Мыекъопэ къэралыгъо технологическэ университетым шIэныгъэлэжьхэм ясовет изэхэсыгъо щыкIуагъ, ар зэрищагъ университетым иректорэу Къуижъ Саидэ. Зэхэсыгъом хэлэжьагъ МКъТУ-м ипрезидентэу ТхьакIущынэ Аслъан.

Зэхэсыгъом ипэублэм, хабзэ зэрэхъугъэу, университетым иIэшъхьэтетхэр профессорскэ-кIэлэегъэджэ купым щыщхэу къызыхъугъэ мэфэкI мафэхэр хэзгъэунэфыкIыхэрэм афэгушIуагъэх.

Ащ ыуж университетым хэхъоныгъэ езыгъэшIыщт упчIэ анахь шъхьаIэхэм зэхэсыгъом щатегущыIагъэх.

Ректорэу Къуижъ Саидэ шIэныгъэлэжьхэм ясовет ихэдзынхэм къатегущыIагъ ыкIи мы органым мэхьанэшхо зэриIэр, университетым хэхъоныгъэ егъэшIыгъэным зэрэдэлажьэрэр къыIотагъ. Ащ ыуж шIэныгъэлэжьхэм ясовет исекретарэу Цуамэкъо Сусаннэ университетым исовет 2024-2025-рэ еджэгъу илъэсхэм Iофэу ышIэнэу ыгъэнафэхэрэм ягугъу къышIыгъ. ШIэныгъэ-ушэтын Iофхэр, гъэсэныгъэм ыкIи университетым иматериальнэ-техническэ зытет гъэпытэгъэным ахэр афэгъэхьыгъагъэх.

Административнэ-хъызмэт IофшIэнымкIэ проректорэу Пэрэныкъо Аслъан докладэу къышIыгъэмкIэ анаIэ тыридзагъ университетыр хъызмэт ыкIи техническэ IофхэмкIэ IофшIэным зэрэфэхьазырым. Анахьэу къыхигъэщыгъэр шъолъырэу къыпэIулъыр зэрэзэтегъэпсыхьэгъэщтыр, ар зэрагъэкIэжьыщтыр ыкIи терроризмэм пэшIуекIогъэнымкIэ ухъумагъэу зэрэщытыщтыр ары.

Егъэджэн IофшIэнымкIэ проректорэу Людмила Задорожнаяр ыкIи технологическэ факультетым идеканэу Шъхьатум Анзаур къатегущыIагъэх университетыр ылъапсэу кафедракIэ къызэрэзэIуахыщтым, ар пивэм ишIын технологиехэм ыкIи шъон пытэу щымыт псыхэм якъыдэгъэкIын афэгъэхьыгъэу зэрэщытыщтым. А кафедрэм къыщагъэхьазырхэрэр гъомлэпхъэ промышленностым, шIэныгъэ ушэтынхэм афэгъэзэгъэщт специалистхэр къыгъэхьазырыщтых. А лъэныкъомкIэ зэзэгъыныгъэ пивэшI заводэу «Майкопский» зыфиIорэм дэшIыгъахэу щыт.

Зэхэсыгъом къыдыхэлъытагъэу МКъТУ-м и Политехническэ колледж зэзэгъыныгъэ шIыкIэм тетэу щылажьэхэрэм шIуагъэу къафихьырэм игугъу къашIыгъ Людмила Задорожнаям ыкIи колледжым ипащэу ХъутIыжъ Заурбэчым, документым иположение упчIэ шъхьаIэу хэтхэм ахэр къатегущыIагъэх.

Егъэджэн-методическэ гъэIорышIэным ипащэу Наталья Чудесовар «ПсэолъэшIыныр» зыфиIорэ лъэныкъомкIэ рагъэджэщтхэм афытегъэпсыхьэгъэ егъэджэн планыкIэм ышъхьэ къырихыгъ. КъычIатIупщыщтхэм нахь IэпэIэсэныгъэшхо ахэлъэу зэрагъэсэщтхэм ар афэгъэхьыгъагъ.

Зэхэсыгъом икIэухым МКъТУ-м июридическэ отдел ипащэу Татьяна Глебовам къыIопщыгъ егъэджапкIэр зыфыкIагъэчын алъэкIыщтхэм, ащ ушъхьагъэу фэхъухэрэм. Советым ащ фэдэ шIыкIэу щыIэхэр ыштагъэх, студентхэм ахъщэ IэпыIэгъоу арагъэкIыщтыр зыфэдизыщтыр агъэнэфагъ.

Зэхэсыгъом къыщаIэтыгъэ упчIэхэр зэкIэ зэхафыгъэх, ащ щаштэгъэ Iофыгъо пэпчъ университетым хэхъоныгъэ егъэшIыгъэным фэIорышIэщт.