Непэ Мыекъопэ къэралыгъо технологическэ университетым сэнэхьатыр къыхэхыгъэнымкIэ анахь Iофтхьэбзэ шъхьаIэу Адыгэ Республикэм икIэлэеджакIомэ афэгъэхьыгъэр щыкIуагъ — пчъэ зэIухыгъэмэ я Мафэ.

Мы мафэр еджапIэмэ къачIатIупщыщтхэмкIэ мэхьанэ зиIэ едзыгъоу зыкIэхъурэр гъэсэныгъэ программэхэм нэIуасэ афэхъунхэмкIэ амалхэр агъотхэшъ ары, ащ дакIоу университетым ищыIэкIэ-псэукIэ зыфэдэм зыщагъэгъуазэ. Мыекъопэ къэралыгъо технологическэ университетым къапигъохрэ егъэджэнхэр зыфэдэхэр нахь куоу апшъэрэ классмэ ащеджэрэмэ зэрагъашIэ.

Мы илъэсым пчъэ зэIухыгъэхэм я Мафэу рагъэкIокIырэр адрэхэм къазэрэхэщырэр шIэныгъэхэм яя XII-рэ Фестивалэу Урысые Фестивалэу NAUKA 0+ зыфиIорэм къыдыхэлъытагъэу зэхащэрэм зэрэрагъэгъусагъэр ары. Хъугъэ-шIэгъитIур зэрэзэхэщагъэхэм апкъ къикIыкIэ программэм нахь зырагъэушъомбгъун алъэкIыгъ, мэфэкI нэшанэ Iофтхьабзэм иIэу хъугъэ, къычIахьэрэ пэпчъ ыныбжь емылъытыгъэу ежь шIогъэшIэгъоныр къыхихын ылъэкIынэу зэтырагъэпсыхьагъ.

ХьакIэмэ апае интерактивнэ площадкэ 63-рэ агъэхьазырыгъагъ, ахэмэ ащыIагъэхэр университетым гъэсэныгъэ программэ зэфэшъхьафэу иIэхэм нэIуасэ ащыфэхъугъэх, зэмылIэужыгъо мастер-классхэм ахэлэжьагъэх, научнэ амалышIоу къапагъохыхэрэр зэрагъэлъэгъугъ. Площадкэ пэпчъ зэтырагъэпсыхэгъагъэ гъэсэныгъэ программэ шъхьафым, темэ шъхьафым куоу хьакIэхэм зыщагъэгъозэшъуным, сэнэхьатыкIэр зыфэдэр, ащ илъэныкъуабэхэр зэрагъэшIэшъуным иамалхэр щагъотыгъэх.

Интерактивнэ площадкэу «Инженернэ гупшысэным ишъолъыр: мыщ неущрэ мафэр щытэгъэпсы» зыфиIорэм мастер-классэу «Транспортнэ логистикэр: лъэхъаныкIэр — сэнэхьатыкIэхэр» зыцIэр щыкIуагъ. Мастер-классым хэлэжьагъэ пэпчъ транспортнэ логистикэм зыщигъэгъозагъ, практическэ десэхэр къышIыгъэх, хьылъэзещэнымкIэ Iофтхьабзэхэр зэхищагъэх ыкIи тренажерымкIэ къыхахыгъэ гъогум рыкIуагъэх.

Мастер-классэу «Радиоэлектроникэр ыкIи робототехникэр езгъэжьэгъакIэхэм апай» зыфиIорэм контроллерэу Arduino ылъапсэу ащ хэлажьэхэрэр нэIуасэ фэхъугъэх. Хьисапым, физикэм ыкIи системнэ анализым якафедрэ иинженерэу Владимир Беляевым радиоэлектроннэ схемэхэм яугъоин зэрашIырэр къаригъэлъэгъугъ, мобильнэ роботхэм яшIын едзыгъо зэфэшъхьафэу иIэхэми ащагъэгъозагъэх, макетнэ платэм исхемэ къызэрыкIохэри аугъоигъэх.

Площадкэу «Лаборатория Литвинова» зыфиIорэм щыIагъэхэм чIыгоу гъогухэм ыкIи унэхэм яшIынкIэ агъэфедэхэрэм язытет зэрагъэшIагъ, промышленнэ производствэм, геологоразведкэм ыкIи научнэ анализэу трансформационнэ процессхэмкIэ чIыгум щагъэфедэхэрэр аушэтыгъэх.

