Непэ Мыекъопэ къэралыгъо технологическэ университетыр зычIэт унэм научнэ семинарэу «ЧIыопсымрэ цIыфхэмрэ экологием зэрепхыгъэхэр ыкIи шъолъырым ищынэгъончъагъ» зыфиIорэр щыкIуагъ.

ШIэныгъэ семинарыр научнэ-гъэсэныгъэ консорциумэу «Вернадскэр — Адыгэ Республикэр» зыфиIорэ гъогу картэу 2023-2024-рэ илъэсхэм ателъытагъэм елъытыгъэу рагъэкIокIыгъ.

Семинарым иIофшIэн хэлэжьагъэх шIэныгъэлэжьхэу ыкIи специалистхэу Московскэ къэралыгъо университетэу М.В. Ломоносовым ыцIэ зыхьырэм, Мыекъопэ къэралыгъо технологическэ университетым, Къыблэ федеральнэ университетым ащылажьэхэрэр, cтудентхэр ыкIи аспирантхэр.

ШIуфэс псалъэкIэ къэзэрэугъоигъэхэм закъыфагъэзагъ: шIэныгъэ IофшIэнымкIэ ыкIи инновационнэ хэхъоныгъэ МКъТУ-м егъэшIыгъэнымкIэ проректорэу, философскэ шIэныгъэхэмкIэ докторэу, профессорэу Татьяна Овсянниковам; экономикэ шIэныгъэхэмкIэ докторэу, профессорэу Беданыкъо Муратэ; Къыблэ федеральнэ шъолъырым чIыопсым дэлэжьэгъэнымкIэ и Департамент геологием ыкIи лицензированием иотделэу АР-м фэгъэзагъэм ипащэу Ленина Кориневич. Iофтхьабзэм джащ фэдэу хэлэжьагъ МКъТУ-м иинженернэ факультет идеканэу, техническэ шIэныгъэхэмкIэ кандидатэу, доцентэу Мэрэтыкъо Мурат.

Семинарым специалист пэрытхэу физикэм, сейсмологием ыкIи геоинформационнэ технологиехэм алъэныкъохэм афэгъэзагъэхэр къыщыгущыIагъэх. Физикэ-хьисап шIэныгъэхэмкIэ кандидатэу, ЧIыгум ифизикэ икафедрэ идоцентэу, Московскэ къэралыгъо университетэу М.В. Ломоносовым ыцIэ зыхьырэм иIофышIэу Алексей Марченковыр ыкIи Мыекъопэ къэралыгъо технологическэ университетым хьисапымкIэ, физикэмкIэ, системнэ анализымкIэ икафедрэ иинженер къаIотагъ Мыекъуапэ дэт унэу урамэу Чкаловам, 65-м щыIэр илъэсныкъом къыкIоцI зэрэсысырэр.

Ащ ыуж чIыгусысыным къыздихьырэ эволюционнэ моделым изытет къытегущыIагъ физикэ-хьисап шIэныгъэхэмкIэ кандидатэу, Къыблэ федеральнэ университетым физикэмкIэ икафедрэ идоцентэу Александр Черепанцевыр.

Ащ фэшъхьафэу, биологие шIэныгъэхэмкIэ кандидатэу, интеллектуальнэ геоинформационнэ технологиехэм я Гупчэ ипащэу Татьяна Варшанинам системнэ геодинамическэ моделэу гъунапкъэ зимыIэ шъолъырым итым икъэлъытэн методологие зыфэдэр къыIотагъ.

Семинарым зэфэхьысыжьэу фашIыгъэм щыхагъэунэфыкIыгъ къатыбэу зэтет унэхэм ясысыкIэ тапэкIэ зэраушэтырэм хэхъоныгъэхэр рагъэшIынхэу, ар шъолъырым иэкологие щынэгъончъэным иIоф зэрэхэлажьэрэр. ШIэныгъэ докладхэр къыхаутыщтых, ушэтын купэу студентхэмрэ аспирантхэмрэ зыхахьэхэрэм яIофшIэн лъагъэкIотэщт, я III-рэ шIэныгъэ семинарыр 2025-рэ илъэсым рагъэкIокIыщт, ар Дунэе шIэныгъэ-практическэ конференцием къыдыхэлъытагъэу щытыщт. А Iофыгъохэм яшIуагъэкIэ научнэ-гъэсэныгъэ консорциумэу «Вернадскэр — Адыгэ Республикэр» зыфиIорэм ылъэныкъокIэ зэдэлэжьэныгъэр мэпытэ.