Непэ Мыекъопэ къэралыгъо технологическэ университетым апэрэ курсым щеджэхэрэм апае физкультурнэ-зыгъэпсэфыпIэ Iофтхьабзэу «ЕгъэжьэпIэ шIагъохэр» зыфиIорэр щыкIуагъ.

Къэзэрэугъоигъэхэм шIуфэс псалъэкIэ закъыфагъэзагъ МКъТУ-м экологиемкIэ ифакультет идеканэу Галина Коноваловамрэ ныбжьыкIэ политикэмкIэ ыкIи гъэсэкIо IофшIэнымкIэ МКъТУ-м ипроректорэу БрантIэ Муратрэ. Апэрэ курсым щеджэрэмэ амалэу аIэкIэлъхэр къагъэлъэгъуагъэх, ахэр едзыгъо пчъагъэу зэтеутыгъагъэх, ары пэпчъ зэгурыIожьынрэ кIуачIэрэ ящыкIэгъагъ. «Анахь щэрыохэр» зыфиIорэ зэнэкъокъумкIэ Iофтхьабзэр аублагъ, дартсымкIэ команднэ пчъагъэхэр рагъэкъущтыгъэх, щабзэм рыонхэм ыпэкIэ упражнениеу ашIыхэрэм яIоф нахь къыгъэхьылъэщтыгъ.

Ащ ыуж командэхэр эстафетэм хэлэжьагъэх, яIэпэIэсэныгъэ къагъэлъэгъуагъ, зэфэшъхьаф лъэныкъохэмкIэ зэнэкъокъугъэх.

Анахьэу яплъыхэрэмэ анаIэ зытырадзагъэр капитанмэ язэнэкъокъоу «Нахь нэутхэр» зыфиIорэр ары — командэмэ япащэхэм гимнастическэ бэщхэр яIэпыIэгъухэу бжъэм хэшIыкIыгъэ Iэгуаохэр дзыомэ арагъэзыхьэщтыгъэх. Команднэ эстафетэу «Нахь зэпэблагъэхэр» зыфиIорэмкIэ Iофтхьабзэр аухыгъ. Ащ хэлэжьагъэмэ пшъэрылъыбэ зэшIуахыгъ, ахэмэ ахахьэщтыгъэх баскетбольнэ Iэгуаор бгъэIорышIэшъуныр, кIапсэм епкIэгъэныр ыкIи нэмыкIыбэхэу командэмэ языкIныгъэ къэзгъэлъагъощтыгъэхэр.

Хьыкум коллегием зэфэхьысыжьхэр зыщишIырэ уахътэм командэмэ афэбэнагъэхэр орэдым едэIугъэх ыкIи викторинэм иупчIэмэ джэуап къаратыжьыгъ. Зэнэкъокъум хэлэжьагъэхэми еплъыгъэхэми гушIогъо такъикъхэр къафихьыгъэх.

Зэнэкъокъум зэфэхьысыжьэу фашIыгъэмкIэ мыщ фэдэу чIыпIэхэр хъугъэх:

а 1-рэ чIыпIэр — мэкъу-мэщ технологиехэм яфакультет;

я 2-рэ чIыпIэр — инженернэ факультет;

я 3-рэ чIыпIэр — экономикэм ыкIи юриспруденцием яинформационнэ системэхэм яфакультет;

я 4-рэ чIыпIэр — экономикэм ыкIи гъэIорышIэным яфакультет;

я 5-рэ чIыпIэр — технологическэ факультет;

я 6-рэ чIыпIэр — экологическэ факультет;

я 7-рэ чIыпIэр — фармацевтическэ факультет;

я 8-рэ чIыпIэр — лечебнэ факультет.

ТекIоныгъэ къыдэзыхыгъэми хэлэжьагъэхэми тафэгушIо, чаныгъэ къызхэзгъэфагъэмэ тафэраз, тапэкIи къызэкIэмыкIонхэу тафэлъаIо!