабзэ зэрэхъугъэу советым зимэфэкIхэм щафэгушIуагъэх. Повесткэ шъхьаIэм къыдыхэлъытагъэу сэнэхьатыр къыхэхыгъэнымкIэ ыкIи апшъэрэ еджапIэм фэзыгъэхьазырыхэрэ Гупчэм ипащэу Олег Франкорэ МКъТУ-м итехнологическэ академие ЦIыкIум ипроектэу «Профильнэ классхэм» язещакIоу Татьяна Деминамрэ докладхэр къашIыгъэх. Сэнэхьатыр къыхэхыгъэнымкIэ IофшIэныр зэрэзэхэщагъэр, сэнаущыгъэ зыхэлъ абитуриентхэр университетым къызэрэращалIэхэрэр ыкIи гъэсэныгъэ программэхэр зэрэлъагъэкIуатэхэрэр ядокладхэм къащыхагъэщыгъэх

Ахэм зэрэхагъэунэфыкIыгъэмкIэ, 2023-2024-рэ еджэгъу илъэсхэм сэнэхьатыр къыхэхыгъэнымкIэ ыкIи апшъэрэ еджапIэм фэгъэхьазырыгъэнхэмкIэ университетым исистемэ хэхьагъэхэр:

— студентхэр-амбассадорхэр егъэджэгъэнхэр ыкIи сэнэхьатхэм яхэхынкIэ факультетхэм Iоф ащягъэшIэгъэныр;

— пчъэ зэIухыгъэмэ я Мафэхэр университетым, ащ икъутамэу Яблоновскэм дэтым, МКъТУ-м и Политехническэ колледж, магистерскэ программэхэм я Мафэ ащызэхэщэгъэнхэр. Iофтхьабзэ пэпчъ, зэрэчIэхьащтхэмрэ ыкIи еджэным Iофэу пылъхэмрэ афэшъхьафэу, IэпэIэсэныгъэ пробэхэр, интерактивнэ площадкэмэ якъэгъэлъэгъонхэр хэтыгъэх. Нэбгырэ 1000-м нахьыбэ ахэм зэлъаубытыгъ, абитуриентхэмрэ яянэ-ятэхэмрэ пэIудзыгъэ шIыкIэмкIэ заявкэхэр къатынхэ алъэкIыгъ;

— университетым и Амбассадорхэм мэкъэгъэIу дэкIыгъохэр ашIыгъэх, ахэм пшъэрылъэу яIагъэр МКъТУ-м нэIуасэ фэшIыгъэнхэр, игъэсэныгъэ программэхэу гъэсэныгъэ организацие 11-мэ зэлъаубытыхэрэмэ ащыгъэгъозэгъэнхэр ыкIи Адыгэ Республикэм ит еджэпIэ 26-рэ, Краснодар краим ирайон благъэхэм ащыIэ гурыт еджэпIэ 17-р къэкIуахьыгъэнхэр, ахэм я 9-11-рэ классхэм ащеджэрэ кIэлэеджэкIо 950-рэ ахэгъэлэжьэгъэныр;

— сэнэхьатхэр къыхягъэхыгъэнхэм фытегъэпсыхьагъэу МКъТУ-м икъутамэу поселкэу Яблоновскэм дэтым ыкIи Политехническэ колледжым экскурсиехэр ащызэхащагъэх. Политехническэ колледжым къычIитIупщыгъэ 248-м щыщэу 109-рэ программэхэу бакалавриатым ыкIи специалитетым ащеджэнхэу аштагъэх. Политехническэ колледжым къычIитIупщыгъэ 270-м щыщэу 55-мэ МКъТУ-м икъутамэу Яблоновскэм дэтым щеджэщтых. А къэгъэлъэгъонхэр 2023-рэ илъэсым елъытыгъэмэ процент 40-кIэ нахьыб;

— къэгъэлъэгъонхэр (3) ыкIи IофшIэпIэ чIыпIэмэ ябэдзэр (5, ащ хахьэх къалэхэу Крымскэ ыкIи Шытхьалэ, поселкэу Мостовскоир);

— гъэсэныгъэ организациехэм язаявкэхэмкIэ IэпэIэсэныгъэ пробэхэр;