Экономикэ шIэныгъэхэмкIэ кандидатэу, чIыгу гъэпсынымкIэ кафедрэм идоцентэу Ирина Селивановам мастер-классэу «Геодезием гъэшIэгъонэу хэтыр» зыфиIорэр зэрищагъ ыкIи Iофтхьабзэм хэлажьэхэрэр геодезиемрэ картографиемрэ нэIуасэ афишIыгъэх, псэолъэшIынымрэ чIыгу гъэпсыныгъэмрэкIэ ахэр ары лъапсэ шъыпкъэу щытхэр.

Мастер-классэу «Апэрэ IэпыIэгъур ядгъэкIынэу зытэгъасэ» зыфиIорэм хэлэжьагъэ хьакIэхэм макIэп кIэу зэрагъэшIагъэр, къин чIыпIэ узифэрэм узэрэзекIощтыр къагурыIуагъ. Экологием ыкIи тыкъэзыуцухьэрэ дунаим якафедрэ идоцентэу Сулиет Киздермишовам шIэныгъэу зэбгъэгъотырэр зэримыкъущтыр, цIыфхэр къэгъэнэжьыгъэнхэмкIэ ыкIи машIохэр гъэкIосэгъэнхэмкIэ гукъыдэчъыр игъусэнэу зэрэщытыр зэхаригъэшIагъ.

Мастер-классэу «Техносферэм неущрэ мафэр къыфэтыухъумэн» зыцIэм приборхэу экологиер зыуплъэкIухэрэр зэрэщыIэхэр, псым, жьым, чIыгум ыкIи радиационнэ зытетыр ахэмкIэ зэрауплъэкIухэрэр зещакIом къыIотагъэх.

Площадкэу «Биосферэм къыщегъэжьагъэу техносферэм нэсэу: hardskills ыкIи softskills» зыфиIорэм пчъэ зэIухыгъэхэм я Мафэ ыкIи шIэныгъэхэм я Фестиваль къадыхэлъытагъэу экологическэ гъэлъэшыгъэ шIыкIэм нэIуасэ фэхъугъэх. Ащ ишIуагъэкIэ хьакIэхэр неущрэ мафэм исэнэхьат зыфэдэщтыр зэрагъэшIагъ, инженер-экологхэм янепэрэ ушэтынхэм ащыгъозагъэх.

Площадкэу «Ландшафтнэ-архитектурнэ ыкIи мэз хъызмэт технологиехэр» зыфиIорэм мастер-классэу «Сэр-сэрэу сыландшафтнэ архитектор» зыцIэр щыкIуагъ. Ащ хэлажьэхэрэр ландшафтнэ дунаим хэхьагъэх, ащ иархитектурэ зэрагъэлъэгъугъ. Сэнэхьатым епхыгъэ шъэфыбэмэ ащыгъозагъэх, чIыгу Iахьхэр проект зэрашIыхэрэр, нэмыкI лъэныкъуабэхэр зэрагъэшIагъэх.

Площадкэу «Лъэныкъо гупсэм ичъыгхэр» зыфиIорэм квиз гъэшIэгъон щыкIуагъ, ар Темыр Кавказым ичIыопс фэгъэхьыгъагъ. ХьакIэхэм дендрологическэ гъэлъэшыгъэ шIыкIэр акIугъ, ащ квиз шапхъэмкIэ чъыгхэм язытет, къапыкIэрэ пхъэшъхьэ-мышъхьэхэр, чылапхъэхэр зэрагъэлъэгъугъэх.

«КъэкIхэрэм ядунэе шIагъу» зыфиIорэ площадкэм квизэу щыкIуагъэр тыкъэзыуцухьэрэ дунаим фэгъэхьыгъагъ. ДжэгукIэу акъылыгъэ зыхэлъыгъэм хэлэжьагъэхор къэкIыхэрэм ядунэе шъэф хэхьагъэх, яшIэныгъэхэм ахагъэхъуагъ. Мастер-классэу «Прививай-ка!» зыфиIорэм ишIуагъэкIэ прививкэ зэфэшъхьафыбэу щыIэхэм, ахэр зыфэгъэхьыгъэхэм хьакIэхэм защагъэгъозагъ, анахь тэрэзхэр къызэрэхэпхыщтхэр, ащ ишъэфхэр зэрагъэшIагъэх.

