КIэлэцIыкIухэм япсауныгъэ зыщагъэпытэрэ лагерэу «Лань» зыфиIорэм аужырэ гъэсэныгъэ Iофтхьабзэхэр непэ щыкIуагъэх. Ахэр Iофтхьабзэу «ШIэныгъ. Зыгъэпсэфыгъу» ыкIи проектэу «ШIэныгъ. Карьера» зыфиIохэрэм къадыхэлъытагъэх, кIэщакIор Урысые обществэу «ШIэныгъэр» ары.

Херсон хэкум ыкIи Адыгэ Республикэм икIэлэеджакIохэм апае криминалистикэмкIэ практическэ егъэджэнхэр зэхищагъэх Мыекъопэ къэралыгъо технологическэ университетым административнэ ыкIи уголовнэ правэмкIэ икафедрэ ипащэу, юридическэ шIэныгъэхэмкIэ кандидатэу Елена Курбановам. БзэджэшIагъэхэр къызэIухыгъэнхэмкIэ джырэ уахътэм криминалистхэм агъэфедэрэ шIыкIэхэм ар къатегущыIагъ.

Нэужым Пшызэ къэзэкъыдзэм и Мыекъопэ къэзэкъ отдел къэбарлъыгъэIэс амалхэм зэпхыныгъэ адыряIэнымкIэ атаманым иIэпыIэгъоу, МКъТУ-р къэзыухыгъэу Анастасия Нетребинар темэу «Надпрофессиональные компетенции в профессиональном успехе. Развиваем с детства» зыфиIорэм къытегущыIагъ ыкIи джэгукIэу «Фуд-совета» ригъэкIокIыгъ.

ШIэныгъ.Карьера — мы проектыр кIэлэеджакIохэм ыкIи студентхэм афытегъэпсыхьагъ, ахэм сэнэхьатэу къыхахыщтымкIэ IэпыIэгъушIу. Проектым къыдыхэлъытагъэу профориентологхэм мастер-классхэр зэхащагъэх, резюмехэр зэхафыгъэх ыкIи пэрытыныгъэ зыIыгъ НR-специалистхэр упчIэжьэгъу къафэхъугъэх. IофшIэным епхыгъэ джэгукIэхэр ыкIи предприятиехэм экскурсиехэр афызэхащагъэх.

Джащ фэдэу лагерэу «Лань» зыфиIорэм кIэлэеджакIохэм афыщызэхащэгъэ Iофтхьабзэхэм къадыхэлъытэгъагъэх профориентацием епхыгъэ шIыкIэ зэфэшъхьафхэр, апэрэ IофшIэныр къызэрэбгъотыщтыр ыкIи портфолио зэрэбгъэхьазырыщтыр. А пстэури проектым испикерхэм къыраIотыкIыгъ.