Непэ Мыекъопэ къэралыгъо технологическэ университетым Iэнэ хъураеу «Зыныбжь имыкъугъэхэр зыхафэхэрэ хъугъэ-шIагъэхэу гъогухэм атехъухьэхэрэр нахь макIэ хъунхэм апае шIэгъэн фаехэр» зыфиIорэр щыкIуагъ.

Зэхахьэр зэрищагъ ныбжьыкIэ политикэмкIэ ыкIи гъэсэкIо IофшIэнымкIэ МКъТУ-м ипроректорэу БрантIэ Муратэ. Ащ къыкIигъэтхъыгъ, гъогухэм атехъухьэрэ авариехэр нахь макIэ шIыгъэнхэмкIэ екIолIакIэу щыIэхэр зэкIэ зэппхынхэ зэрэфаер, анахьэу кIэлэцIыкIухэмрэ ныбжьыкIэхэмрэ ящынэгъончъагъэ къыдэплъытэмэ. ЗэкIэ лъэныкъохэр — хабзэ органхэм къащегъэжьагъэу гъэсэныгъэ учреждениехэм ыкIи гъогухэм ащызекIохэрэм анэсыжьэу Iофым къыхэлажьэхэмэ ишIуагъэ къызэрэкIощтым БрантIэ Муратэ игугъу къышIыгъ.

Зэхахьэм хэлэжьагъэх инженернэ факультетым идекан ипшъэрылъхэр зыгъэцакIэу, техническэ шIэныгъэхэмкIэ кандидатэу Мэрэтыкъо Муратэ, автомобильнэ транспортым икафедрэ ипащэу, экономикэ шIэныгъэхэмкIэ кандидатэу Яна Ткачевар, психологическэ шIэныгъэхэмкIэ кандидатэу, МКъТУ-м ипсихологическэ къулыкъу ипащэу Людмила Красновар, студентхэр, кIэлэегъаджэхэр, университетскэ ныбжьыкIэ объединениехэм ялIыкIохэр. Iофтхьабзэм къеблэгъагъэх Адыгэ Республикэм и Къэралыгъо автоинспекцие иорганизационнэ-аналитическэ отдел ипащэу, полицием иподполковникэу Бзэджэжъ Муратэ, Къэралыгъо автоинспекцием и Мыекъопэ отдел ипащэу, полицием иподполковникэу Виталий Загайко, Общественнэ советым хэтэу, дин гъэIорышIапIэм иимамэу Артур Миндуовыр, Шъолъыр гъэIорышIэным игупчэ ипащэу Къоджэшъао Казбек.

Гъогур щынэгъончъэным зэрэтегущыIагъэхэм дакIоу, ежь ныбжьыкIэмэ гъогу шапхъэхэр зэрагъэцакIэхэрэми ягугъу ашIыгъ. Бзэджэжъ Муратэ къызэриIуагъэмкIэ гъогум зэрэщызекIощтхэм фэгъэхьыгъэ егъэджэнхэр ублэпIэ классхэм джыри ащырагъэжьэнышъ, гурыт еджапIэхэм ыкIи апшъэрэ еджапIэхэм ащылъагъэкIотэн фае. Имамэу Артур Миндуовым гушъхьэ лъэныкъоу Iофым хэлъхэр къыхигъэщыгъэх, пшъэдэкIыжьэу нэбгырэ пэпчъ ыхьырэр зыдишIэжьэу ныбжьыкIэхэр апIухэмэ нахьышIоу ылъытагъ.

Iэнэ хъураем лъэныкъуабэмэ щанасыгъэх. Ахэм ащыщых гъогум ишапхъэхэр мыукъогъэнхэм атегъэпсыхьэгъэ гъэсэныгъэ программэр кIэлэеджакIохэми студентхэми акIуныр, гъогухэм язытети нахьышIу шIыгъэныр, гъэсэныгъэ проектыкIэхэр гъэцэкIэгъэнхэр, нэмыкIхэр.