Мыекъопэ къэралыгъо технологическэ университетым психологием и Тхьамафэ щызэфашIыжьыгъ, ар психологическэ къулыкъум ипащэу, психологическэ шIэныгъэхэмкIэ кандидатэу Людмила Красновам зэхищэгъагъ.

Iофтхьабзэр лъэшэу кIэлэегъаджэхэми студентхэми ашIогъэшIэгъоныгъ, психологическэ темэ зэфэшъхьафхэр ащ къыщаIэтыгъэх, цIыфым идунэе зэхашIэ, ыгу икъэIэтын, рэхьатныгъэ иIэным нахьыбэрэр афэгъэхьыгъагъ.

Анахь хъугъэ-шIэгъэ инэу ахэтыгъэр лекциеу «ЩыIэныгъэм узэрэщыпытэщтыр: къиныгъо чIыпIэмэ уакъызэрикIыжьыщтыр» зыфиIорэр ары, МКъТУ-м и Политехническэ колледж иIофышIэхэмрэ истудентхэмрэ ар зэхащагъ. Лекцием ишIуагъэкIэ, къиныгъохэр зэрэзэпыпчыщтхэр, непэрэ дунаим узэрэхэгъозэщтыр хэлэжьагъэмэ зэхашIагъ.

Программэм мэхьанэ ащыратыгъ тренингхэм ыкIи практическэ гъэцэкIэнхэм, ахэм ащыщыгъэх — IофышIэхэмрэ студентхэмрэ рагъэкIокIыгъэ тренингэу «Психологическэу зыщызыууптхыкIыщт мафэр» зыфиIорэр. IофшIэгъухэм цыхьэ ыкIи шъхьэкIэфэныгъэ афэпшIыным ащ фищагъэх.

Студентхэри ауж къинагъэхэп: тренингэу «ШIошIхэм ялэгъупкъопс» зыфиIорэр щыIэныгъэм ущыпытэным, зэдэгущыIэным шIуагъэ хэпхэу упсэуным фэгъэхьыгъагъ.

Ащ фэшъхьафэу, тхьамафэм къыдыхэлъытагъэу акциеу «НахьышIум зытебгъэпсыхьаныр» зыцIэр рагъэкIокIыгъ, джащ фэд психологическэ хьакIэщэу «Пшэхъоцэ пшысэр». Ахэм яшIуагъэкIэ мыщ хэлажьэрэмэ яцIыфыгъэ зытет, зыгъэрэхьатыжьыным пылъ шапхъэхэр ашIагъэх.

Тренингэу «Iэгушъом илиниехэр» зыфиIоу IофшIакIохэм ыкIи кIэлэегъаджэхэм афэгъэхьыгъагъэр гъэхъагъэхэр зэрэпшIышъущтхэм къатегущыIагъ, акциеу метафорическэ картэхэр зыхэтхэм бэмэ агухэр къыIэтыгъэх, ыгъэчэфыгъэх, къаготмэ акъыл къадагъотыным фэIорышIагъ.

Психологием и Тхьамафэ къыдыхэлъытагъэу тренингитIу мэхьанэ зиIэхэу зэхащагъэх. Психологическэ тренингэу «НэмыкIхэм апае сызфэсакъыжьы» зыцIэм философием, социологием ыкIи педагогикэм якафедрэ идоцентэу ЛэупэкIэ Фатим ары икIэщэкIуагъэр. Кафедрэм идоцентэу Пафифэ Бэлэ кIэлэегъаджэмэ апае тренингэу «Психологическэу зыщызыууптхыкIыщт мафэр» зэхищагъ.

Мыекъопэ къэралыгъо технологическэ университетым психологием и Тхьамафэу щыкIуагъэм къыгъэлъэгъуагъ цIыфым ипсауныгъэ психоэмоциональнэ екIолIакIэу фыриIэм мэхьанэшхо зэриIэр.