Мыекъопэ къэралыгъо технологическэ университетым джыри зэ къеушыхьаты сэнаущыгъэ зыхэлъхэм ыкIи инновациехэм якIыщэу зэрэщытыр: стартапихэу студентхэмрэ апшъэрэ еджапIэм икIэлэегъаджэхэмрэ зэхагъэуцуагъэхэр Урысыем иуниверситетскэ проект анахь дэгъу ТОП-1000-м хэфагъэх.

Хэгъэгум щагъэхьазырыгъэ проект 30 000-мэ ахэм зэхагъэуцуагъэхэр къахэщыгъэх, экспертмэ осэшхо къафашIыгъ, ащ къеушыхьаты наукэмрэ предпринимательствэмрэ МКъТУ-м чIыпIэшхо зэрэщаубытрэр.

Урысыем иуниверситетскэ стартап анахь дэгъумэ ахэфагъэхэр:

1. «EXPRO23: Программнэ-техническэ комплексэу медицинэ IофышIэмэ яIэпэIэсэныгъэ уасэ афэзышIырэр, ар Валерий Немыкиным зэхигъэуцуагъ, пащэу иIагъэр техническэ шIэныгъэхэмкIэ кандидатэу Цундышк Вячеслав.

2. «Hothouse» — зигукъэкIыр Александр Карлиныр ары, мэкъумэщ отраслэм пэрыт технологиехэр щыгъэфедэгъэнхэм атегъэпсыхьагъ; пащэу иIагъэр биологие шIэныгъэхэмкIэ кандидатэу Любовь Вавиловар ары.

3. «Пындж къэгъэкIыным къыхэкIырэ пыдзафэхэр гъэкIодыжьыгъэнхэм ятехнологие» — экологием икъэухъумэн фытегъэпсыхьэгъэ проектыр Екатерина Кузьминам зэхигъэуцуагъ, ащи пащэу иIагъэр Любовь Вавиловар ары, мэкъу-мэщ комплексым инновационнэ шIыкIэхэр къыфагъотыгъэх.

4. «MedUniMinds: медик анахь дэгъур» — гъэсэныгъэ платформэу МКъТУ-м и Мединститут истудентмэ апае МКъТУ-м истудентэу Хьасанэ СултIан зэхигъэуцуагъ, врачэу Iоф зышIэщтхэм лъэныкъуакIэхэр къафызэIуехы.

5. «ПкIашъэу къыпызыжьыгъэмэ тхьапэ ахэшIыкIыгъэныр» —технологие гъэшIэгъонэу МКъТУ-м имагистрантэу Денис Крылевскэм ыгъэхьазырыгъэр, ащ гъусэу иIагъэр мэкъу-мэщ шIэныгъэхэмкIэ кандидатэу Мария Галичевар ары, экологиемрэ  инновациехэмрэ проектым зэрепхых.

6. «Инновационный метод хранения плодоовощной продукции на примере яблок» зыфиIорэр Денис Крылевскэм ыгъэхьазырыгъ, игъэсэкIуагъэр техническэ шIэныгъэхэмкIэ кандидатэу КIыкI Саид ары. Пхъэшъхьэ-мышъхьэхэр мыкIодхэу нахьыбэрэ зэрэщагъэлъыщтхэм проектыр фэгъэхьыгъ.

МКъТУ-м гукъэкI генерациехэм апае амалхэр зэкIэ иIэх, ахэр инвестициехэр  къещэлIэгъэнхэм афэIорышIэх. АщкIэ мэхьанэ зиIэхэм ащыщ акселерационнэ программэу «ИнноВектор» зыфиIорэр, гукъэкIыр проект шъыпкъэ зыгъэхъужьы зышIоигъохэмкIэ Iэрыфэгъоу щыт. «ИнноВекторыр» зэхэгъэуцокIо ныбжьыкIэмэ IэпыIэгъу афэхъу: гукъэкIым къыщегъэжьагъэу продукт ухыгъэу цIыфхэм ящыкIагъэу хъурэм нэс. Ащ фэдэ экосистемэм ишIуагъэкIэ студентмэ практикэм яшIэныгъэхэр щагъэфедэ, сатушIэ гупшысэм зырагъэушъомбгъу, стартапхэм ягъэцэкIэнкIэ ящыкIэгъэ IэпыIэгъур агъоты. 

Федеральнэ проектэу «Университетскэ технологическэ сатыушIыным иплатформэ» къыдыхэлъытагъэу зэхащэгъэ рейтингэу ТОП-1000-р гукъэкI зиIэ ыкIи сэнаущыгъэ зыхэлъ студентмэ  IэпыIэгъу афэхъу ахэм заушэтынкIэ, яамалхэр икъоу агъэфедэшъунхэмкIэ. Рейтингэу ТОП 1000-м ипэрытхэм япроектхэр технологическэ сатыушIыным и Урысые форум лъэтегъэуцохэр щафашIыщтых, ащ елъытыгъэу хахъо дэгъу ашIыщт.
 Тэ лъэшэу тафэраз ыкIи тхьаегъэпсэу ятэIо проектхэм язэхэгъэуцон хэлэжьагъэхэми IэпыIэгъу афэхъугъэхэми, студентмэ ягукъыдэчъмэ адезгъэштагъэмэ. Анахьэу тафэраз ягъэсакIохэм: Цундышко Вячеслав, Любовь Вавиловым, Мария Галичевам ыкIи КIыкI Саидэ, — ахэр ары студентмэ ягукъэкIхэр кIэухым нэзгъэсыгъэхэр. ЗэкIэ кафедрэхэу Iофтхьабзэм хэлэжьагъэхэм тафэраз, технологическэ предпринимательствэм дунаим пэрытныгъэ щиубытыным шъуиIахь хэшъолъхьэ!