Урысыемрэ Белоруссиемрэ Союзнэ къэралыгъо гъэпсыгъэнымкIэ Зэзэгъыныгъэм зызэдыкIэтхагъэхэр илъэс 25-рэ зэрэхъурэм ихэгъэунэфыкIын къыдыхэлъытагъэу Мыекъопэ къэралыгъо технологическэ университетым Iэнэ хъураеу «Тхыпхъэ искусствэр культурнэ кодым икъэгъэныжьын лъапсэу щыт» зыфиIорэр щыкIуагъ.

Мыекъопэ къэралыгъо технологическэ университетымрэ Урысые культурологическэ обществэмрэ Iофтхьабзэм кIэщакIо фэхъугъэх. Зэхэсыгъор зезыщагъэр стандартизациемкIэ, метрологиемкIэ ыкIи товарнэ экспертизэмкIэ МКъТУ-м икафедрэ идоцентэу, искусствоведениемкIэ кандидатэу КIэдэкIое Нафсэт.

Зэхэсыгъом хэлэжьагъэх: МКъТУ-м и ШIэныгъэ тхылъеджапIэ ипащэу Пщыжъ Саид; Адыгэ Республикэм и Лъэпкъ музей этнографиемкIэ иотдел ипащэу Цэй Сусан; Пшызэ къэралыгъо университетым шъуашэ дизайнымкIэ икафедрэ икIэлэегъаджэу, СДР-м хэтэу Эльвира Осановар; АР-м гуманитар ушэтынхэмкIэ иинститутэу КIэрэщэ Тембот ыцIэ зыхьырэм иучёнэ секретарэу Шэуджэн Тамар; Адыгэ Республикэм и Лъэпкъ музей этнографиемкIэ иотдел инаучнэ IофышIэ шъхьаIэуХейшхо Ирин; дизайнерэу, АР-м итеатральнэ   объединение шъуашэхэмкIэ ихудожникэу Къуекъо Саид.  

Программэм къыдыхэлъытэгъэ докладэу къашIыгъэхэр:

— «Беларусым итамыгъэхэр ыкIи лъэпкъ тхыпхъэхэм ащыщхэр непэрэ щыгъынхэу авторскэ коллекциехэм ахахьэхэрэм зэращагъэфедэхэрэр» зыфиIорэр — техническэ шIэныгъэхэмкIэ кандидатэу, доцентэу, Витебскэ къэралыгъо  технологическэ университетым «Конструирование и технология одежды и обуви» зыфиIорэ кафедрэу иIэм ипащэу Вера Довыденковар.

— «Лъэпкъыр къыхэзгъэщырэ тхыпхъэр: непэрэ уахътэм культурэм зэрэщагъэфедэрэр» — Урысыем итарихъ и Къэралыгъо гупчэ музеим икъутамэу —  Мемориальнэ комплексэу «Катынь» ипащэу, Дунэе общественнэ организациеу «Братство белорусов и россиян» зыфиIорэм иправление хэтэу Павел Сапотько.

— «Адыгэмэ ядышъэ идын — анахь шъхьаIэу художественнэ лъэпкъ шъуашэр къэзгъэлъагъорэр» — стандартизациемкIэ, метрологиемкIэ ыкIи товарнэ экспертизэмкIэ МКъТУ-м икафедрэ идоцентэу, искусствоведениемкIэ кандидатэу КIэдэкIое Нафсэт.

— «Адыгэ лъэпкъ тхыпхъэхэр унэхэм зэращагъэфедэхэрэр» — МКъТУ-м псэолъэшIынымкIэ ыкIи общепрофессиональнэ дисциплинэхэмкIэ кафедрэм идоцентэу, биологие шIэныгъэхэмкIэ кандидатэу Оксана Борсук.

— «Адыгэмэ ядышъэ идынкIэ непэрэ технологиехэу щыIэхэр» — лъэпкъ-художественнэ промыслэмэ ямастерэу, «Промыслы и ремёсла Адыгеи»  зыфиIорэ Ассоциацием хэтэу Джармэкъо Зурет.

— Урыс тхыпхъэхэр непэрэ урыс щыгъынмэ зэратетыр  (щысэу проектхэу «Сокол ясный» ыкIи «ДушуГрея зыфиIохэрэр къыхьыхэзэ») — МКъТУ-м истуденткэу Анна Горковенко.

— «Декоративнэ-прикладной искусствэм щылажьэрэ мастерхэм яIофшIагъэхэм непэрэ адыгэ тхыпхъэхэр къазэрэхэщыхэрэр» — МКъТУ-м инаучнэ IофышIэ шъхьаIэу КIубэ Анжел.

IофшIагъэу ыкIи шIэныгъэу яIэхэмкIэ зэхъожьынхэр ары пшъэрылъ шъхьаIэу Iэнэ хъураем иIагъэр, ар икъоу зэкIэхэми къадэхъугъ, лъэпкъ тхыпхъэхэм культурнэ кодыр къызэраухъумэрэр ыкIи къызэрагъэнэжьырэр хагъэунэфыкIыгъ.