Стадионэу «Ростов Арена» зыфиIорэм илъэс къэс рагъэкIокIырэ я XV – рэ шIэныгъэ Фестивалыр щыкIуагъ, ащ шIэныгъэм фаблэрэ нэбгырэ минипшIым ехъу хэлэжьагъ.

Фестивалым ипрограммэ къыдыхэлъытагъэу къэгъэлъэгъонхэр ыкIи зэIукIэгъухэр зэхащагъэх, Къыблэ Урысыем ишIэныгъэлэжьхэр щызэхэгущыIэжьыгъэх.

Фестивалым икъызэIухын фэгъэхьыгъэ зэхахьэм хэлэжьагъэх УФ-м и Президент илIыкIоу Къыблэ федеральнэ шъолъырым щыIэ Владимир Гурба, Ростов хэкум игубернатор иапэрэ гуадзэу Игорь Гуськовыр, IофшIэнымкIэ ыкIи социальнэ хэхъоныгъэмкIэ Ростов хэкум иминистрэу Ирина Шуваловар, Къыблэ федеральнэ университетым иректорэу Марина Боровскаяр, экономикэ шIэныгъэхэмкIэ докторэу, профессорэу, банкэу «Центр-инвест» зыцIэм ипащэхэм я Совет итхьаматэу Василий Высоковыр.

Мыгъэ къэгъэлъэгъон чIыпIэм апшъэрэ еджэпIэ ыкIи шIэныгъэ-гъэсэныгъэ гупчэ 16 хэхьагъ, ахэмэ зэу ащыщыгъ Мыекъопэ къэралыгъо технологическэ университетыр. Тиапшъэрэ еджапIэ илIыкIо куп хэтыгъэх: гъомлапхъэхэм ятехнологие ыкIи шхыныгъохэм ягъэхьазырынкIэ кафедрэм идоцентэу, мэкъу-мэщ технологиехэм ыкIи шIэныгъэ IофшIэнымкIэ факультетым идекан игуадзэу Едыдж Саидэ, МКъТУ-м истудентхэу ыкIи имагистрантхэу Кудайнет Саидэ, Надежда Бугаевар, Диана Магулян, НатIэкъо Даринэ, Максим Жаворонковыр, Тамерлан Бекировыр, Мэрэтыкъо Бэллэ.

Фестивалым Iофтхьабзэ шъхьаIэу щыкIуагъэр СНО-м ифорумэу Къыблэ Урысыем иапшъэрэ еджапIэмэ рагъэкIокIыгъэр ары, шIэныгъэлэжь ныбжьыкIэ кадрэхэм ягъэхьазырын, ушэтынэу ашIыгъэхэм, хэхъоныгъэу яIэхэм язэхэфын ар фэгъэхьыгъагъ.

Мыгъэ тыкъэзыуцухьэрэ дунаим ыкIи экологием якъэухъумэн мэхьанэшхо ратыгъ, Iэнэ хъураеу «Зеленая повестка. Исследовательский и просветительский потенциал» зыфиIорэр зэхащагъ. Ащ кIэлэеджакIохэу чIыпIэм щыIэхэм ядокладхэм щядэIугъэх, анахь дэгъухэр шIухьафтынхэмкIэ къыхагъэщыгъэх.

Я XV – рэ шIэныгъэ Фестивалым гъусэгъоу иIагъэхэр: Урысые Федерацием шIэныгъэмрэ гъэсэныгъэмрэкIэ и Минситерствэ, Московскэ къэралыгъо университетэу М.В. Ломоносовым ыцIэ зыхьырэр, Урысые фестивалэу «ШIэныгъэ 0+», Къыблэ федеральнэ университетыр, ПАО КБ «Центр-инвест», Урысые обществэу «ШIэныгъэр», Урысые общественнэ организациеу «Урысыем имашинэшIхэм я Союз» зыфиIорэм и Ростовскэ шъолъыр отделение, Урысые проектэу «Тэ тызэгъус», Медиа купэу РБК, Къыблэ ыкIи Темыр Кавказыр, Гъэзетэу Къыблэр.