2024-рэ илъэсым лэжьыгъэм иIухыжьын зэрэкIуагъэм изэфэхьысыжьхэм зыщатегущыIэгъэхэ ыкIи къуаджэм иIофышIэ анахь дэгъухэр зыщагъэшIогъэхэ мэфэкI Iофтхьабзэу «Лэжьыгъэм и Маф 2024» зыфиIорэр непэ зэхащагъ.

Ащ хэлэжьагъэх Мыекъопэ къэралыгъо технологическэ университетым ипрофессорхэр, икIэлэегъаджэхэр, МКъТУ-м мэкъумэщ хъызмэтымкIэ инаучнэ-ушэтын институт иIофышIэхэр, аграрнэ технологиехэмкIэ факультетым истудентхэр.

Лэжьыгъэм и Мафэ Адыгэ Республикэм имэфэкI шъхьаIэхэм ащыщ, мы лъэныкъом щылажьэхэрэм яIофшIэн мэхьанэшхо зэриIэр ащ къеушыхьаты.

Шъолъырым и АПК джырэ уахътэм пэрытныгъэ зыIыгъхэм ащыщ, къэралыгъом игъомылэпхъэ щынэгъончъагъэ къэухъумэгъэным фэIорышIэ. Адыгеим иагропромышленнэ комплекс непэ зыгъэпсырэр наукэмрэ технологиякIэхэмрэ. Мэкъумэщ хъызмэтым Iоф щызышIэщтхэм ягъэхьазырынкIэ шъолъырым опытышхо иI. Мы лъэныкъомкIэ апшъэрэ еджэпIэ шъхьаIэу республикэм иIэр Мыекъопэ къэралыгъо технологическэ университетыр ары. Тиапшъэрэ еджапIэ къэзыухыгъэхэм ащыщыбэхэр джырэ уахътэм республикэм и АПК щэлажьэх, шъолъырым лэжьыгъэ бэгъуагъэ къыщахьыжьыным яIахьышIу халъхьэ.

Мыщ епхыгъэ научнэ-ушэтын институтым зэрифэшъуашэу ипшъэрылъхэр егъэцакIэ, Адыгеим имэкъумэщ хъызмэт хэхъоныгъэ ышIыным дэлажьэ. 

Илъэс къэс шъолъырым иаграриехэр шIуагъэ къэзытыщт лэжьыгъэ лъэпкъ зэфэшъхьафхэм, апхъырэ кIэхэм нэIуасэ афашIых, селекцием Iоф дашIэ, научнэ ыкIи упчIэжьэгъу Iофтхьабзэхэр рагъэкIокIых, мы пстэури щыIэныгъэм зэрэщыбгъэфедэн плъэкIыщтым тегущыIэх.