Фестивалым къыдыхэлъытагъэ площадкэу «Агропромышленнэ ыкIи гъомлэпхъэ технологиехэр» зыфиIорэм мастер-классэу щыкIуагъэр пхъэшъхьэ-мышъхьэхэм ахэшIыкIыгъэ гъомлэпхъэ хьаджыгъэхэм ыкIи мыIэрысэ, санэ шъонхэм, ахэр зэрашIыхэрэм къащытегущыIагъэх. Абитуриент хъущтхэр ыкIи хьакIэхэр щыгъозагъэх хьаджыгъэхэр лъэныкъуабэхэмкIэ зэрагъэфедэхэрэм. Университетым илабораторие щаушэтырэ хьаджыгъэхэри зэхахьэм къыщагъэлъэгъуагъэх, ахэр гъомлэпхъэ промышленностым зэрэщыбгъэфедэшъущтхэр къаIотагъэх.

Глютен зыхэмылъ шIум ыкIи функциональнэ продуктхэм афэгъэхьыгъэ площадкэм лъэтегъэуцо щыкIуагъ, ащ непэрэ уахътэм цIыфымкIэ зиягъэ къэмыкIорэ шхыныгъохэм нэIуасэ щафэхъугъэх.

Инновационнэ продуктхэм афэгъэхьыгъэ площадкэм инновационнэ продуктым лъэтегъэуцо щыфашIыгъ — хьалыгъоу функциональнэ мэхьанэ зиIэм, къэб щытIагъэр хэгъэкIухьагъэу. Ащ фэдэ хьалыгъум органическэ кислотхэр, клетчатэр, пектиновэ веществахэр ыкIи каротиноидхэр хэлъых, ахэм яшIуагъэкIэ гъомлапхъэр Iэзэгъу мэхъу. Ащ фэшъхьафэу Iэлэу къэкIыхэрэм ахэшIыкIыгъэ щэе лъэпкъ зэфшъхьафмэ лъэтегъэуцо афэхъугъэх. Ащ къыкIэлъыкIоу къое гъугъэм хэшIыкIыгъэ десертым, къуаеу «Матэ» лъэтегъэуцо фашIыгъ. «Матэм» иихынкIэ технологиеу агъэфедэрэр зэрагъэшIагъ, ащ игъэгъун тхьамэфитIу-щы зэрэтекIуадэрэми щыгъозагъэх.

Площадкэу «Использование свеклы столовой в производстве круассанов и рисовой мучки в безглютеновых изделиях» зыфиIорэм лъэтегъэуцо щашIыгъ, шхыныгъохэм ахэIагъэх, хьалыгъу ыкIи кондитерскэ гъомлапхъэхэм яшIын пылъ Iофыгъохэр зэрагъэшIагъэх, ахэмкIэ хабзэу щымытэу агъэфедэхэрэм яшъэфхэм ащыгъозагъэх.

Мастер-классэу «Сокосодержащие напитки профилактического назначения и функциональный десерт на основе экстрактов» зыфиIорэм шъон зэфэшъхьафхэр, десертхэр къыщагъэлъэгъуагъэх, Адыгэ Республикэм къыщыдагъэкIырэ сырьехэм ахэр ахэшIыкIыгъэх. Мастер-классым иятIонэрэ Iахь десертхэм ябэдзэр хэхъухьэрэ Iофыгъохэм ашъхьэ къащырахыгъ, IэшIугъэу акIэлъыр зыфэдэр зэрагъэшIагъ.

Технологиехэм, машинэхэм ыкIи гъомлэпхъэ производствэхэм яоборудованиехэм якафедрэ иассистентэу Нарэк Навасардян мастер-классэу ригъэкIокIыгъэм хэлэжьагъэхэм къэкIырэ экстрактхэр агъэфедэхэзэ хабзэ хъугъэ десертхэр ашIыгъэх, ащ ишIыкIэ икъоу зэрагъэшIагъ.

