Непэ торжественнэ шIыкIэм тетэу Мыекъопэ къэралыгъо технологическэ университетым хэхьэрэ Дзэ егъэджэн гупчэ къызэIуахыгъ, ащ Адыгеим и ЛIышъхьэу КъумпIыл Мурат хэлэжьагъ.

Iофтхьабзэм хэлэжьагъэх АР-м и Къэралыгъо Совет-Хасэ и Тхьаматэу Владимир Нарожнэр, МКъТУ-м ипрезидентэу ТхьакIущынэ Аслъан, Урысыем и ЛIыхъужъэу, «ХэушъхьафыкIыгъэ дзэ операцием и Ассоциацие иветеранхэм» яреспубликэ шъолъыр организацие итхьаматэу Цэй Эдуард, Мыекъопэ къэралыгъо технологическэ университетым иректорэу Къуижъ Саидэ, Урысыем и Дзэ-космическэ кIуачIэхэм кадрэ гъэIорышIэнымкIэ илIыкIохэр, дзэ гупчэхэм, АР-м идзэ комиссариат, Краснодарскэ апшъэрэ дзэ училищэм къарыкIыгъэхэр, юнармейцэхэр, общественнэ организациехэм ялIыкIохэр.

УФ-м и Правительствэ и Унашъо елъытыгъэу Дзэ егъэджэн гупчэр агъэпсыгъ. Урысыем и УIэшыгъэ кIуачIэхэм апае кадрэхэр мыщ щагъэхьазырыщтых. Урысыем и Дзэ-космическэ кIуачIэхэр ары дзэ гъэхьазырыныр резгъэкIокIырэр.

МКъТУ-м истудентхэу курсант хъугъэхэр илъэситIум къыкIоцI егъэджэнхэр лъэныкъоу «Механик планеров и двигательных установок БПЛА», «Оператор БПЛА» зыфиIохэрэмкIэ акIущтых. Дзэ кафедрэм ишапхъэхэмкIэ егъэджэнхэр зэхащэх ыкIи ащ зэрэщеджэхэрэ уахътэр дзэ къулыкъу ахьыгъэу къафалъытэ, нэужым УФ-м иуIэшыгъэ кIуачIэхэм ащылэжьэнхэу фитныгъэ яIэщт.

АР-м и ЛIышъхьэ апшъэрэ еджапIэм ипащэхэм, командованием ыкIи студентхэм афэгушIуагъ, Дзэ егъэджэн гупчэр непэрэ лъэхъаным ищыкIэгъэ шъыпкъэу зэрэщытыр къыкIигъэтхъыгъ.

— Мыщ фэдэ дзэ егъэджэн гупчэхэр апшъэрэ еджапIэхэм къазэрэщызэIуахырэм мэхьанэшхо иIэу щыт, хэгъэгур къэухъумэгъэным ахэр афэIорышIэх. Шъузэрэщыгъуазэу, дзэ-промышленнэ комплексым хэхъоныгъэшхохэр ешIых, тиуIэшыгъэ кIуачIэхэр IэшакIэхэмкIэ зэтырагъэпсыхьэх, ахэр зыгъэIорышIэщтхэм ухьазырыныгъэ дэгъу яIэн фае,

— къыIуагъ КъумпIыл Мурат. 

Торжественнэ зэхахьэм къыщыгущыIагъэх АР-м и Къэралыгъо Совет-Хасэ и Тхьаматэу Владимир Нарожнэр, Урысыем и Дзэ-космическэ кIуачIэхэм дзэ гъэсэныгъэмкIэ иотдел ипащэу Николай Перетятько, АР-м иветеранхэм я Совет итхьаматэу Къуаджэ Аслъан, «ХэушъхьафыкIыгъэ дзэ операцием и Ассоциацие иветеранхэм» яреспубликэ шъолъыр организацие итхьаматэу Цэй Эдуард, Мыекъопэ къэралыгъо технологическэ университетым иректорэу Къуижъ Саидэ.

АР-м и ЛIышъхьэу КъумпIыл Мурат Дзэ егъэджэн гупчэр зычIэт унэр къыплъыхьагъ, ащ ипащэхэм, курсантхэм гущыIэгъу афэхъугъ.

Дзэ егъэджэн гупчэм ипащэу Нурлан Самадьяновыр учреждением иамалхэм къатегущыIагъ: егъэджэн-лабораторнэ ыкIи гъэцэкIэжьын базэр, еджэпIэ классхэр, Iашэр зычIэлъыщт чIыпIэр, курсантхэр техническэу зэрагъэхьазырыщтхэр къыгъэлъэгъуагъэх, Юнармием, ДОСААФ-м, дзэ-патриотическэ зэхэтхэм, ветеранхэм ясоветхэм ыкIи гуфакIохэм Iоф зэрадашIэщтыр къыхигъэщыгъ.

ЕджапIэм тир чIэтэу агъэпсыгъ, ащ компьютерхэр, оргтехникэр, проекторхэр, симуляторхэр, интерактивнэ пкъыгъохэр, пилот зэрымыс быбырэ аппаратхэр ыкIи нэмыкIыбэхэр чIэплъэгъощтых. УФ-м и УIэшыгъэ кIуачIэхэм яшIэныгъэ-гъэсэныгъэ гупчэхэм зэпхыныгъэ еджапIэм адыриI. КIэлэегъаджэхэм запасым щыIэ офицерхэр ахэтых.

Iофтхьабзэм икIэухым АР-м и ЛIышъхьэу КъумпIыл Мурат джыри зэ МКъТУ-м хэхьэрэ Дзэ егъэджэн гупчэм щылэжьэрэ купымрэ студентхэмрэ афэгушIуагъ, гъэхъагъэхэр ашIынхэу афэлъэIуагъ.