Непэ Мыекъопэ къэралыгъо технологическэ университетым я VIII-рэ Дунэе шIэныгъэ-практическэ конференциеу «Мэкъу-мэщ промышленнэ комплексым фэгъэхьыгъэ наукэр, гъэсэныгъэр ыкIи инновациехэр» зыфиIорэр щыкIуагъ. А Iофтхьабзэм нэбгырэ 200-м ехъу ыугъоигъ, ахэр Урысыем ыкIи Беларусым къарыкIыгъэх, научнэ сообществэм, бизнесым, хабзэ органхэм ыкIи гъэсэныгъэ учреждениехэм ялIыкIох.

ШIуфэс гущыIэхэмкIэ къэзэрэугъоигъэхэм закъыфигъэзагъ научнэ IофшIэнымкIэ ыкIи инновацие хэхъоныгъэхэмкIэ МКъТУ-м ипроректорэу Татьяна Овсянниковам. Ащ игущыIэхэм къахигъэщыгъ наукэмрэ гъэсэныгъэмрэ производствэм епхыгъэ шъыпкъэ зэрэхъугъэхэр, мэкъу-мэщ промышленнэ комплексым хэхъоныгъэ егъэшIыгъэным зэрэдэлажьэхэрэр. Мэкъу-мэщым ылъэныкъокIэ къэралыгъо зэдэлэжьэныгъэм мэхьанэу иIэри проректорым къыкIигъэтхъыгъ.

Конференциер зэрищагъ мэкъу-мэщ технологиехэм яфакультет идеканэу Шъхьапэцэ Аслъан. Мыщ фэдэ Iофтхьабзэмэ яшIуагъэкIэ шIэныгъэлэжьхэмрэ бизнесым илIыкIохэмрэ опытэу аIэкIэлъхэмкIэ зэрэзэхъожьхэрэр, къэралыгъо зэдэлэжьэныгъэр агъэпытэн зэралъэкIырэр ащ къыIуагъ.

Урысыем ыкIи Беларусым ялIыкIохэр конференцием хэлэжьагъэх, ахэм ащыщхэр: мэкъу-мэщымкIэ Адыгэ Республикэм и Министрэ иапэрэ гуадзэу Сергей Шопиныр; гъэсэныгъэмрэ шIэныгъэмрэкIэ АР-м и Министрэу Евгений Лебедевыр; Беларусым шIэныгъэ IофшIэнымкIэ НАН-м ипащэ игуадзэу Дмитрий Лужинскэр; РАН-м иакадемикэу, Урысые Правительствэм ипремие илауреатэу Шэуджэн Асхьад; профессорэу, «Псауныгъэм фытегъэпсыхьэгъэ шхыныгъохэр» зыфиIорэ технологическэ платформэм ипащэу Алексей Журавлевыр. 
 Дунэе конференцием анахь шъхьаIэхэу секцииплI хэтыгъэр, ары пэпчъ мэкъу-мэщ промышленнэ комплексым хэхъоныгъэ егъэшIыгъэным, иIофыгъо шъхьаIэхэм афэгъэхьыгъагъ. Ахэмэ ахэлажьэрэмэ доклад 50-м ехъу къашIыгъ, опытэу аIэкIэлъхэмкIэ зэхъожьынхэу амал яIагъ, тапэкIэ зэрэзэдэлэжьэщтхэр рахъухьагъэх.

Секциеу «Мэкъу-мэщ промышленнэ комплексым игумэкIыгъохэр ыкIи игугъапIэхэр» зыфиIорэм ипащагъэр мэкъу-мэщ шIэныгъэхэмкIэ докторэу Мамсыр Нурбый ары. Ом изытетэу зэхъокIырэм, инновационнэ агротехнологиеу кIэу агъэфедэхэрэм афэгъэхьыгъэ темэхэм атегущыIагъэх. Техническэ шIэныгъэхэмкIэ докторэу Хьаткъо Зурет секциеу «Мэкъу-мэщ продукциер къыдэгъэкIыгъэныр ыкIи ухъумэгъэныр» зыфиIорэр зэрищагъ. Секциеу «ЧIыгугъэпсыныр: кадастрэр ыкIи чIыгу Iахьхэр уплъэкIугъэнхэр» зыфиIорэр зэрищагъ биологие шIэныгъэхэмкIэ докторэу Iэшъынэ Юныс. «Мэкъу-мэщ промышленнэ комплексым хэхъоныгъэ егъэшIыгъэным экономическэ лъапсэу иIэр ыкIи экологическэ щынэгъончъэу хэлъыр» зыфиIорэ секциер резгъэкIокIыгъэр экономикэ шIэныгъэхэмкIэ кандидатэу  Ирина Селивановар ары.

Мэкъу-мэщ секторыр непэрэ лъэхъаным къыздихьырэ зэхъокIныгъэхэм, ом изытет зызэрэзэблихъурэм, экспортым агъакIорэм зэрэхагъахъорэм ялъытыгъэу зэрагъэпсыщтым конференцием щытегущыIагъэх, а Iофыгъохэр лъапсэ фэхъугъэх.