Мастер-классэу «Микроскопирование бактериальных форм, плесневых грибов и дрожжей» зыфиIорэм дунэе цIыкIум нэIуасэ щыфэхъунхэу амал хьакIэхэм агъотыгъ, микроорганизмэхэр аушэтыгъэх, ахэр нэхэм алъэгъухэрэп, ау чIыпIэ аубыты. Микроскопием иамалхэм язэгъэшIэн мэхьанэу иIэр хьакIэмэ къафаIотагъ, микродунаим ишIуагъэкIэ гъомлапхъэхэм ягъэхьазырынкIи фармацевтическэ ыкIи мэкъу-мэщ отраслэхэм шIэныгъэ лъапсэ афэшIыгъэнымкIи хэхъоныгъэхэр ашIых.

Мастер-классэу «Шъоум идэгъугъэ зэрэзэхэпфыщтыр» зыфиIорэм хэлэжьагъэмэ шъоум фэгъэхьыгъэ къэбарэу бэ зэрагъэшIагъэр, ащ фэдэ лъэпкъ зэфэшъхьафыбэу щыIэмэ нэIуасэ афэхъугъэх. Шъоум федэу пылъыр ыкIи фэгъэхьыгъэ нэпцIэу къаIуатэхэрэри зэрагъэшIагъэх. Органолептическэ пчъагъэу къытырэр ыкIи иIэшIугъэ, ышъо, мэ IэшIоу пихырэр зыфэдэхэр аушэтыгъэх.

ШIэныгъэ-зэлъашIэрэ гъэлъэшыгъэ шIыкIэу «Къушъхьэхэм ядэхагъэ» зыфиIорэр МКъТУ-м и Научнэ тхылъеджапIэ щыкIуагъ. Программэ зэмылIэужыныгъэу иIагъэм Iофтхьабзэ бэ дэдэ къыдилъытэщтыгъэ, ащ хэлэжьагъэмэ гукъыдэчъ ыкIи гукъэкI макIэп яIэ хъугъэр. Лекциу «Сэ сыгу къушъхьэмэ къахэсынагъ» зыфиIоу зэдэIугъэхэр урысые альпинизмэм илIыхъужъмэ афэгъэхьыгъагъ. Лъэтегъэуцоу «Къушъхьэхэр сурэтшIыгъэхэу» зыцIэм хьакIэмэ щалъэгъугъ сурэтышIэхэм, поэтхэм ыкIи орэдыIохэм тыкъэзыуцухьэрэ дунаир гукъыдэчъ зэрафэхъурэр. Iофтхьабзэм хэлажьэхэрэр къушъхьэмэ афэгъэхьыгъэ гупшысэхэмкIэ зэхъожьыгъэх, зэхашIэрэр, алъэгъурэр тхьапэм рагъэкIугъ. Квестэу рагъэкIокIыгъэм къушъхьэхэм афэгъэхьыгъэ шIэныгъэу яIэхэр къыщаIотагъэх. Тхылъ къэгъэлъэгъонэу зэхащагъэм Адыгэ Республикэм икъушъхьэхэм афэгъэхьыгъэ литературэр къыщатыгъ, ахэм бэ зэлъаубытыщтыгъэр: къушъхьэ лъэгэшхохэр, къэкIыхэрэр, хьэкIэ-къуакIэхэр.

ИдэнымкIэ мастер-классыр тематическэ лъэныкъоу тхылъеджапIэм иIэм щызэхащагъ, ащ хэлэжьагъэхэр идыкIынымкIэ заушэтыгъ, къушъхьэмэ къащашыпыгъэхэмкIэ ёлочнэ джэгуалъэхэр ашIыгъэх.

Площадкэу «Медицинэмрэ псауныгъэмрэ яшъолъыр» зыфиIорэм Iофтхьабзэ гъэшIэгъонхэр щыкIуагъэх, цIыфым ыпкъышъол ишъэфхэм щатегущыIагъэх, псауныгъэм икъэухъумэнкIэ щыIэ амалхэр атегущыIагъэх.

