Адыгэ Республикэм финансовэ гъэсэныгъэм и Фестивалэу Мыекъопэ къэралыгъо технологическэ университетым щызэхищагъэм зеушъомбгъу.

Адыгэ Республикэм финансовэ гъэсэныгъэмкIэ Шъолъыр гупчэу иIэм зэхищэгъэ Iофтхьабзэхэм ныбжь зэфэшъхьафхэр зиIэхэр къыхеубытэх: кIэлэеджакIохэр, студентхэр, пенсионерхэр, онлайн шIыкIэм тетэу е офлайнэу егъэджэнхэр акIу. Апшъэрэ еджапIэмэ ыкIи гурыт хэушъхьафыкIыгъэ еджапIэмэ ястудентмэ апае онлайн-олимпиадэхэр ыкIи тестированиехэр зэхащагъэх. Ащ хэлажьэхэрэр еджэхэзэ амалэу ыкIи шIэныгъэу яIэр зыфэдэр аушэтын алъэкIыгъ. Программэм лекциехэр, мастер-классхэр, финансовэ лъэныкъохэр къыхэзыгъэщхэрэр зэкIэ хэхьагъэх.

Финансовэ гъэсэныгъэмкIэ Фестивалым иапэрэ тхьамафэ студентхэр куоу хилъэсагъэх унэе финансхэм ыкIи экономическэ щынэгъончъэным афэгъэхьыгъэ темэмэ. Опытышхо зыIэкIэлъ специалистхэр ары лекторэу яIагъэхэр: экономикэ шIэныгъэхэмкIэ кандидатэу, Адыгэ Республикэм финансовэ гъэсэныгъэмкIэ и Шъолъыр гупчэ ипащэу Татьяна Паладовар  ыкIи специалистэу Мамыекъо Людмилэ.  Аужырэр лекциеу къызэджагъэр финансовэ планированием фэгъэхьыгъагъ. Тэрэзэу финансхэм алъэныкъокIэ планыр бгъэнэфэным мэхьанэ зэриIэр, пшъэрылъэу бгъэуцугъэхэм уанэсын зэрэплъэкIыщтыр студентмэ ашIагъ. Федэмрэ хъарджымрэ зэрэзэтебгъэфэжьыщтхэр, инфляциер, экономическэ лъэныкъохэр къызэрэдэплъытэщтхэр ащ къыIотагъэх.

ЯтIонэрэ лекцием Урысыем ибанковскэ лъэныкъохэм ащытегущыIагъэх. Хэгъэгум иэкономикэ хэхъоныгъэхэр егъэшIыгъэнхэмкIэ банкмэ шIуагъэу къатырэр, непэрэ технологиехэр бакновскэ продуктмэ зэряпхыгъэхэр студентмэ зэрагъэшIагъ. Цифрэ сервисмэ яуахътэ къызэрэсыгъэр, IофыгъуакIэхэм защыбгъэгъозэн ыкIи зябгъэсэн зэрэфаем иупчIэхэм ягугъу ашIыгъ.

Татьяна Паладовам къызэриIотагъэмкIэ экономикэм хэшIыкI фыуиIэным ыкIи финансхэр тэрэзэу бгъэзекIонхэм мылъку  зэIугъэкIэгъэныр къакIэлъэкIо. Лекторым студентмэ агуригъэIуагъ акъылыгъэ хэлъэу финансхэм уазэрэдэзекIощтыр ыкIи ащ фэдэ финансовэ зэхашIэ уиIэным укъызэрэфэкIощтыр. Финансовэ планирование пшIыгъэ хъумэ, ахъщэм иухъумэн мэхьанэшхо зэриIэр  Татьяна Паладовам илекцие къыщыхигъэщыгъ. Ащ къыкIигъэтхъыгъ страховкэм мылъкум икъэухъумэнкIэ шIуагъэ къызэритырэм дакIоу, финансовэ къин чIыпIэ уифэми къызэрэбдеIэрэр.

Финансовэ гъэсэныгъэм и Фестиваль къыдыхэлъытагъэу пенсионерхэм апае лекцие къеджагъэх, ар финансовэ гъэпцIакIохэм афэгъэхьыгъагъ. Схемэ зэфэшъхьафхэр зыгъэфедэрэ гъэпцIакIомэ зызэращыухъумэщтыр, ахэр къызэрэхэбгъэщыщт шIыкIэхэр едэIурэмэ ашIагъ. «Банкмэ ящынэгъончъэ къулыкъумэ» къашIырэ телефон одыджынхэр, нэпцI инвестиционнэ схемэхэр зэрэпцIыхэр къэзгъэлъагъорэ шIыкIэхэр лектормэ къаIотагъэх.

Ащ фэшъхьафэу Сбербанкым иIофышIэмэ мастер-классхэр зэхащагъэх. Пшъэрылъышхомэ апае ахъщэ зэIубгъэкIэнымкIэ финансовэ шIыкIэхэр тэрэзэу къыхэпхышъуным фэгъэхьыгъэ лекциехэми ядэIугъх, ахэр нахьыбэрэмкIэ псэупIэм, гъэсэныгъэм ыкIи зекIоным атегъэпсыхьэгъагъэх. Банкым илIыкIомэ къядэIухэрэр щагъэгъозагъэх банкмэ ахъщэ зэращыпIыгъыщтхэр, счетхэр къызэрэзэIупхыщтхэр, инвестициехэр тэрэзэу зэрэпшIыщтхэр. Практическэ джэнджэшхэр студентмэ агъотыгъэх, федэ къыхагъэкIызэ ахъщэр агъэзекIошъуным, щынэгъончъэу псэушъунхэм фэшI къыдалъытэнэу щыт лъэынкъохэр агъэнэфагъэх.

Финансовэ гъэсэныгъэм и Фестиваль кIэлэцIыкIухэм  ыкIи зипсауныгъэ зэщыкъуагъэ сабыйхэм къащегъэжьагъэу зэкIэ цIыфхэр зэлъеубытых. КIэлэцIыкIумэ апае «Финансовэ гъэсэныгъэмкIэ кIэлэцIыкIу сурэтхэм ябжыхьэ Марафон» рагъэкIокIы. Сабыймэ финансхэм ядунай хэшIыкIэу фыряIэр сурэтхэмкIэ къырагъэлъэгъукIы. Анахь IофшIэгъэ дэгъухэр Tелеграм-каналэу РЦФГ РА иIэм къырагъэхьащтых. ТекIоныгъэ къыдэзыхыщтхэм дипломхэмрэ шIухьафтынхэмрэ къяжэх, ахэр ятворческэ амалхэм яхэхъоныгъэ фэлэжьэщтых.

КъыкIэлъыкIощт тхьамафэр джыри анахь ушъэгъэнэу щыт. ДжэгукIэ шIыкIэр агъэфедэзэ тренингхэр зэхащэщтых, ащ «Унэе финансовэ планыр», «Гухэлъым инвестициехэр халъхьэ», «Инвестициехэр», «Такъикъ 60-м къыкIоцI къэгъахъ» зыфиIохэрэр хэтыщтых. УблэпIэ еджапIэу №1-м МКъТУ-м истудентмэ театрализованнэ къэгъэлъэгъонэу «ЦыхьэшIэгъу тхьакIумкIыхьэр» адыгабзэкIэ къыщатыщт. АщкIэ сабыйхэр финансхэр тэрэзэу гъэзекIогъэнхэм фагъэсэщтых. Тхьамафэм икIэухым партиеу «Единэ Россием» и Штаб площадкэу иIэм Iэнэ хъурае щызэхащэщт.