ФедерациемкIэ Советым экономическэ политикэмкIэ и Комитет дэкIыгъо зэхэсыгъо Адыгеим щызэхищагъ, темэу «Инвестиционнэ проектхэм апае амалышIухэр гъэпсыгъэнхэр ыкIи IофшIэнэу Адыгэ Республикэм иэкономикэ хэзгъахъорэмэ ащыщым зыкъегъэIэтыгъэныр» зыфиIорэр ары яIагъэр. Зэхэсыгъор зэрищагъ ФедерациемкIэ Советым экономическэ политикэмкIэ и Комитет итхьаматэу Андрей Кутеповым. ЛIыкIо купым шIуфэс къарихыгъ АР-м и ЛIышъхьэу КъумпIыл Муратэ.

Шъолъырым ипащэ къыхигъэщыгъ производствэм хэхъоныгъэ егъэшIыгъэнымкIэ республикэм опыт дэгъу зэрэзэIуигъэкIагъэр. Къэралыгъо корпорациеу «Росатомым» уасэу ышIыгъэмкIэ, сакъыныгъэ правительствэм иIофхэмкIэ Адыгеир пэрытхэм ащыщ. КъумпIыл Муратэ къызэриIуагъэмкIэ республикэм шIыкIэу къыгъотыгъэхэм ахигъэхъон ыкIи нэмыкI шъолъырхэм иопыткIэ адэгощэн ылъэкIыщт. А пшъэрылъыр ары сенаторхэр Адыгеим къызкIэкIуагъэхэр, сакъыныгъэ правительствэм иIофшIэн зыщагъэфедэрэ организациехэр къызкIикIуахьыгъэхэр.

Апэрэ чIыпIэу хьакIэхэр зэкIолIагъэхэр Мыекъопэ къэралыгъо технологическэ университетыр ары, университетыр 2017-рэ илъэсым ичъэпыогъу мазэ къыщегъэжьагъэу пилотнэ проектэу «ШIуагъэ къэзытрэ шъолъыр» зыфиIорэм хэлажьэ («Сакъыныгъэ правительствэу» ыпэкIэ щытыгъэр»), пэщэныгъэ дызезыхьэрэр къэралыгъо корпорациеу «Росатомыр» ары. 2018-рэ илъэсым игъэтхапэ мазэ къыщыублагъэу специалистхэм яегъэджэн ащ щэкIо.

МкъТУ-м къеблэгъэгъэ сенаторхэм КъумпIыл Мурат къафиIотагъ апшъэрэ еджапIэм экономикэмкIэ федэ къэзыхьыщт кадрэхэр зэрэщагъэхьазырхэрэр. Ежь проектми ишIогъэшхо къэкIо. МКъТУ-м процессхэмкIэ и Фабрикэ нэбгрэ мини 4-мэ егъэджэнхэр щакIугъэх, ахэмэ гъэцэкIэкIо хабзэм щылажьэхэрэр, хъызмэтшIапIэмэ, Урысыем исубъект 25-мэ ялIыкIохэр ахэтыгъэх. Джащ фэдэу, процессхэм я Фабрикэ къыщызэIуахыгъ предпринимательхэм IэпыIэгъу ятыгъэнымкIэ АР-м и Гупчэ, ар лъэпкъ проектэу «Производительность труда» зыфиIорэм къыделъытэ.

ЛIыкIо купым АР-м и ЛIышъхьэу КъумпIыл Муратэ ыкIи МКъТУ-м иректорэу Къуижъ Саидэ акIыгъухэу Мыекъопэ къэралыгъо технологическэ университетым процессхэм я Фабрикэу щыIэр зэрагъэлъэгъугъ. Студентхэу сэнэхьатхэу «Фармацием» ыкIи «МэшIо щынэгъончъэным» феджэхэрэр бизнес-тренингэу «Имитационная модель производственного процесса» зыфиIорэм хэлэжьагъэх. Дисциплинэу «Основы бережливого производства» зыфиIорэм къыдыхэлъытагъэу егъэджэнхэр агъэпсыгъэх. Тренингым ишIуагъэкIэ егъэджэным хэлажьэхэрэр производствэм изэпхыныгъэ процессхэм нахь куоу ахэхьэх, зэрагъашIэх, IофшIэным нахь федабэ къытэу зэрэбгъэпсыщт шIыкIэр зэхашIэ.

