Адыгэ Республикэм финанс шIэныгъэхэмкIэ ишъолъыр гупчэ икъулыкъушIэхэм АР-м финансхэмкIэ и Министерствэ яIэпыIэгъоу мы Iофтхьабзэр рагъэкIокIы. Ащ къыдыхэлъытагъэу финанс щынэгъончъэным ылъэныкъокIэ цIыфхэм ашIэн фаехэм зыщатегущыIэгъэхэ IофтхьэбзитIу зэхащагъ.

Непэ партиеу «Единэ Россием» общественнэ IэпыIэгъумкIэ и Штаб Iэнэ хъурае щызэхащагъ, джырэ дунаим финансхэм алъэныкъокIэ шIэныгъэу пIэкIэлъын фаехэм яIофыгъохэм ащ щытегущыIагъэх. Iофтхьабзэм хэлэжьагъэх министерствэхэм ыкIи ведомствэхэм ялIыкIохэр, джащ фэдэу Адыгеим ифинанс-экономикэ блок къэзыгъэлъагъохэрэр, Мыекъопэ къэралыгъо технологическэ университетым икIэлэегъаджэхэр, истудентхэр ыкIи РЦФГ-м илIык1охэр. НыбжьыкIэхэм финансхэм алъэныкъокIэ шIэныгъэу аIэкIэлъхэм, якультурэ ахагъэхъоным япхыгъэ Iофыгъохэм къэзэрэугъоигъэхэр атегущыIагъэх.

АР-м финансхэмкIэ и Минтистерствэ ыкIи финанс-экономикэ секторым ялIыкIохэм къызэрэхагъэщыгъэмкIэ, финансхэм ягъэзекIон хэшIыкI фыуиIэным джырэ уахътэм мэхьанэшхо иI, экономикэ зыпкъитыныгъэ щыIэным ар фэIорышIэ. ЦIыфым ифинансхэр шIуагъэ къытэу ыгъэзекIонхэм, ащ дакIоу гъэпцIагъэ зыхэлъ лъэныкъохэм апэшIуекIон ылъэкIыным мэхьанэшхо иI. Спикерхэм къаIотагъ бюджетыр тэрэзэу бгъэнэфэн зэрэплъэкIыщтыр, чIыфэ зытыхэрэм япредложениехэм уазэрэхэплъэщтыр, нэмыкIхэри.

Адыгэ республикэ гимназиу №1-м икIэлэеджэкIо анахь цIыкIухэм адыгабзэкIэ къыраIотыкIырэ нысхъэпэ къэгъэлъэгъонэу «Цыхьэ зэкIэми афэзышIырэ тхьакIумкIыхь» («Доверчивый зайчик») афызэхащагъ. МКъТУ-м истудентхэр актерыгъэх, ахэм пшысэ гъэшIэгъон къагъэлъэгъуагъ, финанс гъэпцIакIохэм уапэуцужьын зэрэплъэкIыщтыр къыраIотыкIыгъ. КIэлэеджакIохэм финансхэмкIэ яшIэныгъэхэм ахагъэхъоным, джащ фэдэу адыгабзэм IэпыIэгъу фэхъугъэным ыкIи ар лъыгъэкIотэгъэным пшысэр фэIорышIагъ.

Фестивалым Iофтхьэбзэ зэфэшъхьафхэр къыдыхэлъытагъэх. Университетым ыкIи АР-м финансхэмкIэ и Министерствэ зэгъусэхэу финанс компетенцием хэхъоныгъэ ышIыным дэлажьэх, культурнэ шэн-хабзэхэр къаухъумэх, социальнэ ыкIи финас ухъумэныр агъэпытэ.