Чъэпыогъум и 23-м къыщыублагъэу и 26-м нэс Мыекъопэ къэралыгъо технологическэ университетым Урысые шIэныгъэ-практическэ конференциеу «КIэлэцыкIухэмрэ ныбжь зиIэхэмрэ зыпкъ игъэуцожьыгъэнхэмкIэ упчIэ шъхьаIэу щыIэхэр. Нейрореабилитациер» зыфиIорэр щэкIо.

Iофтхьабзэм изэхэщакIохэр: Мыекъопэ къэралыгъо технологическэ университетыр, псауныгъэр къэухъумэгъэнымкIэ Адыгэ Республикэм и Министерствэ, общественнэ организациеу «Врачмэ я Хасэ». Медицинэ практикэм непэрэ мафэм агъэфедэрэ инновационнэ технологиехэр хэгъэхьэгъэнхэр, реабилитациемкIэ шэпхъакIэу щыIэхэр зыфэдэхэм атегущыIэнхэр ары Конференциер зыфэгъэхьыгъагъэр.

Iофтхьабзэм пшъэрылъ шъхьаIэу иIагъэхэм ащыщыгъ Адыгэ Республикэм джырэ ахътэм диштэрэ медицинскэ кластер щыгъэпсыгъэныр, псауныгъэм икъэухъумэн ыкIи ащ епхыгъэ шIэныгъэ ушэтынэу щыIэхэр зэхэгъэхьэгъэнхэр. Конференцием хэлажьэхэрэр медицинэ IэпыIэгъур нахьышIу шIыгъэным ыкIи кадрэхэм ягъэхьазырын япхыгъэ Iофыгъохэр къаIэтыгъэх, нейрореабилитацием ыкIи цIыфым ипсауныгъэ зэтегъэуцожьыгъэнымкIэ екIолIакIэхэр къыфэгъотыгъэнхэм атегущыIагъэх.

ЗэхэщэкIо комитетым псауныгъэм икъэухъумэн ыкIи гъэсэныгъэм щызэлъашIэрэ цIыфхэр хэхьагъэх: псауныгъэр къэухъумэгъэнымкIэ Адыгэ Республикэм и Министрэу Мэрэтыкъо Рустем, МКъТУ-м иректорэу, экономикэ шIэныгъэхэмкIэ докторэу, профессорэу Къуижъ Саидэ, медицинэ шIэныгъэхэмкIэ докторэу, профессорэу, ФГБОУ ДПО РМАНПО-м кIэлэцIыкIу хирургиемкIэ икафедрэ ипащэу, ГБУЗ «НИИ НДХиТ ДЗМ» нейрохирургиемкIэ отделениемипащэу Жанна Семеновар.

Конференциер тематическэ сессие заулэу гощыгъагъэ. Апэрэ сессиеу зэтегъэуцожьыгъэным фэгъэхьыгъэм къыщыгущыIагъ реабилитациемкIэ штатым хэмыт специалист шъхьаIэу Адыгэ Республикэм иIэ ХьакIэгъогъу Ларисэ. Ар къытегущыIагъ шъолъырым медицинскэ реабилитацием исистемэ хэхъоныгъэ зэрэщишIырэм. Медицинэ шIэныгъэхэмкIэ докторэу, профессорэу, Урысые общественнэ организациеу «Урысыем иреабилитологхэм я Союз» итхьаматэу, медицинскэ реабилитациемкIэ Урысыем и Министерствэ испециалист шъхьаIэу, Урысые лъэпкъ ушэтын медицинскэ университетэу Н.И. Пироговым ыцIэ зыхьырэм гъэсэныгъэ тедзэмкIэ ифакультет медицинскэ реабилитациемкIэ икафедрэ ипащэу Галина Ивановам реабилитацие Iофыгъохэм Урысыем екIолIакIэу къыщыфагъотыгъэхэр къыIотагъэх, нейрореабилитацием епхыгъэ пшъэрылъ шъхьаIэхэр къыхигъэщыгъэх.

ЯтIонэрэ сессиер нейрореабилитацием нахь фэгъэхьыгъэу щытыгъ, медицинскэ шIэныгъэхэмкIэ кандидатэу, Москва псауныгъэр къэухъумэгъэнымкIэ и Департамент хэхьэрэ ГБУЗ «Центр патологии речи и нейрореабилитации» зыфиIорэм иврач шъхьаIэу Роман Черёминым сымаджэ хъугъэхэм ягущыIакIэ-къэIуакIэу зэщыкъорэм узэреIэзэщтыр къыIотагъ. Профессорэу Жанна Семеновам шъхьэкIуцIыр фыкъуагъэ зыфэхъугъэ кIэлэцIыкIухэм яIэзэгъэнымкIэ нейрохирургием опытэу иIэр зыфэдэр къыIопщыгъ.

Конференцием иаужырэ едзыгъо клиническэ хъугъэ-шIагъэхэр зэхафыгъэх, реабилитацеу нахь къадэхъугъэхэр щысэу ащ къыщахьыгъэх.

Программэм къыдыхэлъытагъэу университетым ихьакIэхэр лечебнэ факультетым истудентмэ аIукIэщтых, опытышхо зиIэ врачхэр яшIэныгъэхэмкIэ ныбжьыкIэхэм къадэгощэщтых.