Мыекъопэ къэралыгъо технологическэ университетым и «Точка кипение» проектнэ-гъэсэныгъэ интенсивэу Университет 20.35-м ибжыхьэ ор хэлажьэхэрэ командэмэ ястуденческэ проект анахь дэгъухэм я Демо-мафэ рагъэкIокIыгъ.

МКъТУ-м истудентхэр, гъэсакIохэр ыкIи кIэлэегъаджэхэр зыхэхьагъэхэ командипшI практикэ-ориентированнэ гъэсэныгъэ программэу Университет 20.35-м хэлэжьагъэх, технологическэ, социальнэ ыкIи коммерческэ проектхэм Iоф адашIагъ. Пшъэрылъ шъэхьаIэу программэм иIагъэхэр апэрэ шIыгъом диштэхэрэр гъэпсыгъэнхэр, бизнесымрэ обществэмрэ ягумэкIыгъохэр ахэмкIэ зэшIохыгъэнхэр ары.

Интенсивым ипрограммэ къыдыхэлъытагъэу Iоныгъо мазэм къыщыублагъэу тыгъэгъазэм нэс студентмэ гъэсэныгъэ программэр акIугъ, междисциплинарнэ командэмэ ахэтхэу технологическэ, коммерческэ ыкIи социальнэ проектхэм Iоф адашIагъ. ахэмэ уахътэри, ахъщэри, псауныгъэри къыпфагъанэ. Проектхэр студентмэ ежь-ежьырэу къаугупшысыгъэх, унэе прототипхэр ашIыгъэх, бизнес-гъусэгъоу яIэмэ къагъэуцугъэ пшъэрылъмэ язэшIохыни дэлэжьагъэх.

Командэ пэпчъ пшъэрылъэу иIэр — гукъэкIым къыщегъэжьагъэу Iоф зышIэрэ апэрэ шIыгъом нэсынхэр ары. Проектыр Интенсивым щагъэцакIэзэ, Iоф зышIэрэ прототипыр зэрагъэпсыщтым студентхэр пылъых, ащ елъытыгъэу яIэпэIэсэныгъи хагъэхъуагъ, сэнэхьатэу хахыгъэми нахь фэнэIуасэ хъугъэх. Интенсивыр адрэхэм зэратекIырэр, ежь командэмэ ашIэщтыр ежь-ежьырэу агъэнафэ, курсэу зыщеджэщтхэр, мастер-классхэр.

Интенсивыр макIофэ, едзыгъо-едзыгъоу командэмэ ахэтхэм проектхэр агъэцакIэщтыгъэ ыкIи экспертхэмрэ трекерхэмрэ зэIукIэгъуищэу адыряIагъэхэм къащагъэлъагъощтыгъэх: краш-тестыр; мастерскоеу концепциехэм зыщыдэлажьэхэрэм; экспертмэ ятрубэ. Университет 2035-м иэкспертхэр, итрекерхэр, гъэсакIохэр ыкIи специалистхэр ары Интенсивым хэлажьэхэрэм IэпыIэгъу къафэхъущтыгъэхэр. Зыдэлэжьагъэхэ прототипхэу экспертмэ нахь осэшхо зыфашIыгъэхэр: FoodNet (шхыныгъохэр ыкIи мэкъу-мэщ технологиехэр), EduNet гъэсэныгъэр), HealthNet (медицинэр), WearNet (щыгъынмэ ядын), SportNet, гупсэф псэукIэр, IT-къэшIыгъор ыкIи нэмыкIхэр.

