Сэнэхьатхэм якъыхэхынкIэ апэрэ дэкIыгъо хъугъэ-шIагъэу «Гъэхъагъэхэм ягъунапкъэхэр: МКъТУ-м уригъусэу неущрэ мафэм икартэ гъэпсы» зыфиIорэм иапэрэ тхьамафэ кIэм фэкIуагъ.

Iофтхьабзэм ипшъэрылъыр — кIэлэеджакIохэр къэкIощт уахътэм зэрылэжьэщтхэ сэнэхьатыр къыхахынымкIэ IэпыIэгъу афэхъугъэныр ыкIи университетым къапигъохырэ амалхэм нэIуасэ афэшIыгъэнхэр ары.

Мыекъопэ къэралыгъо технологическэ университетым икомандэ хэтхэмрэ сэнэхьатхэр къыхягъэхыгъэнымкIэ ыкIи апшъэрэ еджапIэм фэгъэхьазырыгъэнхэмкIэ Гупчэм ипащэу Олег Франкорэ гъэсэныгъэ учрежениехэмрэ культурнэ гупчэхэмрэ къакIуахьыгъэх. Ахэм ащыщыгъэх станицэу Дондуковскэм дэт еджапIэу №10-р, станицэу Джаджэ игурыт еджапIэу №4-р, Хьакурынэхьаблэ дэт еджапIэу №1-р, Лабинскэ районым культурэмкIэ и Унэ ыкIи станицэу Пластуновскэм и Культурнэ-зыгъэпсэфыпIэ объединение.

ЗэIукIэ пэпчъ программэу яIагъэхэр баигъэх, къэбарыбэ къыздахьыщтыгъэ. МКъТУ-м сэнэхьатэу щызэрагъэгъотыхэрэр, ащ учIэхьаным пае анахьэу унаIэ зытеудзэнэу щытхэр, егъэджэн процессым ямышIыкIэу щагъэфедэхэрэр ыкIи нэмыкIыбэхэр кIэлэеджакIохэм зэрагъэшIагъ. Университетым фэгъэхьыгъэ кинофильмэу къагъэлъэгъуагъэм студенческэ щыIакIэр къыIотагъ. Непэрэ инфраструктурэу щагъэфедэрэр, лабораториеу иIэхэр, проектэу щызэхагъэуцохэрэр ащ къыщагъэлъэгъуагъэх, ар кIэлэеджакIомэ лъэшэу ашIогъэшIэгъон хъугъэ. Дзэ егъэджэн гупчэу МКъТУ-м къыщызэIуахыгъэм лъэшэу анаIэ тырадзагъ, университетым зэрэчIэсхэу дзэ ухьазырыныгъэ зэрагъотыщтыр бэмэ агу рихьыгъ. Ащ фэшъхьафэу, зэнэкъокъухэм, олимпиадэхэм текIоныгъэ къащыдэзыхырэмэ чIэхьэгъу баллхэр зэрафыхагъэхъощтыхэри агурагъэIуагъ.

ЗэIукIэ пэпчъ къэгъэлъэгъонхэу университетым игъэхъагъэхэр къзщыраIотыкIыхэрэр ащагъэуцугъэх, упчIэу къатырэмэ джэуапхэр щаратыжьыгъэх.

Мыщ фэдэ зэIукIэхэм яшIуагъэкIэ кIэлэеджакIомэ нахь къэбарыбэ ашIэ университетым фэгъэхьыгъэу, сэнэхьатэу къыхахыщтым регъэгупшысэх.

Проектэу «Гъэхъагъэм игъунапкъэхэр» зыфиIорэм изэIукIэхэр джыри лъагъэкIотэщтых, ащ шъолъырыкIэхэр зэлъырагъэубытыщтых. Мыекъопэ къэралыгъо технологическэ университетыр хэхъоныгъэ зышIынэу фаехэмкIэ, сэнэхьат дэгъу зэзыгъэгъоты зышIоигъохэмкIэ IэпыIэгъушIоу щыт.