Непэ Мыекъопэ къэралыгъо технологическэ университетым щыжъотыгъ, студент 1100-м ехъумэ апэрэ курсым зэрэчIэхьагъэхэм и Мафэ хагъэунэфыкIыгъ.

Iофтхьабзэр къызэIуахыгъ егъэджэн IофшIэнымкIэ проректорэу Людмила Задорожнаям ыкIи ныбжьыкIэ политикэмкIэ ыкIи гъэсэкIо IофшIэнымкIэ проректорэу БрантIэ Муратэ. Ахэмэ студентмэ шIуфэс къарахыгъ, гъэхъагъэхэр апшъэрэ еджапIэм щашIынхэу къафэлъэIуагъэх ыкIи Мыекъопэ къэралыгъо технологическэ университетым нэIуасэ зыфашIынэу къяджагъэх.

Пчэдыжьым къыщыублагъэу студентмэ апае интерактивнэ площадкэ 30-мэ Iоф ашIэщтыгъэ, ахэм научнэ, гъэсэныгъэ, студенческэ, общественнэ ыкIи культурнэ щыIакIэу МКъТУ-м иIэм нэIуасэ афашIыщтыгъэх.

Щагу кIоцIым дэтыгъэх общественнэ ныбжьыкIэ ыкIи студенческэ организациехэр: Акселераторэу «ИнноВектор МКъТУ», Психологическэ къулыкъур, МКъТУ-м иавтоеджапIэ, МКъТУ-м хэхьэрэ Дзэ егъэджэн гупчэр, ГуфэкIо гупчэу «МКъТУ», «ГъэсакIомэ якорпус», Апэрэхэм я Движение, «Урысыем иныбжьыкIэхэм я Союз», Урысые общественнэ движениеу «ГуфакIо-медикхэр» зыфиIорэм ишъолъыр къутамэ,  «МКъТУ-м имэшIогъэкIосэ гуфэкIо отряд» ыкIи нэмыкIыбэхэр. Апэрэ курсым чIэхьагъэхэу къэзэрэугъоигъэхэм апае организациехэм лъэтегъэуцохэр зэхащагъэх, етIанэ ясатыр ныбжьыкIэхэу зышIогъэшIэгъонхэр хэуцуагъэх.

МКъТУ-м и Научнэ тхылъеджапIэ тхылъ къэгъэлъэгъонхэр, видеороликхэр къыщатыгъэх, акъылымкIэ федэ хъурэ джэгукIэ зэфэшъхьафищ студентмэ къапигъохыгъэх. Ащ фэшъхьафэу студентхэр гъогоу «Студентхэм яурам лъэсэу» зыфиIорэм рыкIуагъэх.

МКъТУ-м хэпхыжьын умылъэкIынэу гъэсэныгъэр лъэгапIэхэм атезгъэуцохэрэм ащыщ дунаим иуниверситет пэрытхэм зэрадэлажьэрэр. Дунэе академическэ мобильностымкIэ Гупчэм а лъэныкъомкIэ Iофыгъо макIэп зэшIуихырэр. МКъТУ-р дунаим зэрэщызэлъашIэрэм ишIуагъэкIэ, студентмэ амалыкIэхэр яIэхэ мэхъу. Ахэмэ практикэхэр IэкIыб къэралыгъохэм ащахьын алъэкIы, научнэ, культурнэ стажировкэхэм ахэлажьэх, ахэр зэкIэ Гупчэр ары къязытырэр.

Урысые чемпионатэу «Профессионал ныбжьыкIэхэр» зыфиIорэ площадкэр ары мы мафэм анахьэу къахэщыгъэр. Видео-лъэтегъэуцо Iофтхьабзэр макIофэ ашIыгъ, ащ апшъэрэ еджапIэм мы движением зызэрэщиушъомбгъугъэм, Iофэу ыгъэцакIэрэм нэIуасэ зыщыфашIыгъ, мастер-классхэри афызэхащагъ, лъэныкъуабэхэм анэсыгъэх.

МКъТУ-м и «Точка кипение» джащ фэдэу мэфэкI Iофтхьабзэм хэлэжьагъ. Апэрэ курсым щеджэрэ студентмэ апае бизнес-джэгукIэу  «Беспилотная авиация в жизни людей» зыфиIорэр рагъэкIокIыгъ, кинофильмэ къагъэлъэгъуагъ, ар научнэ Фестивалым къыдыхэлъытагъэу щытыгъ.

Университетым иактовэ зал модэм итеатрэу «К’Star» эскизхэр ыкIи образхэр къызэрэхъухэрэр зышIогъэшIэгъонхэм къаригъэлъэгъугъ.

 «Народнэ дипломатием ыкIи культурнэ зэпхыныгъэхэмкIэ Гупчэм» ыкIи  «Урысые лъэпкъхэм яныбжьыкIэхэм я Союз» ишъолъыр къутамэ Iофтхьабзэ зэфэшъхьафхэр зэхащагъэх, лъэпкъ зэгурыIоныгъэмкIэ ашIэхэрэр къаIотагъ. 

МКъТУ-м и Студ.Пространство приставкэмкIэ джэгукIэ зэнэкъокъухэр зэхищагъэх, къэшъонымкIэ мастер-классхэр ригъэкIокIыгъэх. «Студ.Пространство» зыфиIорэм ипшъэрылъ шъхьаIэр — студенческэ хъоур ныбжьыкIэхэм хэхъоныгъэ ягъэшIыгъэным фэгъэIорышIэгъэныр, нэбгырэ пэпчъ игъогу къегъэгъотыгъэныр ары.

ИлъэсыкIэ еджэгъур зырагъэжьагъэм къыщыублагъэу апэрэ курсым къычIэхьагъэмэ я Мафэ фэгъэхьыгъэ мэфэкIыр анахь Iофтхьабзэ ин хъугъэ. Апэрэ курсым щеджэрэ студент 1000-м ехъу, интерактивнэ площадкэ 30, а зэкIэри сыхьати 4-рэ кIуагъэ!

Мыекъопэ къэралыгъо технологическэ университетым къызэрэчIэхьагъэхэм пае апэрэ курсым щеджэхэрэм тафэгушIо, тапэкIэ гъэхъагъэхэр ашIынхэу тафэлъаIо!