Мыекъопэ къэралыгъо технологическэ университетым иIофышIэхэм япрофсоюзнэ организацие ия VIII-рэ зэфэхьысыжь-хэдзын конференцие щыкIуагъ. Университетым исообществэ, Адыгеим иобщественнэ IофышIэхэр ыкIи Темыр Кавказым ялIыкIохэр конференцием къырагъэблэгъагъэх.

Конференцием иIофшIэн хэлэжьагъэх: МКъТУ-м иректорэу, экономикэ шIэныгъэхэмкIэ докторэу Къуижъ Саидэ; гъэсэныгъэмкIэ Урысые Профсоюзым и Адыгэ республикэ организацие итхьаматэу Сергей Кошкиныр; Темыр-Кавказ федеральнэ шъолъырым иапшъэрэ еджапIэхэм япрофсоюзхэм я Координационнэ совет итхьаматэу, Дагъыстан къэралыгъо университетым ипрофессорэу Нухкади Рабазановыр; Координационнэ советым ипащэ игуадзэу, доцентэу Виктор Мельниковыр.

Профсоюзнэ комитетым Iоф зэришIагъэм зэфэхьысыжьхэр фашIыгъэх ыкIи уплъэкIун-ревизионнэ комиссием аужырэ илъэситфым ышIыгъэ уплъэкIунхэм ыпэ рапшIэу конференцием щатегущыIагъэх. IофшIакIомэ яфитныгъэхэр къызэраухъумэхэрэм, IофшIэнымкIэ гумэкIыгъохэр дэгъэзыжьыгъэнхэм, социальнэ фэгъэкIотэнхэм зягъэушъомбгъугъэнхэм, нэмыкI Iофыгъохэм ягугъу щашIыгъ.

Унашъоу ашIыгъэхэм ащыщых структурэм иIофшIэн гъэлъэшыгъэныр, профсоюзым шIуагъэу къытырэм хэгъэхъогъэным дэлэжьэгъэныр. ГъэцэкIэкIо органыр ащ елъытыгъэу зэхащагъ, ащ пэщэныгъэр 2029-рэ илъэсым нэс ыгъэцэкIэщт. Ащ фэшъхьафэу МКъТУм ипрофсоюзхэм якомитетрэ ипрезидиумымрэ хадзыгъэх. Ахэр ары IофшIакIохэмрэ студентхэмрэ яфитныгъэхэр къэзыухъумэщтхэр.

Iофэу ашIэрэр нэрылъэгъоу ыкIи къэбзагъэ хэлъэу рагъэкIокIыным фэшI, уплъэкIун-ревизионнэ комиссием хэтыщтхэр кIэу хадзыгъэх. Iофтхьабзэм мэхьанэ зиIэ Iахьэу щытегущыIагъэх гъэсэныгъэмкIэ Урысые Профсоюзым и Адыгэ республикэ организацие конференциеу ригъэкIокIыщтым хэлэжьэщт делегатхэм яхэдзын, джащ фэдэу организацием и Совет хэхьащт лIыкIохэм якъэгъэлъэгъон.

МКъТУ-м и Профсоюз организацие тхьаматэу 2029-рэ илъэсым нэс Iоф ышIэнэу хадзыжьыгъ технологиехэм, машинэ ыкIи гъомлэпхъэ производствэм яIэмэ-псымэхэм якафедрэ ипащэу, техническэ шIэныгъэхэмкIэ докторэу Сихъу Хьазрэт. Илъэс зэкIэлъыкIохэм къакIоцI Сихъу Хьазрэт профсоюзыр ыгъэлъэшын ылъэкIыгъ, нэмыкI профсоюзнэ организациехэм зэдэлэжьэныгъэ дэгъу адигъэпсыгъ.

МКъТУ-м и Профсоюзнэ организацие студентхэмрэ IофшIакIохэмрэ яшIоигъоныгъэхэр къыухъумэхэзэ тапэкIи лэжьэн гухэлъ иI. Гъэсэныгъэ гупчэу ыкIи республикэм исоциальнэ лъэныкъо хэхъоныгъэ езыгъэшIэу щыт университетыр профсоюзым нахь къыгъэлъэшыщт.