Мыекъопэ къэралыгъо технологическэ университетым Iэнэ хъураеу «Цифрэ трансформацие зыщыкIорэ уахътэм автотранспортнэ отраслэм хэхъоныгъэ зэришIырэр» зыфиIорэр щыкIуагъ.

Iофтхьабзэр МКъТУ-м иинженернэ факультет автомобильнэ транспортымкIэ икафедрэ зэхищагъ. Зезыщагъэр кафедрэм идоцентэу Инна Ахуновар ары.

Зэхахьэм хэлажьэрэмэ шIуфэс псалъэкIэ закъыфагъэзагъ инженернэ факультетым идекан ипшъэрылъхэр зыгъэцакIэрэ Мэрэтыкъо Муратрэ автомобильнэ транспортымкIэ Донецкэ академием научнэ IофшIэнымкIэ ипроректорэу Юрий Прилепскэмрэ.

Ащ фэшъхьафэу Iэнэ хъураем хэлэжьагъэх МКъТУ-м икIэлэегъаджэхэр, автомобильнэ транспортымкIэ Донецкэ академием ыкIи Орловскэ къэралыгъо университетэу И.С. Тургеневым ыцIэ зыхьырэм яшIэныгъэ IофышIэхэр, транспортнэ хъызмэтшIапIэм илIыкIохэр, муниципальнэ хабзэм иорганхэр, студентхэр. Специалистхэу ыкIи хьакIэхэу Iофтхьабзэм хэлэжьагъэхэр: къалэу Мыекъуапэ иадминистрацие иIофышIэу Марат Хамидулиныр; Адыгэ Республикэм гъогу лъыплъэнымкIэ и Шъолъыр отдел икъэралыгъо инспекторэу Елена Голевар; МУП «Мыекъопэ троллейбуснэ гъэIорышIапIэм» ипащэу Хьао Анзор; ООО «Автоспецтехника» зыфиIорэм ипащэу Александр Василевскэр; ООО «Майкопское грузовое автотранспортное предприятие» зыфиIорэм иотдел ипащэу Виталий Шевченко.

Iофтхьабзэм пшъэрылъ шъхьаIэу иIагъэр ушэтэкIо ныбжьыкIэхэр, кIэлэегъаджэхэр ыкIи автотранспортнэ отраслэм испециалистхэр опытэу аIэкIэлъхэмкIэ зэхъожьынхэр ары. ТехнологиякIэхэр гъэфедэгъэнхэр, щынэгъончъагъэ хэлъэу хьылъэхэр зещэгъэнхэр, нэмыкI IофхэмкIэ зэхэгущыIэжьыгъэх.  УпчIэ шъхьаIэу къыхагъэщыгъэхэр:

— ТехнологиякIэхэр хэгъэхьэгъэнхэр, автотранспортыр гъэфедэгъэнымкIэ материалыкIэхэр къыдэгъэкIыгъэнхэр;

— Логистикэр, экологиер ыкIи автомобильнэ транспортыр щынэгъончъэу щыгъэтыгъэныр;

— Транспортым игъэцэкIэжьынкIэ непэрэ шIыкIэхэр гъэфедэгъэнхэр;

—Шъолыр транспортнэ инфраструктурэм хэхъоныгъэ егъэшIыгъэнымкIэ гугъапIэу щыIэхэр.

Iэнэ хъураем хэлажьэхэрэмэ яшIошIхэр къыраIотыкIыгъэх, гъогухэр щынэгъончъэнымкIэ шIэгъэн фае лъэныкъохэр къыхагъэщыгъэх.