Технологическэ гукъэкIхэм ялъытыгъэу комерческэ шIыкIэхэмкIэ Интенсивым хэлажьэрэ командэмэ агъэпсыгъэхэр — уплъэкIунымкIэ интеллектуальнэ системэр ыкIи пилот зэрымыс быбырэ аппаратхэр гъэIорышIэгъэнхэр (экономикэм ыкIи юриспруденцием яинформационнэ системэхэм яфакультет); чIыдагъэхэр укъэбзыгъэнхэмкIэ инновационнэ шIыкIэу щыIэхэр (МКъТУ-м икъутамэу пос. Яблоновскэм дэтыр); психобиотикхэр гъэфедэгъэнхэмкIэ чатботхэр (лечебнэ факультетыр); финансовэ шIэныгъэм фезыгъаджэхэрэ курсыр (экономикэм ыкIи гъэIорышIэным яфакультет); «щынэгъончъэ телъашъоу» мыстырэ материалым хэшIыкIыгъэр (экологическэ факультетыр); лъэкъо кIышъом щафэрэ кремым ирецептурэ изэхэгъэуцон (фармацевтическэ факультетыр); пластикэмрэ тхьапэмрэ якъыдэгъэкIыжьын (МКъТУ-м и Политехническэ колледж); хьалыгъум игъэжъэн технологиехэр (мэкъу-мэщ технологиехэм яфакультет); электроэнергиер зыпкъ изыгъэуцохэрэ нэмыкI шIыкIэхэр къэгъотыгъэнхэр (инженернэ факультетыр); портулакыр промышленнэу къыдэгъэкIыгъэныр (технологическэ факультетыр).

«ФудСовет — ар неущырэм ишхыныгъу» зыфиIорэ пшъэрылъэу агъэцэкIэнэу къафагъэнэфагъэм джырэкIэ дэлажьэх. Мызыгъэгум командитIумэ шхыныгъохэр кIэлэцIыкIумэ ыкIи нахьыжъмэ апае агъэхьазырыгъэх. Проектхэр: «Разработка жизнеспособного полезного продукта питания на основе неинтрузивный анализов с целью восполнения микроэлементов у потребителей для успешного фуд-стартапа» (технологическэ факультет); «Микроэлементхэр зыхэлъ фито-щаим изэхэугъоен» (педиатрическэ факультет).

Интенсивыр — ар программэу урысые апшъэрэ еджапIэмэ илъэсым тIо ащырагъэкIокIырэ Iофтхьабз — гъатхэмрэ бжыхьэмрэ. 2018-рэ илъэсым къыщыублагъэу проектнэ-гъэсэныгъэ интенсивэу 12 атIупщыгъ. МКъТУ-р мыщ 2022-рэ илъэсым къыщегъэжьагъэу хэлажьэ, операторэу иIэр «Точка кипениер» ары. Ащ икомандэкIэ мыр яхэнэрэ тIупщыгъу. Университетымрэ студентхэмрэ федеральнэ программэм ыпкIэ хэмылъэу хэлажьэх.

Экспертмэ ахэтых пащэхэр, шIэныгъэлэжьхэр ыкIи сатыушIэхэр: «Точка кипением» и АНО «Платформа НТИ» зыфиIорэм хэхъоныгъэ егъэшIыгъэнымкIэ иотдел ипащэ игуадзэу, стратегическэ гукъэкIмэ я Агентствэ иобщественнэ лIыкIоу Арем Артамкиныр; медиаэкспертэу илъэс 25-рэ къэбар жъугъэм иамалхэм ащылэжьагъэу, радиостанциехэу Маяк ыкIи Радио России зыцIэхэм язещакIоу, бизнес-тренерэу, «Мой бизнес Адыгея» зыфиIорэм игъусэгъоу, ICF-м ипрофессиональнэ коучэу Ольга Величкинар; цифровизациемкIэ МКъТУ-м ипроректорэу Дмитрий Игнатовыр; экологическэ факультетым идеканэу Галина Коноваловар; маркетингым, сервисым ыкIи туризмэм якафедрэ идоцентэу, ТК-м ипрограммнэ пащэу Светлана Новиковар; сэнэхьатыр къыхэхыгъэнымкIэ ыкIи апшъэрэ еджапIэм фэгъэхьазырыгъэнхэмкIэ Гупчэм ипащэу Олег Франко; Урысые обществэу «ШIэныгъэм» икъутамэу Адыгэ Республикэм щыIэм ипащэу Галина Измайловар; рекламнэ агентствэу «ВREND» зыцIэм игенеральнэ пащэу, информационнэ политикэмкIэ МКъТУ-м иректор иупчIэжьэгъоу Анастасия Хажгериевар; Мыекъопэ къэзэкъ обществэм иатаман иIэпыIэгъоу Анастасия Нетребинар; ООО «Красота» ипащэхэу ыкIи иIофышIэхэу, сатыушIэхэу Къохъужъ Саид, Сергей Бабиныр, Анастасия Христенко ыкIи Валерий Немыкиныр.