Квестэу «Пкъышъолым идунэе хырыхыхь» зыфиIорэм ишIуагъэкIэ анатомием ылъапсэхэр джэгукIэ шIыкIэкIэ зэхахьэм хэлажьэрэмэ зэрагъэшIагъ. Зэщыгъо лекциехэр хэмытхэу — интерактивнэ фактхэр ыкIи ошIэ-дэмышIэ зэгъэпшэнхэу пкъышъолым ишъэфхэр къизыIотыкIыхэрэр. Квестым идесэ пэпчъ уригъэгупшысэнэу, дунаир зэрэгъэпсыгъэм ухищэнэу щытыгъ.

Мастер-классэу «Хирургическэ мастерскоир» зыфиIорэр хирургическэ амалхэр озыгъашIэу, IэпэIэсэныгъэшхо зыхэлъ хирургыр яшъхьаIэу гъэпсыгъагъ. Пкъышъолыр зэрабзэрэм техникэу ищыкIагъэр, зэрадыжьрэм, къэбзэныгъэу ащ дыкIыгъун фаехэр, нэмыкIхэри ащ щарагъэлъэгъугъэх.

Интенсивэу «ЛФК для профилактики нарушения осанки и сколиоза у детей» зыфиIорэм упражнениехэу пкъыр зэнкIэным, къупшъхьэ тхыпкъымкIэ федэ къэзытыхэрэр щарагъэшIагъэх, ахэр непэрэ кIэлэеджакIохэм ыкIи студентхэм лъэшэу къашъхьэпэщтых.

Ащ хэлажьэхэрэм гу-тхьабыл реанимацием зыщагъэгъозагъ — шIыкIэу щыIэныгъэр къэзгъэнэжьын ылъэкIыщтым, гумрэ тхьабылымрэ яIофшIэн деIэхэзэ, врачыр къэсыфэ ашIэшъущтыр ашIэ. Зэхахьэм хэтхэм практикэр акIугъ, апэрэ IэпыIэгъур сабыйхэм ыкIи зыныбжь икъугъэхэм арагъэкIыгъ, чIыпIэ къинэу зэрыфагъэхэм ращыгъэх.

Интерактивнэ площадкэу «Полное погружение: осмотр полости рта» зыфиIорэм къекIолIагъэхэр кариес-детектора СОХО-HUNTER зыфиIорэр яIэпыIэгъоу кариесэу къыхагъэщыгъэм зэрэдэзекIощт шIыкIэр зэрагъэшIагъ, жэ кIоцIым узэрэфэсакъыщтымкIэ джэнджэшхэр агъотыгъэх. Стоматолог ролыр бэмэ аушэтыгъ, ащ фэдэ шIоигъоныгъэ зиIэхэр къахэкIыгъэх.

Къэгъэлъэгъонэу «ШIугъэ къэзытырэ уцыщэ тучаныр: къэгъэлъэгъопIэ экспозициер» зыфиIорэм уц зэмылIэужыгъуабэ къыщытыгъагъ: пытэхэр (таблеткэхэр, пилюлэхэр), шъабэхэр (мазьхэр, пластырьхэр), псы зыхэтхэр (растворхэр, микстурэхэр) газ зыхэтхэр (аэрозольхэр). ХьакIэмэ ахэр пкъышъолым къызэрэхэкIыжьхэрэ шIыкIэр зэрагъэшIагъ — энтеральнэу ыкIи парентеральнэу, препарат шъхьафхэр зэраухъумэхэрэри къафаIотагъ.

Мастер-классэу «Микромир животных — паразиты человека» зыфиIорэм хэлэжьагъэхэр паразитмэ ядунэе гъэшIэгъонэу цIыфым ипкъышъол хэлъхэм защагъэгъозагъ. Доцентэу Ирина Дьяковам игъусэхэу микроскопымкIэ Iоф ашIагъ, одноклеточнэхэр (плазмодийхэр, лямблиехэр, амебхэр) ыкIи многоклеточнэ паразитхэр (аскаридхэр, острицэхэр, цепнэхэр) зэрагъэшIагъэх, джащ фэдэу противопротозойнэхэр ыкIи противогельминтнэ препаратхэр зэрагъэлъэгъугъэх.

