Мы мафэхэм къалэу Москва я X-рэ Урысые премиеу «Наукэм зэрэфэшъыпкъэм фэшI» зыфиIорэм илауреат хъугъэхэр къыщаIопщыгъэх. Лъэныкъоу «Урысые наукэр — дунаим» зыфиIорэмкIэ (Циолковский Константин Эдуард ыкъом ыцIэ ехьы) текIоныгъэ къыдихыгъ Дунэе фестивалэу NAUKA 0+ зыфиIорэм.

Илъэс 12-м къыкIоцI Мыекъопэ къэралыгъо технологическэ университетыр гъэсэныгъэ проектышхом хэлажьэ, наукэм зегъэушъомбгъугъэным иIахь арэущтэу хелъхьэ. Фестивалэу NAUKA 0+ зыцIэм ишIуагъэкIэ студентхэм, кIэлэеджакIохэм ыкIи шIэныгъэр зикIасэ пстэуми непэрэ технологиехэмрэ экспериментхэр зыщашIырэ дунай гъэшIэгъонымрэ янэрылъэгъу мэхъу.

Наукэм и Урысые фестиваль университетым щырагъэкIокIын амал загъотыгъэр 2013-рэ илъэсым Фестивалым и Дирекцие (МГУ, Москва) апшъэрэ еджапIэм иплощадкэ статусыр зегъэнафэм ыуж. МКъТУ-м Фестивалыр щызэхащэныр зигукъэкIхэр ыкIи зигукъыдэчъхэр ректорэу Къуижъ Саидэрэ научнэ IофшIэнымкIэ ыкIи инновационнэ хэхъоныгъэмкIэ проректорэу Татьяна Овсянниковамрэ. Наукэм имэфэкI изэхэщэнкIэ IэпыIэгъу къафэхъурэр гъэсэныгъэмрэ шIэныгъэмрэкIэ Адыгэ Республикэм и Министерств. Iофтхьабзэм апэ зещакIо фэхъугъэр маркетингым, сервисым ыкIи туризмэм якафедрэ идоцентэу, «Точка кипением» ипрограммнэ пащэу Светлана Новиковар, джырэ уахътэм а Iофыр зыгъэцакIэрэр экологием ыкIи тыкъэзыуцухьэрэ дунаир къэухъумэгъэнымкIэ кафедрэм идоцентэу, биологие шIэныгъэхэмкIэ кандидатэу Любовь Вавиловар ары.

Научнэ IофшIэным пылъ IофшIакIомэ якомандэрэ деканмэ наукэмкIэ ягуадзэхэмрэ гъэ къэс дэлажьэх наукэм имэфэкI агу къинэжьыным, анахь лъэгэпIэ инхэм анэсэу агъэпсыным.

Наукэм и Фестиваль МКъТУ-м зыщырагъэкIокIырэ илъэсхэм гъусэгъоу иIагъэх экономикэ секторым хэт хъызмэтшIапIэхэр, шIэныгъэ-ушэтын институтхэр, къалэм итворческэ купхэр, тхылъеджапIэхэр, мыкоммерческэ организациехэр, зэфэшъхьаф гъэсэныгъэ учреждениехэр. Илъэс къэс рагъэкIокIырэ Iофтхьабзэм нэбгырэ 800-м къыщегъэжьагъэу 2000-м нэс хэлажьэ.

Фестиваль NAUKA 0+ — ар шIэныгъэм зегъэушъомбгъугъэнымкIэ дунаим ипроект анахь инхэм ащыщ, Урысыем ишъолъыр 80-мэ площадкэ 1000 ащеубыты. Фестивалым къыдыхэлъытагъэу шIэныгъэ лекциехэм къяджэх, интерактивнэ къэгъэлъэгъонхэр зэхащэх, виртуальнэ лабораториехэр агъэпсых, шIэныгъэ спектаклэхэр агъэуцух, фильмэхэр къагъэлъагъох цIыфлъэпкъым инеущрэ мафэ зэрагъэзафэ.

— Урысые Федерацием инаукэ тиIахь зэрэхэтлъхьашъурэм тэ тегъэгушхо. Фестивалэу NAUKA 0+ зыцIэр тиуниверситет итарихъ зы нэкIубгъо шIагъоу щыщ хъугъэ. Илъэс къэс IофшIэгъакIэхэр къызэIутэхых, ныбжьыкIэхэм амал ятэгъэгъоты шIэныгъэм идунэе шIагъо хэхьанхэу, технологиякIэхэм защагъэгъозэнэу, — къыддэгощагъ Любовь Вавиловар.