Апэрэ гъэсэныгъэ медицинскэ кластерэу «ПрофиМед» зыфиIорэр шъолъырым къыщызэIуахыгъ

Мыекъопэ къэралыгъо технологическэ университетым хэхьэрэ Политехническэ колледжым торжественнэ зэхахьэр щыкIуагъ. Ащ хэлэжьагъэх АР-м псауныгъэр къэухъумэгъэнымкIэ иминистрэу Мэрэтыкъо Рустем, гъэсэныгъэмрэ шIэныгъэмрэкIэ АР-м иминистрэ игуадзэу Пэрэныкъо Сусанн, къалэу Мыекъуапэ иадминистрацие ипащэ игуадзэу Андрей Михайловыр, Мыекъопэ къэралыгъо технологическэ университетым иректорэу Къуижъ Саидэ, Политехническэ колледжым ипащэу ХъутIыжъ Заурбэч ыкIи нэмыкIхэр. АР-м и ЛIышъхьэ ыцIэкIэ Мэрэтыкъо Рустем зэхахьэм хэлажьэрэмэ къафэгушIуагъ: «Непэ медицинэ кадрэхэм ягъэхьазырынкIэ нахь лъэгапIэ иным тынэсыгъ. Гъэсэныгъэ шапхъакIэу щыIэхэмкIэ специалистхэр агъэхьазырыщтых, ахэр инновационнэ медицинскэ Iэмэ-псымэхэмкIэ агъэсэщтых. Тэгугъэ, мы еджапIэм ишIуагъэкIэ тиреспубликэ медицинэм ылъэныкъокIэ гъэхъэгъакIэхэр щишIынхэу, щыкIагъэхэр дигъэзыжьынхэу.

Урысыем ишъолъыр 58-мэ программэу «Профессионалитетым» хэхьэрэ кластери 150-мэ япчъэхэр къащызэIуахых, ахэр отраслэ 19-мэ афэгъэзэгъэщтых. Къэралыгъор, гъэсэныгъэр ыкIи хъызмэтшIапIэхэр зэдэлэжьэнхэр а программэм къыделъытэ, кадровэ амалхэр нахьышIу шIыгъэнхэм атегъэпсыхьагъ. Мыгъэ проектым ыныбжь илъэси 3 мэхъу.

2024-рэ илъэсым Мыекъопэ къэралыгъо технологическэ университетым грантыр къыдэхыгъэнымкIэ текIоныгъэ къыхьыгъ, ащ елъытыгъэу УФ-м икъэралыгъо программэу «Гъэсэныгъэм хэхъоныгъэ егъэшIыгъэным» зыфиIорэм хэхьэрэ Федеральнэ проектэу «Профессионалитетым» къыдыхэлъытэгъэ Iофтхьабзэхэм ахэлэжьэн амал иIэ хъугъэ. Гъэсэныгъэ медицинскэ кластерэу «ПрофиМед» зыфиIорэм хэлажьэх гъэсэныгъэмрэ шIэныгъэмрэкIэ АР-м и Министерствэ, псауныгъэр къэухъумэгъэнымкIэ АР-м и Министерствэ, гъэсэныгъэ организациищ, псауныгъэм икъэухъумэн фэгъэзэгъэ 12. А зэкIэри зэзыпхырэр Мыекъопэ къэралыгъо технологическэ университетым хэхьэрэ Политехническэ колледжыр ары. Ащ гъэцэкIэжьын IофшIэнхэр щыкIуагъэх, медицинскэ кластерым фытегъэпсыхьагъэу унэхэр агъэкIэжьыгъэх, инновационнэ медицинскэ Iэмэ-псымэхэр къащэфыгъэх. Джы студентмэ IофшIэпIэ чIыпIих яIэщт, ахэр анахь медицинскэ Iэмэ-псымэхэмкIэ зэтегъэпсыхьагъэх.