МКъТУ-м и «Точка кипение» иплощадкэ квест Пространствэ дроносферэу «Уашъом екIурэ гъогухэр» зыфиIорэр щыкIуагъ. Пилот зэрымыс авиацием икъэбар ащ зыщыщагъэгъозагъ, специалистхэм дронхэр зэрагъэIорышIэрэри алъэгъугъ. Интерактивнэ Iахьым хэлэжьагъэхэм трассэр авиасимуляторымкIэ акIугъ, дрон шъыпкъэмэ Iоф зэрашIэрэми лъыплъагъэх, пилот зэрымыс аппаратхэр зытешIыхьэгъэ тырагъапкIэрэ сурэтхэм яколлекцие аугъоигъ.

Мастер-классэу «Разработка мобильных приложений без кода» зыцIэм къекIолIагъэхэм кроссплатформеннэ шIыкIэмкIэ мобильнэ приложениехэр зэраугъоихэрэм еплъыгъэх. Специалистхэр ашъхьагъ итхэу приложение къызэрыкIоу Android зыцIэм фытегъэпсыхьагъэр агъэпсыгъ, ясмартфонхэм атырагъэуцуагъэх, приложением ишIынкIэ шIэныгъи агъотыгъ

Площадкэу «Сборка и диагностика работы ЭВМ» зыцIагъэм хэлэжьэгъэ хьакIэхэр IэкIоцI компонентхэу компьютерым хэлъхэр аугъоигъэх ыкIи язакъоу системнэ блокыр агъэпсыгъ,ЭВМ-м изэтегъэуцон ыкIи иIофшIэн зыфэдэр зэрагъэшIагъ.

Мастер-классэу «Хьэмэ таможнем къулыкъу щахьы» зыцIэм Урысые Федерацием икинологхэм къулыкъу зыхьырэ хьэмэ Iоф зэрашIэрэр къырагъэлъэгъукIыгъ, дрессировкэ курсхэм якIун щыщ Iахьхэри апашъхьэ къыралъхьагъэх, хэушъхьафыкIыгъэ упражнениехэр бэмэ агу рихьыгъэх.

Тренингэу «Как увеличить силовые показатели организма?» щызэрагъэшIагъ упражнениехэм яшIуагъэкIэ лыпцэхэр зэрагъэпытэхэрэр. Программэм хэхьагъэх пкъышъолым энергие езытыхэрэр, гъучIхэу онтэгъугъэ зэфэшъхьаф зиIэхэмкIэ упражнениехэр шIыгъэнхэр. ДжампингымкIэ тренингхэм Iофтхьабзэм къекIолIагъэхэр хэлэжьагъэх. Упражнениехэу гимнастическэ тренажерым рашIыхэрэмэ координациер агъэпсы, пкъышъолым илыпцэхэр зэкIэ хэлажьэх. Джампингым тхыпкъыр еузэнкIы, дэгъубэ джыри къеты.

Спортивнэ интерактивэу «Аэрофутболым» къыдыхэлъытагъэу тренингэу «Парящий футбольный мяч» зыфиIорэр рагъэкIокIыгъ. Ащ хэлажьэхэрэмэ аэро-технологиехэр къызфагъэфедэхэзэ джэгугъэх. Ащ фэшъхьафэу интерактивнэ джэгукIэу «Мячелов» зыцIэр зэхащагъ, ащ шъхьадж кIочIэ амалэу ыкIи лъэшыгъэу иIэр къыщигъэлъэгъуагъ.

Интерактивнэ джэгукIэу «Твистерым» кIуачIэкIэ зэнэкъокъушъущтхэр ыугъоигъэх. Интерактивнэ джэгукIэу «Балансборд с лабиринтом» зыцIэм хэлэжьагъэхэм псауныгъэм икъэухъумэн епхыгъэ лъэныкъуабэ ашIагъ, джэгукIэ шапхъэм илъэу бэ зэрагъэшIагъэр. Спортивнэ интерактивэу «Поймай палочки» зыфиIорэм псынкIагъэм фигъэсагъэх, яреакцие щауплъэкIугъ.

