Мыекъопэ къэралыгъо технологическэ университетым мэкъу-мэщ технологиехэм яфакультет лъэныкъоу «ЧIыгугъэпсыныр ыкIи кадастрэр» зыфиIорэм щеджэрэ студентмэ апае лекцие къыщатыгъ.

ЧIыгугъэпсыным икафедрэ идоцентэу Ирина Селивановар ары лекцие десэхэр университетым щызэхэзыщагъэхэр. Iофтхьабзэм хэлэжьагъ чIыгугъэпсыным икафедрэ ипащэу, мэкъу-мэщ шIэныгъэхэмкIэ докторэу, профессорэу Iэшъынэ Юныс.

— Специалист-практикмэ зэIукIэгъухэр адашIынхэр университетым шэны фэхъугъ. Сэнэхьатым нахь хэшIыкI куу фыряIэным ыкIи IофшIэн шэпхъакIэу щыIэхэм нэIуасэ афэхъунхэм алъэныкъокIэ студентхэм шIэныгъэхэр щагъотых, — къыIотагъ чIыгугъэпсыным икафедрэ идоцентэу Ирина Селивановам.

ЧIыгу Iофхэм алъыплъэгъэнымкIэ къэралыгъо ГъэIорышIапIэм ипащэ игуадзэу Родион Башлыковым неущрэ специалистхэр IофшIэным нэIуасэ фишIыгъэх. Ащ игъэкIотыгъэу къыIотагъ чIыгу инспекторым иIоф зыфэдэр, чIыгухэр зэрагъэпсэуалъэхэрэр, пилот зэрымыс быбырэ аппаратхэм зэрадэлажьэхэрэ шIыкIэр, ахэмкIэ хэбзэукъуагъэ зышIыхэрэм зэралъыплъэхэрэр.

Ащ фэшъхьафэу, зэIукIэм хэлажьэрэмэ анаIэ тырадзагъ геодезическэ хъытыум епхыгъэ чIыпIэхэр къызэрагъэгъунэхэрэм ыкIи зэрагъэнафэхэрэм, учетым зэрахагъэуцохэрэм. Непэрэ мафэм Адыгэ Республикэм геодезическэ хъытыум епхыгъэ къэралыгъо чIыпIэ 273-рэ ит, къэралыгъо нивелирнэ 147-рэ мэхъу. Ахэмэ яшIуагъэкIэ геодезическэ ыкIи картографическэ IофшIэнхэр зэкIэ агъэцакIэ, ахэмэ  космическэ спутникхэу GPS ыкIи ГЛОНАСС-р апышIагъэх.

— Ащ фэдэ чIыпIэхэр къыхэгъэщыгъэнхэмкIэ ыкIи ЗыкI къэралыгъо реестрэм хэтхэжьыгъэнхэмкIэ геодезическэ IофшIэнхэр лъытэгъэкIуатэх, къэралыгъо программэу «Национальная система пространственных данных» зыфиIорэм къыдыхэлъытагъэу ар щыт. УплъэкIун-лъыплъэн IофшIэныр къэзгъэпсынкIэрэмэ а Iофыгъор зэу ащыщ, — къыкIигъэтхъыгъ Родион Башлыковым.

ЗэIукIэм икIэухым ГъэIорышIапIэм испециалист видеороликхэр къыгъэлъэгъуагъэх, геодезическэ чIыпIэхэр къызэрэхагъэщыхэрэр къыгъэнэфагъэх, упчIэмэ джэуапхэр къаритыжьыгъэх.