— медицинэм иIофышIэ хъущтхэм азыфагукIэ зэнэкъокъоу «Медицинэ эволюциер: Iэзэгъум улъыхъузэ» зыфиIоу я 9-11-рэ класхэм ателъытагъэр, гурыт гъэсэныгъэ ыкIи апшъэрэ гъэсэныгъэ организациехэу медицинскэ сэнэхьатхэр зыгъэхьазырхэрэр;

— инженернэ джэгукIэхэу «ПсэолъэшIхэм я Лигэ» гъэсэныгъэ организациехэм заявкэу къатыгъэхэм ялъытыгъэу;

— МКъТУ-м сэнэхьатхэм хэхъоныгъэ ягъэшIыгъэным и Агентствэ ишапхъэхэмкIэ ЗэIухыгъэ апшъэрэ еджэпIэ чемпионатэу «Профессионал ныбжьыкIэхэр» зыфиIорэм ипрограммэ къыдыхэлъытэгъэ Iофтхьабзэхэр, гъэсэныгъэ организациехэм ыкIи кIэлэеджакIохэм апае (нэбгырэ 145-рэ);

— научнэ-техническэ творчествэу «ШУСТРИК» (кIэлэеджакIоу инновационнэ конструкциехэр зэхэзгъэуцошъурэр) зыфиIорэ Урысые зэнэкъокъум ишъолъыр едзыгъоу Адыгэ Республикэм щыкIуагъэр. (проекти 10 мэхъу, нэбгырэ 17 илъэси 6-м къыщегъэжьагъэу 9-м нэс зыныбжьхэр хэлэжьагъэх);

— кIэлэеджакIомэ апае зэIухыгъэ олимпиадэхэу МКъТУ-м щыкIуагъэхэр (гъэсэныгъэ организацие 31-рэ нэбгырэ 275-рэ хэлэжьагъ). Университетым щызэхащэгъэ олимпиадэхэм ащытекIуагъэхэ нэбгырэ 28-мэ ащыщэу 7-р МКъТУ-м истудент хъугъэх. Олимпиадэмэ язэфэхьысыжьхэм илъэситIум къыкIоцI кIуачIэ яIэу щыт. ГъорекIорэ олимпиадэм щытекIуагъэхэм ащыщэу джыри нэбгыритIу тиуниверситет къычIэхьагъэх;

— кIэлэеджэкIо проектхэм я Урысые зэнэкъокъу (МКъТУ-м 2018-рэ илъэсым къыщегъэжьагъэу регъэкIокIы, ар Перечень мероприятий Министерства просвещения Российской Федерации зыфиIорэм щыщ): Адыгэ Республикэм ыкIи Краснодар краим игъэсэныгъэ гурыт учреждение 14-мэ ащеджэхэрэ кIэлэеджэкIо 67-мэ лъэныкъуитфымэ ателъытэгъэ проект 36-рэ зэнэкъокъум къырахьылIагъ. Зэнэкъокъум щытекIуагъэхэ нэбгырихмэ ядокументхэр МКъТУ-м къыратыгъагъэх. НэбгыритIур студент хъугъэх;

— Урысые проектэу «Неущрэ мафэм ибилет» зыфиIорэм къыдыхэлъытагъэу кIэлэеджэкIо 244-рэ зыхэлэжьэгъэ профессиональнэ пробэхэмкIэ сыхьат 60 лъэныкъуи 9-м афытегъэпсыхьагъэхэу;

— Урысые гъэсэныгъэ инициативэм къызэритырэм тетэу проект 26-рэ щыIэ хъугъэ, ахэмэ «Сириус.Гъэмафэр: уипроект егъажь» зыфиIорэм игъэсакIохэр ары япащагъэхэр. Хэлэжьагъэ пчъагъэмкIэ Урысыем ишъолъыр анахь дэгъу 12-мэ Адыгэ Республикэр ахэфагъ — я 11-рэ чIыпIэр ыубытыгъ;

— ыпкIэ хэмылъэу апшъэрэ еджапIэм зыщыфагъэхьазырхэрэ курсхэр дисциплинэ 12-кIэ (сыхьат 40) гурыт профессиональнэ гъэсэныгъэ зиIэу къычIахьэхэрэм ыкIи хэушъхьафыкIыгъэ категориехэм апае. Нэбгыри 129-м щыщэу 31-р университетым истудент хъугъэх;

