ШэкIогъум и 4-м къыщыублагъэу и 6-м нэс Урысые обществэу «ШIэныгъэм» ипроект пэрытым федеральнэ шъолъырхэр зэкIэ зэлъиубытыгъэх, шъолъырыкIэхэри зэрахэтхэу. Площадкибгъумэ ныбжьыкIэ нэбгырэ мин 25-рэ ащызэрэугъоигъэх, нэбгырэ миллион фэдиз онлайнкIэ гъусэгъу къафэхъугъэх. КъэкIощт гъатхэм ашIэщтыри агъэнэфагъ: къыкIэлъыкIорэ марафонэу «ШIэныгъэхэр.Апэрэхэр» зыфиIорэр Хэгъэгу зэошхом текIоныгъэ къызщыдахыгъэм ия 80-рэ илъэс фэгъэхьыгъэщт.

Марафонэу «ШIэныгъэхэр.Апэрэхэр» зыфиIорэм темэ шъхьаIэу иIагъэр Урысыем инеущрэ мафэ зыфэдэщтыр ары. Хэгъэгум амал гъунэнчъэу ныбжьыкIэхэм къаритыщтхэр, гукъэкIхэр ары программэм лъапсэ фэхъугъэхэр, ащ инновациехэр дыхэтых, нэбгырэ пэпчъ хэхъоныгъэ зэришIыщтым тегъэпсыхьыгъэу щытых. 

— УпчIэжьэгъоу ашIыгъэхэм къазэрагъэлъэгъуагъэмкIэ процент 90-мэ Хэгъэгум хэхъоныгъэ егъэшIыгъэным яIахь халъхьэ ашIоигъу. Къэралыгъо къулыкъушIэшхохэр — вице-премьерхэр, министрэхэр, губернаторхэр, институтышхохэм япащэхэр, медиахолдингхэм ялIыкIохэр ныбжьыкIэмэ апашъхьэ къызэриуцохэрэр, гъэсэпэтхыдэхэр къазэрафаIуатэрэр мэхьанэшхо зиIэ Iофыгъу, — къыкIигъэтхъыгъ УФ-м и Президент иадминистрацие и Пащэ игуадзэу Сергей Кириенкэм.

Зырагъажьэм, лъэпкъ зыкIыныгъэм и Мафэ тефэу площадкэхэр къащызэIуахыгъэх Якутскэ, Томскэ, Ханты-Мансийскэ, Нижний Новгородым, Архангельскэ, Пятигорскэ, Шъачэ ыкIи Луганскэ — зэкIэмкIи ахэм нэбгырэ мин 25-рэ ащыIагъ. Бжыхьэ марафонэу «ШIэныгъэхэр.Апэрэхэр» зыфиIорэр хэгъэгум икъэлэ шъхьаIэ и «Манеж» ары зыдэщыIагъэр. Адыгеим икIыгъэ ныбжьыкIэ купым хэтыгъэх Мыекъопэ къэралыгъо технологическэ университетым ыкIи Адыгэ къэралыгъо университетым ястудентхэр.

— Марафоным мэфищэу щыдгъэкIуагъэр шIэныгъэмрэ гукъэкIыхэрэмкIэ баигъэх. ЗэлъашIэрэ цIыфхэр тизещэкIуагъэх, къыддэгущыIагъэх, ахэмэ энергиеу къапыкIырэм тиумэхъыгъ. Интерактивнэ площадкэхэри хэтхэу, апшъэрэ лъэгапIэхэм анэсэу Iофтхьабзэр зэхащагъ, цIыф гъэшIэгъоныбэмэ нэIуасэ тафэхъугъ, — къыIотагъ АКъУ-м истуденткэу Ангелина Паразихинам.

Лектори 142-рэ марафоным къыщыгущыIагъэх: бизнесым ипэрытхэр, шIэныгъэлэжьхэр, ушэтакIохэр, спортсменхэр, культурэм ыкIи искусствэм иIофышIэхэр, къэралыгъо IофышIэхэр, журналистхэр, хэушъхьафыкIыгъэ дзэ операцием илIыхъужъхэр.

