Мыекъопэ къэралыгъо технологическэ университетым Урысые проектэу «Неущрэ мафэм ибилет» зыфиIорэр щызэфашIыжьыгъ.

Мазэм къыкIоцI профессиональнэ ушэтын 23-рэ зэхащагъ, ахэм Адыгэ Республикэм игъэсэныгъэ организации 10-мэ ащеджэрэ кIэлэеджэкIо 200 фэдиз ахэлэжьагъ.

Проектыр университетым щызыгъэцэкIагъэр апшъэрэ еджапIэм фэгъэхьазырыгъэнхэмкIэ ыкIи сэнэхьатыр къыхэхыгъэнымкIэ МКъТУ-м и Гупчэрэ ащ ипащэу Наталья Елецрэ. «Неущрэ мафэм ибилет» ишIуагъэкIэ кIэлэеджакIомэ амал агъоты сэнэхьатхэм защагъэгъозэнэу, ежьхэм защауплъэкIунэу, яшIэныгъэхэр а лъэныкъомкIэ хагъэхъонхэу, нэужым къыхахыщтыри нахь Iэрыфэгъу къафэхъущт.

— Проектым къыдыхэлъытагъэу кIэлэеджакIохэр сэнэхьатыбэмэ нэIуасэ афэхъугъэх, фармацевтым къыщегъэжьагъэу программистым нэсыжьэу. Янеущырэ сэнэхьатыр къыхахынымкIэ ар IэпыIэгъу къафэхъу, — къыхигъэщыгъ Наталья Елец.

Проектым хэлэжьагъэмэ профессиональнэ ушэтынхэр лъэныкъуабэхэмкIэ акIугъэх. Ахэм ащыщыгъэх — фармацевтыр, фельдшерыр, агрономыр, ландшафтнэ дизайнерыр, ветеринарнэ фельдшерыр, аджащ фэдэу техническэ сэнэхьатхэр: автомобильхэр гъэцэкIэжьыгъэнхэр, гъомлапхъэхэм ягъэхьазырынкIэ технологхэр. Ащ фэшъхьафэу кIэлэеджакIохэр криминалистикэм, машIо щынэгъончъэным, туризмэм ыкIи программированием япхыгъэ сэнэхьатхэм нэIуасэ афэхъугъэх.

Анахь ашIогъэшIэгъонэу бэмэ къыхахыгъэр программист сэнэхьатыр ары. Информационнэ технологиехэм амалэу яIэхэр ашIогъэшIэгъонэу кIэлэеджакIохэм зыфакъудыигъ. Мэкъу-мэщым, агроном сэнэхьатым, былымхъуным япхыгъэхэри зыгу рихьыгъэхэр мэкIагъэп.

— СицIыкIугъом сятэжъ ренэу сыригъусэу шъофым ситыгъ, ащ пае зы нэгъэупIэпIэгъуи сегупшысагъэп сэнэхьатэу къыхэсхыщтым, ау университетымкIэ тIэкIу сехъырэхъышэщтыгъэ. Джы, мы профессиональнэ ушэтыныр зысэкIум ыуж, тесыубытагъ, Мыекъопэ къэралыгъо технологическэ университетыр ары сызчIэхьащтыр, — къыхигъэщыгъ я 11-рэ классым щеджэрэ Зоя Шкареда.

Проектым хэлажьэхэрэм Iофтхьабзэр гукъыдэчъ шъыпкъэ афэхъугъ, сэнэхьатхэр зыфэдэхэр алъэгъугъэх, экспертмэ ыкIи специалистмэ адэпсэлъагъэх, ахэр ары Iофэу ашIэщтым изытетыщтыр къафэзыIотагъэр.

Проектэу «Неущрэ мафэм ибилет» зыфиIорэр — ар кIэлэеджакIохэмкIэ зы лъэубэкъушIоу ясэнэхьат екIурэ Iоф, янеущрэ мафэкIэ зы лъапс. Мыщ фэдэ проектхэм яшIуагъэкIэ кIэлэеджакIохэр хэхъоныгъэ зыщашIыщт гъогум техьащтых.