Непэ Мыекъопэ къэралыгъо технологическэ университетым истудент 70-рэ я II-рэ Урысые научнэ-технологическэ Iорытхым хэлэжьагъ. Я XI-рэ технологическэ хэхъоныгъэм и Дунэе форумэу «Технопром-2024-рэ» зыфиIорэм къыдыхэлъытагъэу Iорытхыр зэхащэ.

Iофтхьабзэм хэлажьэрэмэ онлайн шIыкIэм тетэу шIуфэс къарихыгъ Новосибирскэ хэкум и Губернатор научнэ-технологическэ хэхъоныгъэмкIэ игуадзэу Ирина Мануйловам. Непэрэ технологиехэр, инженериер ыкIи наукэр зыфэдэхэмкIэ шIэныгъэу яIэр зэгъэшIэгъэныр ары IорытхымкIэ пшъэрылъэу агъэуцурэр, ар къыхигъэщыгъ къэгущыIагъэм. ГъорекIо диктантыр пилот зэрымысэу быбырэ аппаратхэм афэгъэхьыгъагъ, мыгъэ — биотехнологиехэм.

Мы Iорытхым ишIуагъэкIэ студентмэ яшIэныгъэхэр зынэсхэрэр аушэты, научнэ-техническэ прогрессым иупчIэхэм анэсых.

Адыгэ Республикэм диктантыр щязыгъэтхыгъэр маркетингымкIэ, сервисымкIэ ыкIи туризмэмкIэ кафедрэм идоцентэу, МКъТУ-м и «Точка кипение» ипрограммнэ пащэу Светлана Новиковар ары. Диктантым изещакIор МКъТУ-ми ТК иадминистраторэу Мария Тамахина.

Iофтхьабзэм ипэублэм псалъэ къышIыгъ техническэ шIэныгъэхэмкIэ кандидатэу, МКъТУ-м и Медицинскэ институт икафедрэ идоцентэу Дэтхъужъ Заринэ. Ащ къыIотагъ технологиехэмрэ медицинэмрэ зэгъусэхэ хъумэ мэхьанэу яIэм зыкъызэриIэтырэр, студентмэ а лъэныкъомкIэ яшIэныгъэхэр хагъэхъонхэ зэрэфаер.

Iорытхыр такъикъ 60-м къыкIоцI бгъэцэкIэнэу щыт. УпчIэхэм научнэ ыкIи технологическэ лъэныкъуабэхэр зэлъаубытых. Чъэпыогъум и 27-м нэс ащ ухэлэжьэн плъэкIыщт. Ар зэрэптхыгъэм изэфэхьысыжьхэр чъэпыогъум и 30-м МФТР Технопром зыфиIорэм исоциальнэ хъытыухэм къащыхиутыщтых. ТекIоныгъэ къыдэзыхырэмэ шIухьафтын лъапIэхэр аратыщтых. Мыгъэ диктантым итхын Урысыем ишъолъыри 7-мэ арыт «Точка кипение» 20 хэлажьэ.