— МКъТУ-м итехнологическэ академие ЦIыкIум ипроектэу «Профильнэ классхэр» 2016-рэ илъэсым къыщыублагъэу Адыгэ Республикэм ит гъэсэныгъэ организацие 22-мэ ащагъэцакIэ (я 7-11-рэ классхэм ащеджэрэ кIэлэеджэкIо 355-рэ) зэдэлэжьэныгъэмкIэ зэзэгъыныгъэу щыIэм елъытыгъэу, ар схемэу «еджапIэр-апшъэрэ еджапIэр» зыфиIорэм тетэу мэлажьэ, практикэ-ориентированнэ предметнэ гъэсэныгъэу элективнэ курсхэм ыкIи урокхэм ямыпхыгъэ IофшIэнхэу профильнэ классхэм ащагъэцакIэхэрэр (инженернэ-технологическэхэр, медикэ-фармацевтическэхэр, химическэ-биологическэхэр, экологэ-биологическэхэр, социальнэ-экономическэхэр, мэкъу-мэщ-технологическэхэр). Мы проектым хэлажьэрэ нэбгырэ 84-рэ МКъТУ-м джы истудентых;

— IэпэIэсэныгъэ егъэджэнхэр МКъТУ-м итехнологическэ академие ЦIыкIум ипроектэу «Профильнэ классхэр» зыфиIорэмкIэ программи 3-м телъытагъэхэу: «Младшая медицинская сестра по уходу за больными», «Консультант в области развития цифровой грамотности населения (цифровой куратор)», «Пчеловод» зыфиIохэрэр. КIэлэеджэкIо 31-мэ аттестациер дэгъу дэдэу акIугъ ыкIи рабочэ сэнэхьат зэрэзэрагъэгъотыгъэмкIэ Свидетельствэхэр аратыгъэх (къулыкъушIэ IэнатIэ яIэу);

— информационнэ IэпыIэгъоу: непэрэ уахътэм агъэфедэрэ зэпхыныгъэ шIыкIэхэр, социальнэ хъытыухэр, зэфэшъхьаф информационнэ материалхэм якъыдэгъэкIын, ащ къегъэлъагъо университетыр зэрэзэIухыгъэр, информациеу абитуриентхэм ыкIи ны-тыхэм ящыкIагъэхэм зэрэщамыгъакIэхэрэр.

Ушэтынэу зэхащагъэхэм къызэрагъэлъэгъуагъэмкIэ, университетым исайт мэхьанэшхо зиIэ информационнэ канал хъугъэ, 2022-рэ илъэсым проценти 3,5-мэ ащ къэбарыр къырахыщтыгъэмэ, а пчъагъэр 2024-рэ илъэсым процент 26-м нэсыгъ. ГъорекIорэ илъэсым елъытыгъэмэ, сайтым хахьэрэр фэдитIукIэ нахьыбэ хъугъэ.

МКъТу-м къычIахьэ зышIоигъоу документхэр къэзытыгъэхэр 2024-рэ илъэсым нэбгырэ 3535-м кIэхьагъ, ар процент 14,5-кIэ 2023-рэ илъэсым нахьыб, ащ къегъэлъагъо сэнэхьат къыхэхыным фэгъэхьыгъэ Iофтхьабзэу рагъэкIокIыгъэмэ яшIуагъэ къызэрэкIуагъэр. Iофтхьабзэхэм афэгъэхьыгъэ макъэр зэрагъэIурэр зылъэгъурэр процент 71-м шъхьадэкIы, ахэм къыхагъэщыгъ зэIукIэхэм икъун къэбар зэрэхахыгъэр, процент 57-мэ ахэм яшIуагъэкIэ сэнэхьатыр къызэрэхахышъугъэр къаIуагъ. Нэбгырэ 178-мэ зэIукIэгъухэм ауж зэпхыныгъэ университетым къыдашIыгъ, 51-мэ заявкэхэр еджэнхэу къатыгъэх, 33-р студент хъугъэх. Абитуриентхэр къызэрэращалIэхэрэр, егъэджэн программэхэм зэращагъэгъаузэхэрэм ишIогъэшхо къызэрэкIорэр мы пчъагъэхэм къагъэлъагъо.

Экономикэм ыкIи юриспруденцием яинформационнэ системэхэм яфакультет идеканэу Дэргушао Асият магистерскэ программакIэу «Юриспруденциер» зыфиIорэр къызэрэзэIуахырэм къытегущыаIгъ. Программэм игъэцэкIэн сетевой шапхъэм илъэу ыкIи Московскэ къэралыгъо юридическэ университетэу О.Е. Кутафиным ыцIэ зыхьырэм игъусэхэу агъэцакIэ — апшъэрэ юридическэ еджэпIэ пэрытэу хэгъэгум итым.

