Мыекъопэ къэралыгъо технологическэ университетым Шэуджэн районым щыщ кIэлэеджакIохэу я 9-рэ ыкIи я 2-рэ гырыт еджапIэмэ ащеджэхэрэр щыIагъэх, сэнэхьат къыхэхыным фэгъэхьыгъэ Iофтхьабзэхэр ахэм афызахащэгъагъ.

Iофтхьабзэм кIэщакIо фэхъугъэр сэнэхьатыр ягъэгъэгъотыгъэнымкIэ ыкIи апшъэрэ еджапIэм фэгъэхьызырыгъэнымкIэ МКъТУ-м и Гупчэ ипащэу Олег Франко.

Программэм къыхиубытагъэх университетым экскурсие щакIуныр, зэфэшъхьаф лъэныкъохэмкIэ зягъэушэтыгъэныр, сэнэхьатэу зыфагъасэхэрэм нэIуасэ афэшIыгъэнхэр.

Профессиональнэ ушэтынэу «Былымхъуныр» зыфиIорэр зэрищагъ мэкъу-мэщ продукцием икъыдэгъэкIын технологиехэмкIэ кафедрэм идоцентэу Мария Галичевам. Былымхэм яIыгъын епхыгъэ Iофыгъохэм кIэлэеджакIохэр щыгъозагъэх, мэкъу-мэщ комплексыр зыфэдэри зэрагъэшIагъ.

Ащ ыуж кIэлэеджакIохэр профессиональнэ шэтынэу «Дегустация сокосодержащих напитков профилактического назначения» зыфиIорэр акIугъ. Гъомлэпхъэ производствэхэм яIэмэ-псымэхэм ыкIи машинэхэм ятехнологиехэм якафедрэ иассистентэу, аспирантэу Нарэк Навасардян япащэу кIэлэеджакIохэм пхъэшъхьэ-мышъхьэхэм ахэшIыкIыгъэ шъонхэр ауплъэкIугъэх, псауныгъэмкIэ федэу ахэлъхэр зэрагъэшIагъэх.

Фармацие кафедрэм икIэлэегъаджэу Вера Артемьевам мастер-классэу «Фармацевт» зыфиIорэр ригъэкIокIыгъ. Уцхэр зэрагъэхьазырхэрэр, фармацевтическэ сэнэхьатыр зэзгъэгъотырэмэ шIэныгъэу ящыкIагъэр, нэмыкI лъэныкъуабэхэм защагъэгъозагъ.

Мэкъумэщ продукцием итехнологиехэм якафедрэ идоцентэу, биологие шIэныгъэхэмкIэ кандидатэу Шъао Жаннэ профессиональнэ ушэтынэу «Агроном» зыфиIорэр зэрищагъ. Мэкъу-мэщ производствэм, агроном сэнэхьатым хэушъхьафыкIыгъэ мэхьанэу иIэр зэрагъэшIагъ.

Сэнэхьат къыхэхыным фэгъэхьыгъэ Iофтхьабзэхэм яшIуагъэкIэ кIэлэеджакIохэр сэнэхьатхэу МКъТУ-м къытыхэрэм нахь благъэу нэIуасэ афэхъух, къыхахыщтыр къафэнафэ.