Мы мафэхэм шIэныгъэмэ я Гупчэу «Машук» гъэсэныгъэ программэу «ЛIэужхэм амакъ» зыфиIорэр щызэфашIыжьыгъ. Ащ къэралыгъом иапшъэрэ еджапIэмэ ялIыкIо 200-м ехъу ыугъоигъагъ: ныбжьыкIэ политикэмкIэ проректорхэр, деканхэр, кIэлэегъаджэхэр ыкIи фэшъхьаф специалистхэр.

Мыекъопэ къэралыгъо технологическэ университетыр къэзгъэлъэгъуагъэхэр: филологие шIэныгъэхэмкIэ кандидатэу, урысыбзэмрэ IэкIыбыбзэмрэ якафедрэ идоцентэу Болэкъо Нуриет; урысыбзэмрэ IэкIыбыбзэмрэ якафедрэ идоцентэу Бзэджэжъ Ларис; ныбжьыкIэ политикэмкIэ ыкIи гъэсэкIо IофшIэнымкIэ проректорым иIэпыIэгъоу Тымэ Заур; филологие шIэныгъэхэмкIэ кандидатэу, доцентэу ЩашIэ Альбин.

Программэм икъызэIухын фэгъэхьыгъэ зэхахьэм къыщыгущыIагъэх ныбжьыкIэ IофхэмкIэ Федеральнэ агентствэм ипащэу Григорий Гуровыр ыкIи шIэныгъэмрэ апшъэрэ гъэсэныгъэмрэкIэ УФ-м и Министрэ игуадзэу Ольга Петровар.

— Мыщ фэдэ проектхэр IэпыIэгъушIу мэхъух шIэныгъакIэхэмрэ опытыкIэхэмрэ зэбгъэуIунхэмкIэ. Линейкэу «ЛIэужхэм амакъ» зыфиIорэр гъэшIэгъон дэд, трекхэр зэпхыгъэхэу зэдэлажьэх, зы лъагъо пхыращы, — къыкIигъэтхъыгъ Ольга Петровам.

НыбжьыкIэ политикэм фэгъэзагъэхэр, кIэлэегъаджэхэр ыкIи гъэсакIохэр зэгурыIохэу апшъэрэ гъэсэныгъэхэм азыфагу зэпхыныгъэ зэдыряIэу зэрэзэдэлэжьэщтхэм мыщ лъапсэ щыфашIыгъ. ГъэсэкIо IофшIэнымкIэ практикэ пэрытэу щыIэхэм атегущыIагъэх, гъэсэныгъэ хэбзэгъэуцугъэм и Гупчэ иэкспертмэ нормативнэ документхэм Iоф зэрадэпшIэщт шIыкIэхэр къарагъэлъэгъугъэх, гъэсэныгъэмкIэ Урысые академием ахэр зэрэзэригъэзафэхэрэр, гумэкIыгъоу къыхэкIыхэрэр ыкIи нэмыкIхэр къаIотагъэх.

Гъэсэныгъэ программэхэм апае IофшIэкIэ гъэнэфагъакIэу къаугупшысыгъэхэм практическэ Iахьыр афэгъэхьыгъагъ. Методическэ лъапсэхэм зэгъусэхэу зэхахьэм хэлажьэхэрэр адэлэжьагъэх, ахэм яшIуагъэкIэ студентхэр гъэсэныгъэ екIолIакIэу джырэ уахътэм щыIэхэм нахь псынкIэу хэгъозэнхэ алъэкIыщт.