Мыекъопэ къэралыгъо технологическэ университетым Iэнэ хъураеу «Агъэфедэрэ товармэ ядэгъугъэрэ ящынэгъончъагъэрэ гъэнэфэгъэнхэмкIэ техническэ гъэIорышIэным мэхьанэу ратырэр» зыфиIорэр щыкIуагъ.

Стандартизацием, метрологием ыкIи товарнэ экспертизэм якафедрэ кIэщакIо Iофтхьабзэм фэхъугъ. Промышленностым илъэныкъо зэфэшъхьафхэм, стандартизацием ыкIи сертификацием афэгъэхьыгъэ гумэкIыгъохэр повесткэм хэтыгъэх. Ахэр ары агъэфедэрэ товармэ ядэгъугъэ къэзгъэнафэхэрэр.

Стандартизацием, метрологием ыкIи товарнэ экспертизэм якафедрэ ипащэу, техническэ шIэныгъэхэмкIэ кандидатэу, доцентэу Тазэ Зарет шIуфэс псалъэ къышIыгъ. Ащ къыхигъэщыгъ техническэ гъэIорышIэнымрэ стандартизациемрэ хэгъэгум къыщыдагъэкIырэ продукцием идэгъугъэ къэIэтыгъэнымкIэ мэхьанэшхо зэряIэр.

Ащ ыуж докладхэр къашIыгъэх профильнэ организациехэм ялIыкIохэм ыкIи кафедрэмэ якIэлэегъаджэхэм: ООО «Экспертиза» зыфиIорэм ипащэу ПэкIэшх Заремэ; кафедрэм идоцентэу, экономикэ шIэныгъэхэмкIэ кандидатэу Мыгу Иринэ, докладэу «Цифрэ трансформациер менеджментым идэгъугъэ зэрелъытыгъэр» зыцIэр ащ къышIыгъ; техническэ шIэныгъэхэмкIэ кандидатэу, доцентэу Людмила Лунинар, докладэу «Стандартизациеу кондитерскэ изделиемэ яIэр: гумэкIыгъохэр ыкIи ахэм язэшIохын» зыфиIорэр къышIыгъ; социологие шIэныгъэхэмкIэ кандидатэу, кафедрэм идоцентэу Блэгъожъ Замирэ, ащ докладэу къышIыгъэр: «Гъомлэпхъэ щынэгъончъэным икультурэ: урысые компаниехэм яопыт»; мэкъу-мэщ шIэныгъэхэмкIэ кандидат, доцент, «Стандартизацир техническэ гъэIорышIэным зэрэхэлажьэрэр»; техническэ шIэныгъэхэмкIэ кандидатэу, доцентэу КIыкI Саидэ, ащ докладэу «Стандартизацием илъэпкъ системэ ицифрэ трансформацие иедзыгъуакI» зыцIэр къышIыгъ; техническэ шIэныгъэхэмкIэ кандидатэу, доцентэу АкIэгъу Заремэ «Стандартизацием инормативнэ базэ нахьышIу шIыгъэным пылъ гумэкIыгъохэр» зыфиIорэр къышIыгъ.

ЗытегущыIэгъэхэ Iофыгъохэм ащыщыгъ нормативнэ базэм игъэпытэн, цифрэ технологиехэу техническэ гъэIорышIэным ипроцесс хагъэхьэгъэхэр.

Анахьэу анаIэ зытырадзагъэр лъэныкъохэм язэдэлэжьэныгъ: къэралыгъо органхэм, научнэ ыкIи гъэсэныгъэ учреждениехэм, унэе секторхэм. Ащ фэдэ екIолIакIэм системэр нахь Iэрыфэгъу ешIы, товармэ ящынэгъончъагъэ ыкIи ядэгъугъэ нахьышIу зэрэхъущтымкIэ гугъапIэ щыIэ мэхъу.

Урысыем техническэ гъэIорышIэнэу щагъэфедэхэрэмкIэ унашъоу щыIэхэр яIэубытыпIэу Iоф ашIэным тыраубытагъ. Ар Iофтхьабзэм икIэух зэфэхьысыжьыгъ. Экспертмэ яцыхьэ телъ, зэгъусэхэу, яамалхэр зэхалъхьэхэзэ щынэгъончъэным имэхьанэ къызэраIэтыщтым.