— Сэ сыгу къинэжьыщтыр бэ дэд! Николай Цискаридзе, Тина Канделаки, Дмитрий Песковым, Дмитрий Патрушевым  ыкIи Анна Щербаковам япсалъэхэр лъэш дэдэу сыгу рихьыгъэх. Ащ фэшъхьафэу Iофтхьабзэ гъэшIэгъонхэр марафоным щызэхащагъэх. ГущыIэм пае, блогерскэ чIыпIэр – непэрэ мафэхэм адиштырэ хъооу ар щытыгъ, цифрэ темэхэм ыкIи трендхэм уахищэщтыгъэ, шIу тлъэгъугъэ блогермэ таIуигъакIэщтыгъ, – къыIотагъ МКъТУ-м истуденткэу Тамила Дачевам.

УФ-м и Президент иадминистрацие и Пащэ игуадзэ къыIопщыгъ, къыкIэлъыкIорэ бжыхьэ марафонэу Урысые обществэу «ШIэныгъэм» зэхищэрэр жъоныгъуакIэм и 6-м къыщыублагъэу и 8-м нэс рагъэкIокIыщт.

— Обществэу«ШIэныгъэр» — механизмэ псау, ар дэгъу ыкIи тэрэз. Хъугъэ-шIэгъакIэхэр къэхъух, темакIэхэр, ахэр ныбжьыкIэмэ зэрашIогъэшIэгъоным елъытыгъэу щыIэныгъэм къыхэкIых, «ШIэныгъэр» ахэм япэсыгъэу адэпсэу. Тицыхьэ телъ гъатхэм щыIэщт марафоныр Хэгъэгу зэошхом текIоныгъэ къызщыдахыгъэм ия 80-рэ илъэс зэрэфэгъэхьыгъэщтым. Бжыхьэ марафонэу 2025-рэ илъэсым кIощтыри  Iо хэмылъэу атомнэ отраслэм епхыгъэщт,— къыIотагъ Сергей Кириенкэм.

ЗэхэгущыIэжь зэхахьэмэ афэшъхьафэу Iофтхьабзэм зыгъэпсэфыпIэ-гъэсэныгъэ чIыпIэхэри, экскурсиехэри, мастер-классхэри, подкастхэри къыдалъытагъэх. Москва и «Манеж» къэлэ псау щагъэпсыгъагъ, ащ къэралыгъо корпарацие инипшIымэ ыкIи бизнесым ялIыкIомэ ущызгъэгъуазэрэ интерактивхэр щырагъэкIокIыгъэх.

Гъэсэныгъэ къыозытырэ контентэу мэфищ программэу шэкIогъум и 4-6-м къыкIоцI агъэхьазырыгъэм фаер ихьан ылъэкIыщт, ар Урысые обществэу «ШIэныгъэм» исайт ит ыкIи официальнэ сообществэу  социальнэ хъытыоу ВКонтакте рагъотэщт.

Марафонэу «ШIэныгъэхэр.Апэрэхэр» зыфиIорэм изэхэщэнкIэ яIэпыIэгъугъэр: Москва и Правительствэ, генеральнэ гъусэгъур «Алабуга» — хэгъэгум иэкономическэ чIыпIэ хэушъхьафыкIыгъ. Информационнэ IэпыIэгъу къязытыгъэхэр: ТАСС, РИА Новости, Russia Today, МИЦ «Известия», «Газпром-Медиа Холдинг», радио «Вести FM», телеканалэу «Общественное телевидение России», къэралыгъо телерадиокомпаниеу «Мир», «Русская Медиагруппа», медиагруппэу «Комсомольская Правда», деловая газета «Взгляд», тедзэпIэ унэу «Аргументы и факты», News Media Holding (LIFE, MASH, SHOT), къэлэ къэбархэм я Агентствэу «Москва», медиахолдингэу «Вечерняя Москва», «Сноб», гъэзетэу «Metro Москва», PEOPLETALK.