Мы мафэхэм Московскэ къэралыгъо университетэу М.В. Ломоносовым ыцIэ зыхьырэм Студенческэ шIэныгъэ обществэм ия III-рэ Дунэе еджапI — 2024-рэ зыфиIорэр щырагъэжьагъ.

Мыекъопэ къэралыгъо технологическэ университетым илIыкIо куп къэзгъэлъэгъуагъэхэр МКъТУ-м и СНО-м ипащэу, конституционнэ гъэпсыным, къэралыгъо ыкIи муниципальнэ гъэIорышIэным якафедрэ идоцентэу Надежда Продиблох ыкIи инженернэ факультетым и СНО итхьаматэу Ангелина Васильевар.

Апэрэ мафэм зэнэкъокъум фэгъэхьыгъэ зэдэгущыIэгъухэмкIэ къызэIуахыгъ, грантовэ заявкэхэм ятыни тегущыIагъэх. А зэдэгущыIэгъухэм ахэлэжьагъ Урысыем гъэсэныгъэмрэ шIэныгъэмрэкIэ иотдел ипащэу Али Асадовыр. Ащ фэшъхьафэу СНО-м изэнэкъокъу щытекIуагъэхэр яопыткIэ ЕджапIэм хэлажьэрэмэ къадэгощагъэх.

Зэнэкъокъум хэлажьэрэмэ мафэр афагъэхьыгъ шIэныгъэ Iофхэм, искусственнэ интеллектыр гъэсэныгъэм зэрэщагъэфедэрэм изэгъэшIэн, «Апэрэхэм я Движение» хэтхэм япроектхэм ыкIи кIэлэеджакIохэм зэрадэлэжьэщтхэм афэгъэхьыгъэ гупшысэхэр къыраIотыкIыгъэх.

Студенческэ офисэу НИЯУ МИФИ-м ипащэу Алексей Егоровым илекциехэмкIэ ятIонэрэ мафэм ипрограммэ рагъэжьагъ. Студенческэ шIэныгъэ обществэм итарихъ ар къытегущыIагъ. Зэнэкъокъухэрэр чанэу воркшопым хэлэжьагъэх, ащ ягукъэкIхэмкIэ модельхэр щызэхагъэуцуагъэх, экспертмэ арахьылIагъэх.

Псауныгъэр къэухъумэгъэнымкIэ лабораториеу шIэныгъэлэжь ныбжьыкIэмэ яIэм интерактивнэ шапхъэм илъэу псауныгъэм икъэухъумэнымкIэ техникэу щыIэхэр зэрагъэшIагъэх.

Стратегическэ сессием планированием иметодхэм ащытегущыIагъэх, стратегическэ менеджментым иIэмэпсымэхэр аушэтыгъэх ыкIи СНО-м хэхъоныгъэхэр егъэшIыгъэнхэмкIэ лъэубэкъукIэхэр ашIыгъэх.

Аужырэ мафэр проектнэ сессиехэм ыкIи мастер-классхэм афагъэхьыгъ, ащ цифрэ шIыкIэмкIэ ахъщэхэр агъахьынхэм, нэмыкI Iофыгъохэм ягугъу щашIыгъ. Анахьэу ашIогъэшIэгъоныгъэр мастер-классэу психологическэу зыгъэрэхьатыжьыгъэным фэгъэхьыгъагъэр ары.