АР-м финансхэмкIэ и Министерствэ яIэпыIэгъоу финансовэ гъэсэныгъэмкIэ Шъолъыр гупчэм зэхищэгъэ Фестивалыр зэфашIыжьыгъ.

Фестивалым ипшъэрылъыр — финансхэмкIэ пшъэдэкIыжьэу ахьырэр цIыфхэм зэхягъэшIыкIыгъэныр, финансовэ культурэм зыкъырагъэIэтыныр ары. Iофтхьабзэм апшъэрэ еджапIэхэр, колледжхэр, еджапIэхэр ыкIи республикэм инэмыкI гъэсэныгъэ учреждениехэр хэлэжьагъэх. Ахэм зэу ащыщыгъ Мыекъопэ къэралыгъо технологическэ университетыр.

АР-м щыпсэухэу сыд фэдэрэ ныбжь зиIэхэр Фестивалым зэлъиубытыгъэх. КIэлэеджакIохэмрэ студентхэмрэ олимпиадэхэм ахэлэжьагъэх, тест шIыкIэмкIэ заушэтыгъ. Ащ ишIуагъэкIэ финансовэ шIэныгъэу аIэкIэлъыр зыфэдэр ауплъэкIугъ.

Iофтхьабзэм къыдыхэлъытагъэу МКъТУ-м истудентмэ театрализованнэ къэгъэлъэгъон зэхащагъ, пшысэу «ЦыхьэшIэгъу тхьакIумкIыхьэр» адыгабзэкIэ агъэуцугъ, апэрэ гурыт еджапIэм икIэлэеджакIомэ къафагъэлъэгъуагъ. Ащ хэт персонажымкIэ финансовэ шIэныгъэм ылъапсэхэр ныбжьыкIэмэ арагъэшIагъэх. Ащ фэшъхьафэу хабзэ хъугъэ кIэлэцIыкIу сурэтхэм ябжыхьэ марафон щыIагъ. Ащ хэушъхьафыкIыгъэ еджапIэхэм, интернатхэм ащеджэрэ кIэлэеджакIохэр хэлэжьагъэх. IофшIагъэхэр финансовэ гъэсэныгъэмкIэ Шъолъыр гупчэм и Телеграм-канал къырагъэхьащтых ыкIи нахь мэкъабэ зыфатыщтхэр щытекIощтых.

МКъТУ-м иплощадкэ финансовэ шIэныгъэмкIэ джэгукIэ зэфэшъхьафхэр щызэхащагъэх:  «Унэе финансовэ планыр», «Гухэлъым инвестициехэр халъхьэ», «Инвестициехэр», «Такъикъ 60-м къыкIоцI къэгъахъ» зыфиIохэрэр. ДжэгукIэмэ яшIуагъэкIэ нэбгырэ пэпчъ финансовэ план зэхагъэуцоным, инвестициехэр зэхашIэным зыфагъэсагъ.

Iэнэ хъураекIэ фестивалыр зэфашIыжьыгъ. Ащ хэлэжьагъэх министерствэхэм, ведомствэхэм, гъэсэныгъэ организациехэм ялIыкIохэр, шъолъырым ифинансовэ шIэныгъэ нахьышIу шIыгъэным ащ щытегущыIагъэх.