Гъэлъэшыгъэ шIыкIэм лъэтегъэуцо университетым, Политехническэ колледжым, къутамэу Яблоновскэм дэтым ястудентхэмрэ ягъэсакIохэмрэ афашIыгъ. МКъТУ-м и «Точка кипение» ипрограммнэ пащэу Светлана Новиковар ыкIи иадминистраторэу, гъэлъэшыгъэ шIыкIэм пшъэдэкIыжь зыхьырэ исекретарэу Мария Тамахинамрэ лъэтегъэуцор зэращагъ.

МКъТУ-м истуденческэ технологическэ командэхэм чъэпыогъум и 14-м къыщыублагъэу тыгъэгъазэм и 14-м нэс федеральнэ проектым хэлэжьэщтых ыкIи Урысыем иапшъэрэ еджэпIэ 147-мэ ястудентхэм ягъусэхэу акIуачIэ аушэтыщт.

Гъэлъэшыгъэ шIыкIэм къыдыхэлъытагъэу тхьэмафи 8-м къыкIоцI ащ хэлэжьэщтхэм гъэсэныгъэ программэр акIущт, технологическэ, коммерческэ ыкIи социальнэ проектхэм адэлэжьэщтых, ахэмкIэ гумэкIыгъоу щыIэхэм ядэгъэзыжьын Iоф дашIэщт. Студентхэмрэ гъэсакIохэмрэ япшъэрылъхэр щыIэныгъэм щыпхыращынхэмкIэ, бизнесыр зэтырагъэуцонымкIэ IэшIэх къафэхъущт лъэныкъохэм алъыхъущтых. Iофтхьабзэм хэлажьэхэрэр компаниехэм яIэпыIэгъу агъотыщт, стажировкэ ащакIушъущт ыкIи IофшIэпIэ чIыпIэ къащыхахын алъэкIыщт. Егъэджэнри IофшIэнри онлайн ыкIи офлайн форматхэмкIэ рагъэкIокIыщтых

Гъэлъэшыгъэ IофшIэныр адрэхэм зэратекIырэр командэхэм ежь-ежьырэу зыдэлэжьэщт лъэныкъохэр къызэрэхахыхэрэр, курсхэр зэракIухэрэр ыкIи мастер-классхэр зэрэрагъэкIокIыхэрэр ары. Ащ фэшъхьафэу, Iофтхьабзэм хэлажьэхэрэр отраслевой экспертмэ адэгущыIэнхэ алъэкIы, гъомлапхъэ производствэм, IT, псауныгъэм икъэухъумэн алъэныкъокIэ шIэныгъэу аIэкIэлъхэмкIэ зэхъожьых.

Зэфэхьысыжьэу хъущтыр командэмэ продуктэу агъэхьазырыщтхэр ары, софт-скиллхэу тапэкIэ цIыфхэм къашъхьэпэщтхэм ягъэпсын.

Шъугу къэдгъэкIыжьын, МКъТУ-м истуденческэ командэхэр Университет 2035-рэ зыфиIорэ интенсивым илъэсищ хъугъэу хэлажьэх.