Непэ, Мыекъопэ къэралыгъо технологическэ университетым къэралыгъо ыкIи муниципальнэ къулыкъушIэхэм хэхъоныгъэ ягъэшIыгъэным и Гупчэу иIэм иплощадкэ егъэджэн-методическэ десэу «Информационная гигиена. Противодействие пропаганде противника» зыфиIорэр щыкIуагъ.

Терроризмэм ыкIи идеологие егъэлыегъакIэм апэуцужьыгъэным алъэныкъокIэ лажьэрэ къэралыгъо къулыкъушIэхэм Iофтхьабзэр афэгъэхьыгъагъ, ар Урысые обществэу «ШIэныгъ» зыфиIорэм ипроектэу ШIэныгъэр.Къэралыгъор зыцIэм къыдыхэлъытэгъагъ.

Зэхэсыгъом хэлэжьагъэх Урысые обществэу «ШIэныгъ» зыфиIорэм и ЛъыплъэкIо советэу Адыгэ Республикэм щыIэм ипащэ игуадзэу, Адыгэ Республикэм и ЛIышъхьэ и Администрацие ыкIи АР-м иминистрэхэм я Кабинет япащэу Владимир Свеженец, МКъТУ-м иректорэу, Урысые обществэу «ШIэныгъэм» и Адыгэ шъолъыр къутамэ ипащэу Къуижъ Саид, терроризмэм пэшIуекIогъэнымкIэ АР-м и Аппарат ипащэу ЛIый Азамат, къэралыгъо къулыкъум и ГъэIорышIапIэ ыкIи кадровэ политикэмкIэ пащэу Бекух Азамат.

Iофтхьабзэм къыдыхэлъытагъэу Михаил Канавцевым къэзэрэугъоигъэхэр нэIуасэ фишIыгъэх информационнэ шIыкIакIэу агъэфедэхэрэм, социальнэ инженериер зэрагъэфедэрэм ыкIи къыIотагъ медиаконтентым обществэмрэ ахэмэ уасэу яIэхэмрэ зэрэзэрихъокIыхэрэр. ИгущыIэхэр къыгъэшъыпкъэжьынхэу зещакIом щысэхэр кином, анимацием, компьютернэ джэгунхэм, интернетым ыкIи къэбар жъугъэм иамалхэм афгъэхьыгъэхэу къыхьыгъэх.

ЗэIукIэгъум къыдыхэлъытагъэу экспертым ынаIэ тыридзагъ интернет-платформэр аудиторием зэрэдэлажьэрэм, фэмэ-бжьымэу тырихьэрэм, клиповэ гупшысакIэми къатегущыIагъ.

— Нахьыбэрэ платформэмэ клиповэ гупшысакIэу яIэр къызлъагъэIэсы къэс, ар зыгъэфедэхэрэмэ информациер къызэрагурыIорэр нахь макIэ мэхъу. Ащ фэдэ контентхэр нахьыбэрэ зыгъэфедэрэмэ ежь-ежьырэу зэфэхьысыжьхэр ашIыжьышъухэрэп, ягупшысакIэ нахь щэндж мэхъу, — къыхигъэщыгъ Михаил Канавцевым.

Ащ фэшъхьафэу нэпцI къэбархэмкIэ ыкIи психологическэу цIыфхэм къазэрэдэлажьэхэрэм экспертым нэIуасэ къэралыгъо къулыкъушIэхэр фишIыгъэх.

Михаил Канавцевым къыгъэнэфагъэх къэбар нэпцIхэр къызэрэхэбгъэщыщт шIыкIэхэр, контентым куоу зэхэф-зэфэхьысыжь зэрэфэпшIыщтыр, укъызфэзгъэфедэ зышIоигъохэм уазэрэпэуцужьыщтым, ащ щыщ медиагъэсэныгъэ уиIэныр.

ШIэныгъэр.Къэралыгъор лекцие ыкIи мастер-классхэмкIэ зэхащагъ. Обществэу «ШIэныгъэм» иэкспертхэр — урысые шIэныгъэлэжь анахь дэгъух, коучых, бизнесменых, артистых ыкIи гражданскэ обществэм инэмыкI лIыкIох. Мыщ фэдэ форумхэм ахэлажьэхэрэм яшIэныгъэхэм ахагъахъо, культурнэ, тарихъ, геополитическэ ыкIи психологическэ шIэныгъэхэмкIэ нахь бай мэхъух.