Обществэу «ШIэныгъ» зыфиIорэм трекэу «ШIэныгъ. Карьера» зыцIэм къыдыхэлъытагъэу ныбжьыкIэхэм апае Адыгэ Республикэм Iофтхьэбзэ гъэнэфагъэхэр щызэхещэх.

Мыщ епхыгъэ зичэзыу Iофтхьабзэр Мыекъопэ къэралыгъо технологическэ университетым иплощадкэ щыкIуагъ, республикэм иныбжьыкIэхэм аIукIагъ Обществэу «ШIэныгъ» зыфиIорэм илекторэу Олег Лебедевыр.

IофшIэным исыд фэдэрэ лъэныкъуи гъэхъагъэхэр щыпшIынхэмкIэ амалэу щыIэхэм, ащкIэ пшIэн фаехэм къэзэрэугъоигъэхэр атегущыIагъэх.

Джащ фэдэу цIыфым сэнаущыгъэу хэлъыр гъэунэфыгъэным, ащ епхыгъэу зызфигъэзэщт лъэныкъор къыхихыным ыкIи иIофшIэнкIэ гъэхъагъэхэр ышIынхэм афытегъэпсыхьэгъэ шIыкIэхэр спикерым ныбжьыкIэхэм къафиIотагъ.

ГущыIэм пае, ныбжьыкIэхэр игъусэу Олег Лебедевыр концепциеу «Окна Джохари» зыфиIорэм тегущыIагъэх, мыщ ишIуагъэкIэ къаготхэм еплъыкIэу къафыряIэр цIыфхэм къагурыIон, ахэм зэфыщытыкIэу адыряIэр нахьышIу ашIын алъэкIы.

— «ЦIыфхэм еплъыкIэу къыпфыряIэр къыбгурыIомэ, ахэм нахь цыхьэшIэгъоу уафыщытын плъэкIыщт, уиIофшIэгъухэми уагурыIощт», — къыхигъэщыгъ Олег Лебедевым.

Джащ фэдэу зэIукIэгъум хэлажьэхэрэм «Тест Белбина» зыфиIорэр зэрагъэшIагъ, ащ ишIуагъэкIэ командэм чIыпIэу щаубытын алъэкIыщтыр ныбжьыкIэхэм нахь къагурэIо, шIуагъэ къытэу зэрэзэдэлэжьэщтхэр агъэнафэ.

НыбжьыкIэхэм къызэрэхагъэщыгъэмкIэ, экспертым зэIукIэгъоу дыряIагъэр шIуагъэ хэлъэу зэхэщагъэ хъугъэ. Бэхэм спикерым упчIэхэр фагъэзагъэх, Iофыгъо гъэнэфагъэхэр зэхафыгъэх, узэрэзекIощтыр хагъэунэфыкIыгъ.

«НыбжьыкIэхэм пстэури ашIогъэшIэгъоныгъ, чаныгъэх. Iофтхьабзэм ыуж студентхэм ащыщхэр къэнагъэх ыкIи упчIэ гъэнэфагъэхэр къатыгъэх, - къыIуагъ экспертым . — ЩыIэныгъэр зычIыпIэ итэп, арышъ, укъэмыуцоу ыпэIэ улъыкIотэн фае гъэхъагъэхэр пшIынхэм пае. Ар лъэбэкъу цIыкIухэмкIэ ебгъэжьэн фае, нэужым ащ гъэхъэгъэшIухэр къыкIэлъыкIощтых».

НыбжьыкIэхэм шIэныгъэу аIэкIэлъым хагъэхъон амал яIэным, сэнэхьатэу къыхахыщтым гъэхъагъэхэр щашIынхэм мы проектым къыдыхэлъытэгъэ Iофтхьабзэхэр фэIорышIэх.