ФедерациемкIэ Советым экономическэ политикэмкIэ и Комитет итхьаматэу Андрей Кутеповым къыхигъэщыгъ Мыекъопэ къэралыгъо технологическэ университетым Iофэу ыгъэцакIэрэм уигъэгушхонэу зэрэщытыр. Ащ къыIуагъ университетыр теоретическэ ухьазырыныгъэ къодыекIэ къызэрэмыуцурэр, шIэныгъэхэр практикэмкIэ агъэфедэжьынэу амали студентмэ ареты. Анахьэу ынаIэ ащ зытыридзагъэр «Процессхэм я Фабрик» ары, ащ ишIуагъэкIэ сакъыныгъэ производствэр гъэсэныгъэ процессым щыщэу мэхъу ыкIи экономикэм изыкъегъэIэтын Iофхэм ахэлажьэ. Андрей Кутеповым къыIуагъ специалист дэгъухэр гъэхьазырыгъэнхэмкIэ университетыр площадкэ шIагъо зэрэхъугъэр.

— Сакъыныгъэ технологиехэр республикэм щагъэфедэу зырагъэжьагъэр илъэси 7 хъугъэ. Ащ изэхэщакIор — Мыекъопэ къэралыгъо технологическэ университетыр ары. Едгъаджэрэ специалистмэ IофшIэным екIолакIэхэр кIэу ащагъэфедэнхэм фэтэгъасэх, ау ащ дакIоу яамалхэр практикэм къыщагъэлъэгъошъуным фэтэщэх. Джащ пае организацие заулэмэ «ШIуагъэ къэзытрэ шъолъырым» иIофшIакIэ гъэпсыкIэхэр ахэтлъхьагъэх. Ащ фэшъхьафэу, Адыгеим лъэпкъ проектэу «Производительность труда» зыфиIорэр 2019-рэ илъэсым къыщегъэжьагъэу щытэгъэцакIэ. Ащ хъызмэтшIэпIэ 12 хэхьагъ. А Iофыгъом шIуагъэ къызэритырэр дгъэунэфыгъэ, экономическэ къэгъэлъэгъонэу Iофтхьабзэм хэлажьэрэмэ яIэр нахьыбэ хъугъэ, — къыхигъэщыгъ Адыгеим и ЛIышъхьэ.

Ащ фэдэ IофшIэным изэфэхьысыжьхэр сенатормэ зэрагъэлъэгъугъ, хъызмэтшIапIэмэ ащыIагъэх. Ащ фэдэхэу къыхахыгъэхэр редукторышI заводэу ПАО «Зарем» ыкIи ООО «Фирма Комплекс-Агро». Джащ фэдэу сенаторхэр щыIагъэх ыкIи осэшIу афашIыгъ хъызмэтшIапIэхэу ООО «Картонтарэм» ыкIи «Картонтара 2-м».

— Тэ къыдгурэIо мы проектым ресурсэу иIэм ыгъунэ тызэрэнэмысыгъэр, сакъыныгъэ процессхэм джыри зызэрядгъэушъомбгъущтым тыпылъ. Анахьэу ащ мэхьанэ зыщиIэр джырэ уахътэр ары, УФ-м и Президент иунашъохэр шIокI имыIэу зыщыдгъэцэкIэнхэ фэе уахътэм. Ащ пае IэпыIэгъоу тиIэр лъэпкъ проектэу «Производительность труда" зыфиIорэр ары. Тэ тыфэраз Владимир Путиным проектым иIофшIэн зэрэлъигъэкIотагъэм фэшI, ар джы нэмыкI лъэпкъ проектэу "Эффективная и конкурентоспособная экономика" зыфиIорэм дыхэтэу тэгъэцакIэ, — къыIуагъ КъумпIыл Муратэ.