Мыекъопэ къэралыгъо технологическэ университетым ипрофессорскэ-кIэлэегъэджэ купыр ыкIи студентхэр технологическэ предпринимательствэм ия III-рэ Урысые форумэу «ТехПред 2024-рэ» зыфиIорэм хэлэжьагъэх. Форумым зэрэ Урысыеу къарыкIыгъэ нэбгырэ 2400-м ехъу ыугъоигъ, ар технологичнэшхо экономикэм университетхэр зэрэхэлажьэхэрэм зыщытегущыIэгъэхэ площадкэ гупчэ хъугъэ.

МКьТУ-м илIыкIо куп къэзгъэлъэгъуагъэхэр: поселкэу Яблоновскэм дэт къутамэм научнэ IофшIэнымкIэ ипащэ игуадзэу, доцентэу, техническэ шIэныгъэхэмкIэ кандидатэу Дмитрий Бебко; автомобильнэ транспортым икафедрэ икIэлэегъэджэ шъхьаIэу ГъукIэлI Эльдар; информационнэ щынэгъончъэным ыкIи прикладной информатикэм икафедрэ икIэлэегъаджэу Валерий Немыкиныр; научнэ-гъэсэныгъэ гупчэу «Биотехнологии» зыфиIорэм ишIэныгъэлэжь IофшIакIоу Кудайнет Саид; мэкъу-мэщ факультетым истуденткэу Марина Сусловар; поселкэу Яблоновскэм дэт къутамэм истудентэу Илья Белкиныр; поселкэу Яблоновскэм дэт къутамэм истуденткэу Евгения Гончаровар.

Пленарнэ зэхэгущыIэжьэу «Неущрэ мафэм ипроект тэгъэпсы: технологичнэшхо экономикэм университетхэр зэрэхэлажьэхэрэр» зыфиIорэр ары форумым анахь Iофыгъо шъхьаIэ щыхъугъэр. Ащ стартап-движениехэр апшъэрэ еджапIэхэм зэрэщызэхащэхэрэр, инвестициехэм якъещэлIэн, студенческэ предпринимательхэм къадэхъугъэхэм ятарихъ щатегущыIагъэх.

— Платформэри ежь проектыри ныбжьыкIэх пIоми хъущт. Апэрэ едзыгъор тштэмэ, анахь мэхьанэ зэстырэр лъэныкъо заул. АпэрэмкIэ, инфраструктурэм игъэпсын — непэ а IофшIэным университет 420-рэ хэлажьэ. ЯтIонэрэмкIэ, платформэм икъэхъукI, ар апэрэм епхыгъэ шъыпкъэу щыт. ЗэкIэхэми дэгъоу къыжъугурэIо непэрэ экономикэмкIэ платформэм мэхьанэу иIэр. Типроект платформеннэ логикэм зэрэщыдгъэпсыгъэр лъэубэкъу тэрэзэу сэлъытэ. Аужырэр, ящэнэрэр — гъэхъагъэу ашIыгъэхэм ятарихъ. Ащ фэдэхэри щыIэх, — къыхигъэщыгъ наукэмкIэ ыкIи апшъэрэ гъэсэныгъэмкIэ УФ-м и Министрэу Валерий Фальковым.

Форумым къыдыхэлъытагъэу университетхэм ястартапхэм якъэгъэлъэгъон рагъэкIокIыгъ, ащ зэрэхэгъэгоу яинновационнэ проектхэр къыщатыгъэх. Анахь зэлъашIэу агъэпсыгъэхэм ащыщ VR Hockey — тренировкэ уахътэмкIэ хоккейнэ вратархэм ясимулятор, ар Грозненскэ университетым зэхигъэуцуагъ. Робототехническэ платформэмэ япэчIынатIэхэр форумым ихьакIэмэ алъэгъугъэх, проектхэр ИИ-дизайным ылъэныкъокIэ шIыгъэх, пыдзафэхэм ягъэкIодын ыкIи мэкъу-мэщ комплексым хэхъоныгъэхэр егъэшIыгъэнхэм фэгъэхьыгъэх.

Инвесторхэм  форматэу Angel Day зыфиIорэм тетэу аIукIагъэх, ар форумым иIофыгъо шъхьаIэхэм ащыщ хъугъэ. Университетскэ стартап-командэмэ анахь проект дэгъу 50 къагъэлъэгъуагъ, ахэр федеральнэ проектым ирейтингэу ТОП-1000 зыцIэм пхырыкIыгъэх. Лъэтегъэуцохэм гукъэкIхэр къащыраIотыкIыгъэх, нетворкингхэр предприниматель ныбжьыкIэхэр опыткIэ зыщызэхъожьыхэрэ площадкэу хъугъэх, зэпхыныгъэхэр щагъэпсыгъэх.

Инноваторым имафэкIэ форумыр зэфашIыжьыгъ —акселерационнэ программэу «Академия инноваторов» зыфиIорэм иIофтхьабзэу ар щытыгъ, рейтингэу ТОП-1000-м щыщэу университетскэ стартап анахь дэгъоу 10 къыхахыгъ. Медицинэм, цифрэ технологиехэм, приборостроением ыкIи биотехнологием алъэныкъохэр проектхэм зэлъаубытыгъ.

— Зэрэкомандэу МКъТУ-м и Акселератор игъэцэкIэн дэлажьэ. Мы илъэсым Валерий Немыкиным ипроект  Урысыем иуниверситетскэ стартапхэм я ТОП-1000-м хэхьагъ.  Акселераторым истартап-проектхэм тистудентхэр щыщ шъыпкъэ хъугъэх, гукъэкIыкIэхэм, бизнес-проектыкIэхэм форумым нэIуасэ ащыфэхъугъэх. Ахэр зэхахьэхэу зэлъашIэрэ шIэныгъэлэжьхэр къызщыгущыIагъэхэм ахэлэжьагъэх. ТилIыкIо куп мы форумым шIогъабэ къыхихыгъ, шIэныгъэу макIэп щигъотыгъэр, ахэр зэкIэ стартапхэр агъэцэкIэнхэмкIэ амалышIу хъущтых, — къыхигъэщыгъ ГъукIэлI Эльдар.