МКъТУ-м и ШIэныгъэлэжьхэм ясовет хэтыщтхэр кIэу хэдзыгъэнхэм афэгъэхьыгъэ конференцие Мыекъопэ къэралыгъо технологическэ университетым непэ щыкIуагъ, ащ хэлэжьагъэх IофшIакIохэмрэ студентхэмрэ. Мы органыр анахь мэхьанэ ин университетымкIэ  зиIэхэм ащыщ, ащ хэтынэу хадзыгъэхэм илъэситф благъэм Iоф ашIэщт.

Конференцим лыкIуи 101-рэ хэлэжьагъ, ахэмэ кIэлэегъаджэхэр, студентхэр, IофшIакIохэр къагъэлъагъощтыгъэх, университетым иIофшIэкIо купмэ къыхадзыгъэх.

Конференциер къызэIуихызэ МКъТУ-м ипрезидентэу, профессорэу ТхьакIущынэ Аслъан къыкIигъэтхъыгъ ШIэныгъэлэжьхэм ясовет мэхьанэу иIэр, университетым хэхъоныгъэ егъэшIыгъэным ар зэрэфэлажьэрэр. Ащ къызэриIуагъэмкIэ, МКъТУ-р къызызэIуахыгъэм къыщегъэжьагъэу гъогу шIагъо къыкIугъ, ар зишIушIагъэр Iоф щызышIэхэрэмрэ рагъаджэхэрэмрэ.

— Сицыхьэ пытэ телъ джырэ советым хэхьащтхэм МКъТУ-м ишIэныгъэ ыкIи игъэсэныгъэ амалхэм ягъэпытэн епхыгъэ Iофхэу агъэцакIэщтыгъэхэр зэрэлъагъэкIотэщтхэм — къыIуагъ Аслъан Кытэ ыкъом.

МКъТУ-м иректорэу Къуижъ Саидэ лIыкIомэ закъыфигъэзагъ ыкIи игущыIэхэм ШIэныгъэлэжьхэм ясовет Iофэу ышIэрэм шIуагъэу къытырэ лъэныкъохэр къыхигъэщыгъэх, университетым иегъэджэн ыкIи ишIэныгъэ лъэныкъохэр гъэлъэшыгъэнхэмкIэ стратегическэ гухэлъэу щыIэхэми ашъхьэ къырихыгъ.

— Университетым илъэныкъо зэфэшъхьафхэмкIэ унашъохэр тшIынхэмкIэ ШIэныгъэлэжьхэм ясовет мэхьанэшхо иIэу щыт. Тэ типшъэрылъыр университетым хабзэ фэхъугъэ анахь Iофыгъо шIагъохэр лъыдгъэкIотэнхэр ыкIи непэрэ мафэм диштэу ахэр дгъэпсыжьынхэр ары, — къыкIигъэтхъыгъ Саидэ Казбек ыпхъум.

Ащ ыуж шъэф шIыкIэм тетэу хэдзынхэр рагъэкIокIыгъэх, ШIэныгъэлэжьхэм ясовет лIыкIо 56-рэ хэхьагъ. Кафедрэмэ япащэхэри, шIэныгъэлэжьхэри, студентхэри советым щыщэу хъугъэх. Хадзыгъэхэм афэшъхьафэу яIэнатIэкIэ ШIэныгъэлэжьхэм ясовет хэтых МКъТУ-м ипрезидент, ректорыр, проректорхэр ыкIи факультетмэ ядеканхэр. Ащ фэдэ купым лъэныкъохэр зэкIэ къыдилъытэхэзэ лэжьэн елъэкIы.