Мыекъопэ къэралыгъо технологическэ университетымрэ АО-у «Альфа-Банк» зыфиIорэмрэ студентхэм амалэу аIэкIэлъхэм ахэгъэхъогъэным ыкIи зисэнэхьат хэшIыкI фызиIэ IофышIэхэр гъэхьазырыгъэнхэм фытегъэпсыхьэгъэ базэ гъэпсыгъэным акIуачIэ рахьылIагъ.

МКъТУ-м иректорэу Къуижъ Саидэрэ АО-у «Альфа-Банк» зыфиIорэм хэхьэрэ ДО-у «Краснодарскэм» ишъолъыр гъэIорышIакIоу Кирилл Шаталовымрэ мыщ фэгъэхьыгъэ зэзэгъыныгъэм зэдыкIэтхагъэх.

Iофтхьабзэм хэлэжьагъэх университетым ыкIи банкым ялIыкIохэр: АО-у «АЛЬФА-БАНК» зыфиIорэм икъутамэу «Майкопскэм» ипащэу Лъэустэн Тимур; МКъТу-м егъэджэн IофымкIэ ипроректорэу Людмила Задорожнаяр; научнэ IофшIэнымкIэ ыкIи инновационнэ хэхъоныгъэмкIэ проректорэу Татьяна Овсянниковар; цифровизациемкIэ проректорэу Дмитрий Игнатовыр. Мыщ фэдэ зэдэлэжьэныгъэм мэхьанэшхо зэриIэр ыкIи ар студентхэр къазэрэшъхьэпэщтыр лъэныкъохэм къыхагъэщыгъ.

Зэзэгъыныгъэм лъэныкъо зэфэшъхьафхэр къыдыхэлъытагъэх — егъэджэн-методическэ ыкIи научнэ проектхэм ягъэхьазырын, банкым ыкIи университетым Iоф ащызышIэхэрэм ясэнэхьат шIэныгъэхэм ахагъэхъоныр, МКъТу-м истудентхэм практикэр ыкIи стажировкэр афызэхэщэгъэныр.

Мэхьанэшхо зиIэ лъэныкъохэм ащыщ Альфа-Банкым испециалистхэр МКъТУ-м иегъэджэн IофшIэн къызэрэхэлэжьэщтхэр. Банковскэ экспертхэм мастер-классхэр, тренингхэр зэхащэщтых, конференциехэм къащыгущыIэщтых, шIэныгъэу аIэкIэлъымкIэ ныбжьыкIэхэм адэгощэщтых, стажировкэм амалэу къытыхэрэм, вакансиеу щыIэхэм ыкIи къыхахыгъэ сэнэхьатым гъэхъагъэхэр щашIынхэмкIэ амалэу щыIэхэм къатегущыIэщтых.

Зэзэгъыныгъэм ишIуагъэкIэ студентхэм ыкIи Мыекъопэ къэралыгъо технологическэ университетыр къэзыухыгъэхэм амалышIухэр аIэкIэлъ мэхъу.