Непэ форумым иятIонэрэ мафэ къыдыхэлъытагъэу ащ хэлажьэхэрэр зэхэщакIохэм ыкIи зещакIохэм аIукIагъэх — МКъТУ-м и Точка кипение ипрограммнэ пащэу, маркетингым, сервисым ыкIи туризмэм якафедрэ идоцентэу Светлана Новиковам ыкIи биологие шIэныгъэхэмкIэ докторэу, профессорэу, МКъТУ-м иэкологическэ факультет идеканэу Галина Коноваловам.

Биологие шIэныгъэхэмкIэ докторэу, МКъТУ-м ипрофессорэу Валерий Акатовым илекциекIэ форумыр лъагъэкIотагъ. Ащ къышIыгъэ докладым итемагъэр: «Островной биогеографием идинамическэ зыпкъитыныгъэ итеорие: тестированием игумэкIыгъохэр, шъоф ушэтынхэм къагъэлъэгъогъэ зэфэхьысыжьхэр, мэхьанэу ащ иIэр», ар лъэшэу къедэIурэмэ ашIогъэшIэгъоныгъ. Лекциер экологием ыкIи биогеографием куоу къатегущыIагъ, экосистемэм ыкIи биологическэ зэфэмыдэныгъэм ягугъу къышIыгъ. Валерий Акатовым илекцие зэхахьэм хэлажьэрэ закъохэр арэп едэIугъэхэр, Иркутскэ щыпсэухэрэм электроннэ шIыкIэхэмкIэ ар алъагъэIэсыгъ. МКъТУ-м и Точка кипение иофициальнэ аккаунт а лекцием шъущедэIужьын шъулъэкIыщт.

ФАНК-м ишIэныгъэ кино имафэхэм япэгъокIэу фильмэу «Карбоновые полигоны» зыфиIорэр къагъэлъэгъуагъ. А документальнэ фильмэм еушэты углероднэ циклэр — климатическэ процессхэмкIэ мэхьанэшхо зиIэр. Кинофильмэм еплъыгъэхэр экологическэ факультетым щеджэрэ студентхэр ары, шIэныгъэ тарихъым ахэр хилъэсэгъагъэх, экологием имэхьанэ нахь лъэшэу зэхашIагъ.

Фильмэм зеплъыхэ ужым ар экспертэу къырагъэблэгъагъэм дызэхафыжьыгъ — Валерий Акатовыр студентхэм адэIэпыIагъ шIэныгъэ лъэныкъоу фильмэм иIэхэр къагурыIонхэмкIэ.

«Точка кипение 4.0» зыцIэм иятIонэрэ мафэ къыгъэлъэгъуагъ шIэныгъэлэжьхэр, студентхэр ыкIи экспертхэр зэIубгъэкIэнхэм мэхьанэшхо зэриIэр. Мыщ фэдэ Iофтхьабзэхэм яшIуагъэкIэ ныбжьыкIэхэм ушэтыныкIэхэр ашIынхэм тегушхухьэх, яшIэныгъэхэм ахагъахъо.