Гъэлъэшыгъэ шIыкIэу «ГукъэкIым къыщегъэжьагъэу пэчIынатIэм нэсэу» Университет 2035-рэ зыфиIорэм студентхэмрэ гъэсакIохэмрэ хэгъэлэжьэгъэнхэм фэгъэхьыгъэ IофшIэныр Мыекъопэ къэралыгъо технологическэ университетым и «Точка кипение» лъегъэкIуатэ.

Проектнэ командэмэ зичэзыу ушэтынхэр акIугъэх — экспертмэ я Трубэ. МКъТУ-м истудентмэ ягъусэхэу Урысыем иапшъэрэ еджапIэ 194-мэ якомандэ 290-рэ Iофтхьабзэм хэлэжьагъэх. А едзыгъом ехъулIэу ушэтынхэм япхыгъэ IофшIэнхэр командэмэ аухыгъагъэх, пшъэрылъыкIэу яIэхэр зэрагъэшIагъэх, пэчIынатIэмэ ягъэхьазырын фежьагъэх.

МКъТУ-м икомандэ иIофтхьабзэ проектхэм лъэтегъэуцохэр щафашIыгъэх, отраслевой экспертмэ технологическэ ыкIи экономическэ лъэныкъохэр зэрагъэцэкIэщтхэр зэхафыгъэх. КIалэмэ джэнджэш дэгъухэр агъотыгъэх гукъэкIхэм, пэчIынатIэхэм Iоф адашIэнэу, видеоролик тырахынэу, федеральнэ лъэгапIэм нэсэу япроектхэр инвесторхэм арагъэлъэгъунхэу.

Технологическэ гукъэкIмэ язэхэгъэуцонкIэ коммерческэ лъэныкъохэм ащыщэу тистудентмэ къыхахыгъэр уплъэкIунымкIэ интеллектуальнэ системэр ыкIи пилот зэрымыс быбырэ аппаратхэр гъэIорышIэгъэнхэр (экономикэм ыкIи юриспруденцием яинформационнэ системэхэм яфакультет); чIыдагъэхэр укъэбзыгъэнхэмкIэ инновационнэ шIыкIэу щыIэхэр (МКъТУ-м икъутамэу пос. Яблоновскэм дэтыр); психобиотикхэр гъэфедэгъэнхэмкIэ чатботхэр (лечебнэ факультетыр); финансовэ шIэныгъэм фезыгъаджэхэрэ курсыр (экономикэм ыкIи гъэIорышIэным яфакультет); «щынэгъончъэ телъашъоу» мыстырэ материалым хэшIыкIыгъэр (экологическэ факультетыр); лъэкъо кIышъом щафэрэ кремым ирецептурэ изэхэгъэуцон (фармацевтическэ факультетыр); пластикэмрэ тхьапэмрэ якъыдэгъэкIыжьын (МКъТУ-м и Политехническэ колледж); хьалыгъум игъэжъэн технологиехэр (мэкъу-мэщ технологиехэм яфакультет); электроэнергиер зыпкъ изыгъэуцохэрэ нэмыкI шIыкIэхэр къэгъотыгъэнхэр (инженернэ факультетыр); портулакыр промышленнэу къыдэгъэкIыгъэныр (технологическэ факультетыр).

«ФудСовет — ар неущырэм ишхыныгъу» зыфиIорэ пшъэрылъэу агъэцэкIэнэу къафагъэнэфагъэм джырэкIэ дэлажьэх. Мызыгъэгум командитIумэ шхыныгъохэр кIэлэцIыкIумэ ыкIи нахьыжъмэ апае агъэхьазырыщтых. Проектхэр: «Разработка жизнеспособного полезного продукта питания на основе неинтрузивный анализов с целью восполнения микроэлементов у потребителей для успешного фуд-стартапа» (технологическэ факультет); «Микроэлементхэр зыхэлъ фито-щаим изэхэугъоен» (педиатрическэ факультет).

Анахь пшъэрылъ хьылъэу ыкIи мэхьанэ зиIэу командэмэ агъэцэкIагъэмэ ащыщыгъ аштэгъэхэ сценариер къатхыхьанышъ, ар ялъапсэу хэхъоныгъэхэр фашIынхэр ары.

ШэкIогъум и 29-м МКъТУ-м и «Точка кипение» зэхищэщт Демо-мафэм нэс командэмэ мыщ фэдэ лъэубэкъухэр акIунхэ фае: прототипированиер, тестированиер, зэпхыныгъэу къэзгъэзэжьырэр, IофшIэныр гъэцэкIэжьыгъэныр. Университет 2035-м ишIыкIэхэмкIэ студентмэ а зэкIэлъыкIуакIэр гъогогъу пчъагъэрэ кIашIыкIыжьыщт, ар къядэIухэрэм алъагъэIэсыфэ нэс.

Шъугу къэдгъэкIыжьын, Университет 2035-рэ зыфиIорэм гъэлъэшыгъэ шIыкIэм МКъТУ-кIэ иоператор — «Точка кипением» икомандэ хэтхэр: маркетингым, сервисым ыкIи туризмэм якафедрэ идоцентэу, программнэ пащэу Светлана Новиковар; научнэ IофшIэнымкIэ гъэIорышапIэм иIофышIэу, администраторэу Мария Тамахинар.