Непэ Мыекъопэ къэралыгъо технологическэ университетым щырагъаджэхэрэмрэ иIофшIакIохэмрэ яконференциеу ШIэныгъэлэжьхэм ясовет ихэдзынхэм афэгъэхьыгъэу зэхэщагъэм МКъТУ-м иректорэу Къуижъ Саидэ игъэкIотыгъэ доклад къыщишIыгъ,  IэпыIэгъу хэушъхьафыкIыгъэ дзэ операцием хэлажьэрэмэ ыкIи яунагъомэ арагъэкIынымкIэ IофшIэнышхоу агъэцакIэрэм ар фэгъэхьыгъагъ

Апшъэрэ еджапIэм иIофышIэмэ гъогогъу пчъагъэрэ ахъщэ агъахьыгъ гуманитарнэ IэпыIэгъу мобилизованнэхэмрэ дзэкIолIхэмрэ афащэнхэм афэшI.

2024-рэ илъэсым ичъэпыогъу мазэ и 1-м ехъулIэу хэушъхьафыкIыгъэ дзэ операцием хэлажьэрэмэ ащыщэу нэбгыри 156-рэ МКъТУ-м щеджэ, хэлажьэрэмэ якIалэу 123-рэ. ХэушъхьафыкIыгъэ дзэ операциер зыкIорэм къыщегъэжьагъэу студенти 184-рэ ащ хэлэжьагъ, ахэмэ ащыщ 36-мэ лIыхъужъыгъэу зэрэхьагъэхэм афэшI къэралыгъо бгъэхалъхьэхэр къафагъэшъошагъэх.

Зэтыгъо ахъщэ IэпыIэгъур университетым истудентхэу очнэ шIыкIэмкIэ еджэхэрэм араты, ар федеральнэ бюджетым къыхэкIы: хэушъхьафыкIыгъэ дзэ операцием хэлажьэрэмэ сомэ мин 20 зырыз, яунагъохэм сомэ мин 15. Ащ фэшъхьафэу, лъапсэ иIэ хъумэ, джыри сомэ мин 5 мазэ къэс ахъщэ тедзэу араты, МКъТУ-м ишхапIэ зэрэщышхэхэрэм ыпкIэ афырагъэгъэзэжьы.

ХэушъхьафыкIыгъэ дзэ операцием хэлажьэрэмэ IэпыIэгъу афэхъугъэным фэгъэхьыгъэ Iофтхьабзэхэм университетыр чанэу ахэлажьэ.

МКъТУ-м и Акселераторэу «ИнноВектор» зыфиIорэм къыдыхэлъытагъэу технологхэмрэ айтишникхэмрэ, инженерхэмрэ медикхэмрэ инновационнэ творчествэм ипроцесс зэлъиштагъэх, проектхэу «Разработка технологии производства индивидуального рациона питания (ИРП), обогащенного витаминно-минеральным комплексом, для военнослужащих» зыфиIохэрэм адэлэжьагъэх. Джащ фэдэу пилот зэрымыс быбырэ аппаратхэм хэхъоныгъэ ягъэшIыгъэным фэгъэхьыгъэ проектхэм ягъэпсыни дэлажьэх, нэмыкIхэми Iоф адашIэ.

МКъТУ-м иIофшIэкIо куп ректорэу Къуижъ Саидэ ыцIэкIэ отрядэу «СОЮЗ» зыцIэм и Командование Рэзэныгъэ тхылъ къыфигъэшъошагъ, университетым ренэу IэпыIэгъу зэраригъэкIырэм фэшI. Ащ итхэгъагъ: «Шъуигражданскэ екIолIакIэ, шIур зыпыкIырэ гоу шъуиIэхэр — тидзэкIолIхэмкIэ осэшхо-Iахьышху. Тызэгъусэу типшъэрылъ тыфэкIощт, ТекIоныгъэр къыдэтхыщт!»