Непэ Мыекъопэ къэралыгъо технологическэ университетым зэIукIэ щыкIуагъ, МКъТУ-м иректорэу Къуижъ Саидэ апшъэрэ еджапIэм чIэс унэгъо ныбжьыкIэмэ зэIукIэгъу адыриIагъ. Ар наукэмрэ апшъэрэ гъэсэныгъэмрэкIэ Урысыем и Министерствэ игукъэкIыкIэ рагъэкIокIыгъэ зэIукIэгъухэм алъыпыдзагъэу зэхащагъ.

ЗэIукIэгъум хэлэжьагъэх егъэджэн IофшIэнымкIэ проректорэу Людмила Задорожнаяр, ныбжьыкIэ политикэмкIэ ыкIи гъэсэкIо IофшIэнымкIэ проректорэу БрантIэ Мурат, ныбжьыкIэ политикэмкIэ ыкIи гъэсэкIо IофшIэнымкIэ гъэIорышIапIэм ипащэу Ирина Ширинар, МКъТУ-м ипсихологическэ къулыкъу ипащэу Людмила Красновар, Мыекъопэ къэралыгъо технологическэ университетым истуденческэ унэгъуибгъу.

МКъТУ-м иректорэу Къуижъ Саидэ къыIотагъ унэгъо ныбжьыкIэхэм университетым гухахъо щагъотыным мэхьанэ зэриIэр, ащ фэшI студентмэ яянэ-ятэхэми IофшIакIохэми IэпыIэгъу зэрафэхъухэрэр, еджэныр, IофшIэныр ыкIи сабыйхэм апылъынхэр къин къащымыхъунхэм, зэдагъэцэкIэшъунхэм зэрэдэлажьэхэрэр хигъэунэфыкIыгъ. Анахьэу Саидэ Казбек ыпхъум ынаIэ зытыридзагъэр унэгъо хабзэ-унашъохэм якъэухъумэн дэлэжьэнхэ зэрэфаехэр ары, ахэр ары унагъохэр зыгъэпытэхэрэр, культурнэ кIэныр лъызгъэкIуатэрэр. Джащ пае ащ фэдэ студентэу чIэсхэмрэ IофшIакIохэмрэ университетыр яунэм фэдэу щытын фае, профессиональнэ хэхъоныгъэхэр ашIынхэ алъэкIыщт.

Университетым хэушъхьафыкIыгъэ программэхэр унэгъо ныбжьыкIэхэм зэрапигъохырэр хагъэунэфыкIыгъ: еджэнымкIэ ыкIи IофшIэнымкIэ гъунапкъэ зимыIэ графикыр, психологхэр джэнджэш къафэхъунхэр, материальнэ IэпыIэгъу агъотыныр — а зэкIэри студенческэ унагъохэм якъэухъумэн ыкIи ягъэпытэн фытегъэпсыхьагъэх. НыбжьыкIэ политикэмкIэ ыкIи гъэсэкIо IофшIэнымкIэ гъэIорышIапIэм ипащэу Ирина Ширинам Адыгэ Республикэм ыкIи МКъТУ-м социальнэ IэпыIэгъоу унэгъо ныбжьыкIэхэм арагъэкIыхэрэр зыфэдэхэр къыIотагъэх, ащ къыхеубытэх сабыйхэр зиIэхэр, ны-тыхэм апае социальнэ программэу республикэм щаштагъэхэр.

ЗэIукIэм хэлажьэхэрэр зыгъэгумэкIыхэрэм акIэупчIагъэх ыкIи зыгъэрэзэгъэхэ джэуапхэр зэхахыгъэх. Зэхахьэм икIэухым университетым къафигъэхьазырыгъэ шIухьафтынхэр студенческэ унагъохэм аратыжьыгъэх.