Iофыгъоу «МКъТУ-м икъутамэу поселкэу Яблоновскэм дэтым игъэсэныгъэ программэу 08.03.01 ПсэолъэшIыныр («Промышленнэ ыкIи гражданскэ псэолъэшIыныр зыфиIорэ лъэныкъор») ыкIи гурыт профессиональнэ гъэсэныгъэу сэнэхьатэу 08.02.01 «ПсэолъэшIыныр ыкIи унэхэмрэ псэупIэхэмрэ ягъэфедэн» зыфиIохэрэмкIэ къэгущыIагъ МКъТУ-м икъутамэу поселкэу Яблоновскэм дэтым ипащэ. Шъолъырыр псэолъэшIын отраслэм щылэжьэщт специалистхэм зэращыкIэрэм, социальнэ-экономическэ хэхъоныгъэ ащ егъэшIыгъэныр зэрелъытыгъэм къыпкъырыкIыгъэх мы унашъом иштэн.

ШIэныгъэлэжьхэм ясовет иIофшIэн къыдыхэлъытагъэу къэгущыIагъэх Медицинскэ институтым ипащэу НамытIэкъо Хьазрэтрэ инженернэ факультетым идекан IэнатIэ ипшъэрылъхэр зыгъэцакIэрэ Мэрэтыкъо Муратрэ, доцентыцIэ зыфагъэшъошэнэу агъэнэфэгъэ кандидатхэр ахэм къагъэлъэгъуагъэх:

— Беслъангъур Заремэ — сэнэхьатэу 3.1.4 «Акушерствэр ыкIи гинекологиер» зыфиIорэмкIэ кандидат. Акушерствэм ыкIи гинекологием икафедрэ идоцентэу Iоф ешIэ, шIэныгъэ-кIэлэегъэджэ Iофыр илъэс 15 хъугъэу егъэцакIэ, шIэныгъэ IофшIэгъэ 25-рэ иI, ащ щыщэу 2-р егъэджэн тхылъых ыкIи 3-р научнэ статьяхэу рецензие зыпылъ журналхэм къащыхиутыгъэх.

— Къохъужъ Риммэ — сэнэхьатэу 2.8.4 «ЧIыдагъэр ыкIи гъэстыныпхъэ шхъуантIэр зычIэлъхэм якъыхэгъэщын ыкIи ягъэцэкIэн» зыфиIорэмкIэ кандидат. Научнэ-кIэлэегъэджэ IофшIэным зыхэтыр илъэс 19 хъугъэ. Ар шIэныгъэ IофшIагъэ 28-мэ яавтор. Ащ щыщэу 2-р егъэджэн тхылъых, 3-р статьяхэу рецензие зыпылъ журналхэм аужырэ илъэсищым къащыхиутыгъэх.

МКъТУ-м ишIэныгъэлэжьхэм ясовет хэтхэм къагъэлъэгъуагъэхэм яIэпэIэсэныгъэ ин къыхагъэщыгъ, научнэ IофшIэнышхо зэрагъэцакIэрэр къаIуагъ ыкIи кандидатхэм адырагъэштагъ

Бюджетнэ-социальнэ комиссием иамалхэм зягъэушъомбгъугъэн зэрэфаем къытегущыIагъ юридическэ отделым ипащэу Татьяна Глебовар. ХэушъхьафыкIыгъэ дзэ операцием фэгъэхьыгъэ Iофтхьабзэу зэрахьэрэмэ материальнэ IэпыIэгъу ятыгъэным ар фэгъэхьыгъагъ. Мылъкур ХэушъхьафыкIыгъэ дзэ операцием хэлажьэрэмэ яунагъохэм, социальнэ программэхэм, ветеранхэм апаIуагъэхьащт.

Университетым щеджэрэ студентмэ яеджапкIэ къегъэIыхыгъэным фэгъэхьыгъэ упчIэм зэхэсыгъом ыкIэм тегущыIагъэх.

ШIэныгъэлэжьхэм ясовет иIофшIэн къыщаIэтыгъэ упчIэхэр зэкIэ зэхафыгъэх, ахэмкIэ унашъохэр аштагъэх.