Непэ Мыекъопэ къэралыгъо технологическэ университетым и «Точка кипение» Дунэе шIэныгъэ-практическэ конференциеу «Урысыем, Африкэм ыкIи КъокIыпIэ Благъэм ягъэсэныгъэ дипломатие илъэмыджхэр» зыфиIорэр щыкIуагъ.

МКъТУ-м идунэе гъэсэныгъэ ифакультет ары конференциер зэхэзыщагъэр ыкIи гъэсэныгъэм ылъэныкъокIэ дунэе зэдэлэжьэныгъэм фэгъэзэгъэ экспертхэр, щIэныгъэлэжьхэр, кIэлэегъаджэхэр къыугъоигъэх. Ахэм ащыщыгъэх: Урысыем и МИД ишъолъыр орган-лIыкIоу Краснодар щыIэм ипащэ ипшъэрылъхэр зыгъэцэкIэрэ Ольга Шалимовар; Урысым и МИД и ЛIыкIоу Краснодар щыIэм исекретарэу Игорь Терзиян; Федеральнэ агентствэу «Россотрудничествэм» гъэсэныгъэмрэ шIэныгъэмрэкIэ и ГъэIорышIапIэ научнэ-гъэсэныгъэ проектхэмкIэ иотдел ипащэу Юлия Харченко; шIушIэ фондэу «РУССАР-м» ипрезидентэу, Ливием ыкIи Сирием ащыпсэурэ лъэпкъхэм адезгъаштэрэ Урысые комитетым итхьаматэ IэнатIэр адэзыгощырэ Олег Фоминыр. Онлайн-шIыкIэм тетэу конференцием хэлэжьагъэх Иорданием, Ливан, Танзанием ыкIи Кением ялIыкIохэр.

Iофтхьабзэр зыфытегъэпсыхьагъэр Урысыем гъэсэныгъэ зэдэлэжьэныгъэу Африкэ хэгъэгухэм ыкIи КъокIыпIэ Благъэм щыIэ къэралхэм адашIырэм хэхъоныгъэхэр рагъэшIынхэу, урысыбзэр ягъэшIэгъэнымкIэ ыкIи студентхэм культурнэу хэгъозэгъэнхэмкIэ екIолIакIэхэр афэгъотыгъэныр ары.

Анахьэу анаIэ зытырадзагъэр Урысыем гуманитарнэ политикэу IэкIыб хэгъэгухэм ащызэрихьэрэр ары, урысыбзэм ыкIи урыс культурэм зызэрэщаушъомбгъурэм.

Конференциер пленарнэ зэхэсыгъокIэ рагъэжьагъ, дунэе гъэсэныгъэ зэдэлэжьэныгъэм пылъ Iофыгъохэр ащ щызэхафыгъэх.

Секциеу «Урысыер Африкэм щыIэ хэгъэгухэм ыкIи КъокIыпIэ Благъэм икъэралыгъохэм гъэсэныгъэ зэдэлэжьэныгъэу адыряIэм хэхъоныгъэхэр егъэшIыгъэнхэм» зыфиIорэм доклад къыщишIыгъ РАН-м Африкэм и Институтэу хэтым ипащэ игуадзэу Дмитрий Бондаренкэм. Ащ ыуж а Институтым ишIэныгъэлэжь IофшIакIоу Нэшъулъащэ Наимэ къэгущыIагъ, докладэу «Урысыемрэ Африкэмрэ дунаим хэбзакIэ щыгъэуцугъэным зэрэхэлажьэхэрэр» зыфиIорэр къышIыгъ. Урысыем иапшъэрэ еджапIэмэ ыкIи ТАД-м я Ассоциацие Ливан щыIэм ипрезидентэу Айхама Ахмарам ипсалъэ бэмэ ашIогъэшIэгъоныгъ. Ащ къыкIигъэтхъыгъ Урысыем иапшъэрэ еджапIэхэр къэзыухыгъэхэм дунэе гъэсэныгъэм чIыпIэшхо зэрэщаубытрэр.

Конференцием къыдыхэлъытагъэу тематическэ секциехэр зэхащагъэх, ахэр дидактическэ модельхэм афэгъэхьыгъагъэх ыкIи Африкэмрэ КъокIыпIэ Благъэмрэ къарыкIыгъэ студентмэ ашIогъэшIэгъоныгъ. IэкIыбыбзэхэм якафедрэ ипащэу, филологие шIэныгъэхэмкIэ кандидатэу Шъуаджэ Зариет инджылызыбзэр африкэ хэгъэгухэм ястудентхэм зэрэзэрагъашIэрэм фэгъэхьыгъэ доклад къышIыгъ. АКъУ-м икафедрэ идоцентэу Сапые Саидэ, дунэе гъэсэныгъэм и Институт ипащэу, IэкIыбыбзэхэм якафедрэ ипащэу, кIэлэегъэджэ шIэныгъэхэмкIэ кандидатэу Ольга Гладковар, нэмыкIхэри конференцием къыщыгущыIагъэх.

Мыекъуапэ итарихъ чIыпIэхэр къэплъыхьагъэнхэр, КъокIыпIэм и Музей зэрагъэлъэгъуныр конференцием иапэрэ мафэ кIэух фэхъугъ.

Конференциер площадкэ дэгъу хъугъэ урысые ыкIи IэкIыб специалистхэр опытэу аIэкIэлъхэмкIэ зэхъожьынхэмкIэ, ахэм гъэсэныгъэ процессыр нахь зэхашIэн алъэкIыгъ, урысыбзэр ыкIи урыс культурэр нахьыбэрэмэ ягъэшIэгъэнымкIэ зы лъэубэкъушIу хъугъэ.

Неущрэ мафэр конференцием хэлажьэхэрэр къушъхьэ зекIоным фагъахьыщт, Адыгэ Республикэм ичIыопс зэрагъэлъэгъущт. Ащ яшъхьэихыгъэ зэдэгущыIэгъуи щылъагъэкIотэщт.