Лекцие-лъэтегъэуцоу «Дружба по расчету: как растения и животные помогают друг другу в дикой природе» зыфиIорэ темэмкIэ биологие шIэныгъэхэмкIэ кандидатэу, ландшафтнэ архитектурэм ыкIи мэз Iофым якафедрэ идоцентэу, Кавказскэ къэралыгъо чIыопс биосфернэ заповедникэу Х.Г. Шапошниковым ыцIэ зыхьырэм ишIэныгъэлэжь IофышIэу Ольга Резчиковам симбиозым иIофыгъохэм къатегущыIагъ. Ащ фэшъхьафэу, тропическэ къэкIырэ-къошыным быбырэ цыгъохэр икъошын зифэхэкIэ зыкIимышхыхэрэр, нэмыкI гъэшIэгъоныбэхэр ащ къыIотагъэх.

Виртуальнэ экскурсиеу «Дачи Суворина и Маслова» зыцIэр кIозэ, ащ хэлажьэхэрэр архитектурнэ саугъэтхэу п. Ольгинкэм дэтхэм ятарихъ зыщагъэгъозагъ. Экскурсиер зэрищагъ питерскэ шIэныгъэлэжь-тарихълэжьэу тарихъ тхылъ пчъагъэмэ яавторэу Старкым.

Мастер-классэу «Личный финансовый план» зыцIэр финансхэм алъэныкъокIэ гъэсэныгъэ агъотыным фытегъэпсыхьэгъагъ. Ахъщэр тэрэзэу гъэзекIогъэным, финансовэ пшъэрылъхэр гъэцэкIэгъэнхэм, планированиер гъэпсыгъэным Iофтхьабзэм щытегущыIагъэх.

ШIэныгъэ-зэлъашIэрэ лекциеу «Ментальное здоровье» зыфиIорэм хэлэжьагъэхэм психическэ, псэ ыкIи гушъхьэ рэхьатныгъэ цIыфым иIэным епхыгъэ Iофыгъохэр зэрагъэшIагъэх. Лекторыгъэр медицинскэ шIэныгъэхэмкIэ кандидатэу, педиатрием икафедрэ идоцентэу Багъырэкъо Фатимэ псауныгъэм илъэныкъуабэхэр зэпхыгъэхэр къыIотагъэх, щыIэныгъэм игушIогъо такъикъхэр, тыкъэзыуцухьэхэрэм фыщытыкIэ дэгъухэр яIэнхэм апае шIэгъэн фаехэм ягугъу ащ къышIыгъ.

Iофтхьабзэу «Территория креативных индустрий: здесь развиваем идеи и технологии моды» зыфиIорэм щыгъыным идизайн сэнэхьаткIэ къыхэзыхыщтхэм къызэрыкIо методхэу геометрическэ шапхъэхэмкIэ агъэфедэхэрэр зэрагъэлъэгъугъэх.

Зэхахьэу «Рекламэм имастерской» зыфиIорэм екIолIэгъэ хьакIэхэм зэрагъэшIагъ рекламнэ текстхэр зэрэптхыщтхэр ыкIи агу къинэхэрэ гущыIэхэр къызэрэугупшысыщтхэр. Апшъэрэ классмэ арысхэр купмэ ащылажьэхэзэ акъылыгъэ хэлъэу товарым фэгъэхьыгъэ рекламнэ текстыр зэрэптхыщтыр зэрагъэшIагъ.

Мыекъопэ къэралыгъо технологическэ университетым пчъэ зэIухыгъэмэ я Мафэу ыкIи наукэм и Фестивалэу щырагъэкIокIыгъэхэр шIэныгъэм имэфэкI шъыпкъэ хъугъэх, кIэлэеджакIохэм ягъэсэныгъэ хагъэхъоным, нахь шIэныгъэ куухэм алъыIэсынхэм фытегъэпсыхьагъэу щытыгъэх. IофтхьабзитIур зэрэзэпхыгъагъэхэм апкъ къикIыкIэ гъэсэныгъэ ыкIи интерактивнэ программэхэр нахь гъэлъэшыгъэ хъугъэх, неущрэ абитуриентхэм сэнэхьатхэр къыхахынхэм тыригъэпсыхьагъэх. МКъТУ-м егъэджэн амалэу иIэхэр нахь игъэкIотыгъэу зэрагъэшIагъэх, студенческэ ыкIи шIэныгъэ щыIакIэм иатмосферэ хэхьагъэх, яIэпэIэсэныгъэ зэрэхагъэхъощтым ылъэныкъокIэ лъэубэкъукIэхэр ашIыгъэх.