Апшъэрэ еджапIэм изэнэкъокъу пилот зэрымыс быбырэ аппаратхэмкIэ Мыекъопэ къэралыгъо технологическэ университетым непэ щыкIуагъ. Ар НТИ-м иплатформэ стратегическэ инициативэхэмкIэ и Агентствэ яIэпыIэгъоу зэхащагъ.

Лъэпкъ проектэу «Пилот зэрымыс авиационнэ системэхэр» зыфиIорэм ыкIи Адыгэ Республикэм икъэралыгъо программэу мы технологиехэм хэхъоныгъэ ягъэшIыгъэным дэлажьэрэм къадыхэлъытагъэу зэнэкъокъур рагъэкIокIыгъ. Iофтхьабзэм зэрипхыгъэх МКъТУ-м хэхьэрэ Дзэ егъэджэн гупчэр, МКъТУ-м иконструкторскэ бюро ыкIи «Точка кипением» икомандэ.

ХьэкIэ лъапIэу Iофтхьабзэм къеблэгъагъэхэм ащыщыгъэх кIэлэцIыкIу технопаркэу «Кванториум» зыфиIорэм ипащэу Олег Простаковыр, «Аэроквантумым» игъэсакIоу Сергей Волобуевыр, джащ фэдэу Пшызэ къэзэкъыдзэм и Мыекъопэ къэзэкъ отдел иатаманэу Сергей Захаровыр, ащ игуадзэу Анастасия Нетребинар, дронхэм ягъэбыбынкIэ Адыгэ Республикэм и Федерацие ипащэу Елена Рединар ыкIи авиационнэ клубэу Урысыем и ДОСААФ илIыкIохэу Евгения Антошкинар, Дмитрий Мартыновыр, Александр Прохоровыр, Владимир Лукьяненкэр.

ШIуфэс псалъэкIэ къэзэрэугъоигъэхэм закъызфэзгъэзагъэхэр: МКъТУ-м цифровизациемкIэ ипроректорэу Дмитрий Игнатовыр, Дзэ егъэджэн гупчэм ипащэу Нурлан Самадьяновыр, «Точка кипением» ипрограммнэ пащэу Светлана Новиковар. Ахэм къыхагъэщыгъ пилот зэрымыс быбырэ аппаратхэм ятехнологиехэр отраслэ зэфэшъхьафхэм яIахь шъыпкъэ зэрэхъухэрэр, анахьэу псэолъэшIыным, мэкъу-мэщым, экологием, геодезием ыкIи нэмыкIыбэхэм.

Турнирыр лъэныкъуищымкIэ рекIокIыгъ: «Гонка дронов. Пилотирование», «Гонка дронов. FPV-симулятор» ыкIи «Программирование автономных дронов». Зэнэкъокъум хэлажьэрэ пэпчъ мы лъэныкъохэмкIэ яшIэныгъэхэмрэ акIуачIэрэ аушэтыгъэх. Хьыкум командэм пащэу иIагъэхэр: Цундышк Вячеслав (программирование лъэныкъор), Виталий Гончаровыр (пилотированиер) ыкIи Алексей Ершовыр (симуляторыр), студентмэ яIофшIэнхэм язэхэфын яшъыпкъэ ахэм рахьылIагъ.

Шъолъырым иорганизацие пэрытхэм ялIыкIохэр зэнэкъокъур зэрэкIорэр зэрагъэлъэгъугъ. Ахэмэ ащыщыгъэх кIэлэцIыкIу технопаркэу «Кванториумыр», Мыекъопэ авиационнэ-спортивнэ клубэу М.М. Громовым ыцIэ зыхьырэр ыкIи дронхэм ягъэбыбынкIэ Адыгэ Республикэм и Федерацие. Студентмэ амалэу аIэкIэлъхэр дронхэм япилотированиекIэ ыкIи япрограммированиекIэрэ къагъэлъэгъуагъ, пшъэрылъэу яIэм фэкIуагъэх.

Хьыкум изэфэхьысыжьхэм ауж мыщ фэдэ чIыпIэхэр къэнэфагъэх:

Лъэныкъоу «Гонка дронов. Пилотирование»

1-рэ чIыпIэр — Даниил Усачёвыр;

2-рэ чIыпIэр — Глеб Вихровыр;

3-рэ чIыпIэр — Къайтмэс Батыр.

«Гонка дронов. FPV-симулятор»

1-рэ чIыпIэр — Александр Яковлевыр;

2-рэ чIыпIэр — Илья Орловыр;

3-рэ чIыпIэр — Къайтмэс Батыр.

«Программирование автономных дронов»

1-рэ чIыпIэр — Глеб Вихровыр ыкIи Даниил Усачевыр;

2-рэ чIыпIэр— Къайтмэс Батыр ыкIи Ангелина Свирелинар;

3-рэ чIыпIэр — Илья Орловыр ыкIи Мырзэ Арамбый.

Мыекъопэ къэралыгъо технологическэ университет закъор ары апшъэрэ еджапIэу тишъолъыр пилот зэрымысэу быбырэ аппаратхэм адэлэжьэщт специалистхэр зыщагъэхьазырхэрэр, ащ къыхэкIэу пшъэдэкIыжьышхо зэрехьэ, дронхэм алъэныкъокIэ хэхъоныгъэ зэришIыщтым ыуж ит. Зэнэкъокъум къыгъэлъэгъуагъ лъэныкъо зэфэшъхьафхэм ащылэжьэщт специалистхэм ягъэхьазырынкIэ лъэубэкъу дэгъу университетым зэридзыгъэр. Iофтхьабзэм щытырахыгъэ сурэтхэр мыщ ижъугъотэщтых: в ВКонтакте.